মোৰ বাবে নহয়, দেশৰ বাবে বিশ্বকাপ জিকি আনা; ফাইনেলৰ পূৰ্বে জনাই দিলে দ্ৰাবিড়ে
টী-২০ বিশ্বকাপৰ ফাইনেলখনে তেওঁৰ প্ৰশিক্ষক জীৱনৰ অন্তিমখন খেল হ’ব। শনিবাৰে কেৰিবিয়ান ভূমিত ভাৰতৰ প্ৰশিক্ষক হিচাপে ৰাহুল দ্ৰাবিড়ৰ অন্তিম ইনিংছ। তাৰপিছতে তেওঁ হৈ পৰিব এগৰাকী প্ৰাক্তন প্ৰশিক্ষক। বিদায়ৰ মুহূৰ্তটো ৰঙীণ কৰিব বিচাৰিলেও মুখেৰে প্ৰকাশ কৰা নাই ভাৰতীয় ক্ৰিকেটৰ “দ্য ৱাল”য়ে।
আগতে উইকেটত তেওঁ যেনেকৈ দেৱাল হিচাপে অৱতীৰ্ণ হৈছিল, প্ৰশিক্ষক হিচাপেও তেওঁৰ মুখত বিতৰ্কিত একো বিচাৰি পোৱা নাযায়। দক্ষিণ আফ্ৰিকাৰ বিৰুদ্ধে গ্ৰেণ্ড ফাইনেল খেলৰ পূৰ্বে ভাৰতৰ প্ৰশিক্ষকৰাকীয়ে কয়, “ফাইনেল মানে ফাইনেল। ক্ৰিকেটত ৰিটেক বুলি কোনো কথা নাই, এটা বলতে সকলো শেষ। গতিকে ল’ৰাহঁতক কৈছো মেচত ভুল যাতে খুব কম হয়। তেওঁলোক সকলোৱেই পেছাদাৰী, জানে কি কৰিলে ভাল হ’ব পাৰে, কাপ আহিব পাৰে। তেওঁলোক যুদ্ধৰ বাবে সাজু।”
লগতে পঢ়কঃ গুৱাহাটী বিশ্ববিদ্যালয় মাৰ্কশ্বীট কেলেংকাৰী! ৰাজ্যৰ ভিন্ন প্ৰান্তৰ পৰা ৮ জনক গ্ৰেপ্তাৰ
গ্ৰেণ্ড ফাইনেলত ভাৰতৰ প্ৰশিক্ষক হিচাপে নিজৰ ইনিংছ সামৰিব ৰাহুলে। এতিয়া ঘৰলৈ উভতি দ্ৰাবিড়ে পৰিয়ালক সময় দিব। সংবাদমেলত ৰোহিতৰ প্ৰশিক্ষকগৰাকীয়ে কয় যে “ট্ৰফী জয় কৰি মোক উৎসৰ্গা নহয়, দেশৰ বাবে কাপ জয় কৰা, মই তাকেই ল’ৰাহঁতক কৈছো। কিছুমান ক্ষেত্ৰত তেওঁলোক অধিক আৱেগিক হৈ পৰিছে।”
ইংলেণ্ডক পৰাস্ত কৰি ফাইনেলত প্ৰৱেশ কৰাৰ পাছত চকুলো মচি থকা দেখা গৈছিল ৰোহিতক। তাৰ আগতে এদিনীয়া বিশ্বকাপত অপৰাজিত হৈ ফাইনেলত পৰাস্ত হৈছিল। হিটমেনে হয়তো সেই ঘটনাটো মনত পেলাইছিল। প্ৰশিক্ষক দ্ৰাবিড়ো ৰোহিতৰ কাষত আছিল। ৰাহুলৰ হতাশ মুখখনো তাত ধৰা পৰিল। আহমেদাবাদৰ ফাইনেলত দ্ৰাবিড়ৰ ফালে কেমেৰা ঘুৰাওতে দেখা গৈছিল, শূন্য দৃষ্টিৰে চাই ৰৈছে।
লগতে পঢ়কঃ পৰমাণু বোমাৰ ধাৰণাৰ জন্ম পোৱা আইনষ্টাইনৰ চিঠিখন; আকাশলংঘী দামত বিক্ৰী হ’ব নিলামত
এইবাৰ সাংবাদিকসকলে সুধিছিল, এদিনীয়া বিশ্বকাপৰ ফাইনেলত পৰাজয়ৰ পিছত, পুনৰ এখন ফাইনেল মেচ। কি ভাবিছে? সেই বিষয়ে প্ৰশিক্ষকগৰাকীয়ে কয়, “মোৰ বাবে সকলো সাধাৰণ, খেলপথাৰলৈ যোৱা, প্ৰদৰ্শন কৰা আৰু জয়ী হৈ উভতি আহা।”