অসমত বিজেপি নেতৃত্বাধীন এনডিএৰ বিপুল জয়লাভৰ পিছত পশ্চিমবংগৰ বিধানসভা নিৰ্বাচনতো গেৰুৱা ধুমুহাই উৰুৱাই নিলে তৃণমূল কংগ্ৰেছক। ২০৬খন আসনৰ সংখ্যাগৰিষ্ঠতাৰে পশ্চিমবংগত বিজেপিয়ে চৰকাৰ গঠন কৰিব।
সোমবাৰে সন্ধিয়া দিল্লীস্থিত বিজেপিৰ মুখ্য কাৰ্যালয়ৰ পৰাও নৰেন্দ্ৰ মোদীয়ে পৰিৱৰ্তনৰ বাৰ্তা প্ৰদান কৰে। কিন্তু পশ্চিমবংগত বিজেপিয়ে বিপুল সংখ্যক আসন লাভ কৰাৰ পাছত পুনৰ কংগ্ৰেছ সাংসদগৰাকীয়ে তেওঁলোকৰ বিৰুদ্ধে ভোট চুৰিৰ অভিযোগ উত্থাপন কৰে।
ৰাহুল গান্ধীয়ে অভিযোগ কৰে যে অসম আৰু পশ্চিম বংগৰ বিধানসভা নিৰ্বাচনত বিজেপিয়ে ভোট ‘চুৰি’ কৰি জয়লাভ কৰিছে। তেওঁ লগতে অভিযোগ কৰে যে এই ক্ষেত্ৰত নিৰ্বাচন আয়োগৰও সমৰ্থন আছিল।
ছ’চিয়েল মিডিয়াত এটা পোষ্টত ৰাহুলে কয় যে তেওঁ তৃণমূল নেত্ৰী মমতা বেনাৰ্জীৰ কথাত একমত। ভোটগণনাত মমতাই যি অনিয়মৰ অভিযোগ উত্থাপন কৰিছে, সেই অনিয়মৰ সৈতে তেওঁ একমত বুলি দাবী কৰে। তেওঁ দাবী কৰে যে ৰাজ্যত ‘১০০ৰো অধিক আসন কাঢ়ি নিয়া হৈছে’।
ৰাহুলে অভিযোগ কৰে যে মধ্যপ্ৰদেশ, হাৰিয়ানা, মহাৰাষ্ট্ৰ আৰু ২০২৪ চনৰ লোকসভা নিৰ্বাচনত একেধৰণৰ ঘটনা সংঘটিত হৈছিল, য’ত বিজেপিয়ে জয়লাভ কৰিছিল। মন কৰিবলগীয়া যে সোমবাৰে পশ্চিম বংগৰ বিধানসভা নিৰ্বাচনৰ ফলাফল ঘোষণা কৰা হয়।
তাত বিজেপিয়ে বাস্তৱিকতে তৃণমূল কংগ্ৰেছক ধূলিস্যাৎ কৰিছে। ফলাফল ঘোষণাৰ পিছতে নিৰ্বাচন আয়োগ আৰু বিজেপিৰ বিৰুদ্ধে সৰৱ হৈছে মমতা বেনাৰ্জীয়ে। গণনাত প্ৰৱঞ্চনা কৰা হৈছে বুলি অভিযোগ কৰে তেওঁ।
বিজেপিয়ে ‘১০০ৰো অধিক আসন লুণ্ঠন’ কৰা বুলি দাবী কৰে মমতাই। তৃণমূল নেত্ৰীগৰাকীয়ে গণনা কেন্দ্ৰত তেওঁক ‘হাৰাশাস্তি’ কৰা বুলিও অভিযোগ উত্থাপন কৰে। বংগত ২৯৪খন আসনৰ বিধানসভাত বিজেপিয়ে ২০৬খন আসন লাভ কৰিছে। তৃণমূল কংগ্ৰেছে ৮১খন আসন লাভ কৰে।
আনহাতে, অসমৰ ১২৬খন আসনৰ বিধানসভাত ৮২খন আসন লাভ কৰি একেৰাহে তৃতীয়বাৰৰ বাবে বিজেপিয়ে চৰকাৰ গঠন কৰিবলৈ ওলাইছে। বিজেপি নেতৃত্বাধীন এন ডি এ মিত্ৰজোঁটে মুঠ ১০২খন আসন লাভ কৰিছে।
মন কৰিবলগীয়া যে সমাজবাদী পাৰ্টিৰ মুৰব্বী অখিলেশ যাদৱে সোমবাৰে পশ্চিম বংগৰ নিৰ্বাচনৰ ফলাফলক ‘ভাৰতীয় গণতন্ত্ৰৰ বাবে ক’লা দিন’ বুলি অভিহিত কৰে। ভোটগণনাত ব্যাপক অনিয়ম আৰু কেন্দ্ৰীয় বাহিনীৰ অপব্যৱহাৰৰ অভিযোগ উত্থাপন কৰিছে সমাজবাদী পাৰ্টিৰ মুৰব্বীগৰাকীয়ে।
তেওঁ ছ’চিয়েল মিডিয়াত লিখিছে, ‘শাসকীয় ৰাজনীতিয়ে এতিয়া গণতন্ত্ৰক আৰু অধিক তললৈ নমাই নিব? আজি সমগ্ৰ দেশ ক্ষুব্ধ, গণতন্ত্ৰ কাতৰ।’ ২০২২ চনৰ উত্তৰ প্ৰদেশৰ বিধানসভা নিৰ্বাচন আৰু ২০২৪ চনৰ লোকসভা নিৰ্বাচনতো একেধৰণৰ ঘটনা সংঘটিত হোৱা বুলিও অখিলেশে দাবী কৰে।
তেওঁ দাবী কৰে যে তাতো ৰাইজৰ ৰায়ক ‘মুকলিকৈ লুণ্ঠন’ কৰা হৈছে। আনহাতে কপিল ছিবালেও মমতাৰ বক্তব্যক সমৰ্থন কৰি কয় যে নিৰ্বাচনত তৃণমূল কংগ্ৰেছক বিজেপিয়ে নহয়, নিৰ্বাচন আয়োগ, কেন্দ্ৰীয় বাহিনী আৰু ভোটাৰসকলক বঞ্চনাৰ জৰিয়তে পৰাজিত কৰা হৈছে।
