লোকসভাৰ বিৰোধী দলপতি ৰাহুল গান্ধীৰ নেতৃত্বত দেশজুৰি আৰম্ভ হোৱা ছাত্ৰো কি গুঞ্জ শীৰ্ষক কাৰ্যসূচীৰ গুৰুত্ব, ইয়াৰ প্ৰভাৱ আৰু মোদী চৰকাৰৰ শিক্ষা নীতিয়ে ছাত্ৰ-ছাত্ৰীৰ মনত সৃষ্টি কৰা মানসিক চাপ সন্দৰ্ভত আজি গুৱাহাটীৰ ৰাজীৱ ভৱনত অসম প্ৰদেশ কংগ্ৰেছ কমিটীৰ সংবাদ মাধ্যম আৰু যোগাযোগ বিভাগৰ পক্ষৰ পৰা এখন সংবাদমেল অনুষ্ঠিত হয়। সংবাদমেলত দলটোৰ জ্যেষ্ঠ নেতাসকলে কেন্দ্ৰ আৰু ৰাজ্য চৰকাৰৰ শিক্ষা নীতিক তীব্ৰ সমালোচনা কৰাৰ লগতে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবী উত্থাপন কৰে।
সংবাদমেলত বক্তব্য ৰাখি বিধায়ক আব্দুৰ ৰহিমে কয় যে এখন গণতান্ত্ৰিক দেশত চৰকাৰ আৰু ইয়াৰ প্ৰতিটো বিভাগৰ মন্ত্ৰীসকলৰ নৈতিকতা থকাটো অতি আৱশ্যকীয়। দেশৰ চিকিৎসা শিক্ষাৰ দৰে গুৰুত্বপূৰ্ণ ক্ষেত্ৰখনত একাধিকবাৰ প্ৰশ্নকাকত ফাদিল হোৱাৰ পিছতেও কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানে আজিলৈকে নৈতিক দায়িত্ব স্বীকাৰ কৰি পদত্যাগ কৰাৰ প্ৰয়োজনবোধ নকৰিলে বুলি তেওঁ তীব্ৰ ক্ষোভ প্ৰকাশ কৰে। বৰ্তমানৰ বিজেপি চৰকাৰে ছাত্ৰ-ছাত্ৰীৰ ভৱিষ্যত আৰু জীৱনক লৈ হেতালি খেলিছে বুলি অভিযোগ উত্থাপন কৰি বিধায়কগৰাকীয়ে কয় যে সমগ্ৰ কাণ্ড প্ৰমাণ হোৱাৰ পিছতো প্ৰধানমন্ত্ৰীয়ে শিক্ষামন্ত্ৰীজনক পদত্যাগ কৰিবলৈ বাধ্য নকৰাটোৱে এই গোটেই পেপাৰ লিক কাণ্ডৰ সৈতে চৰকাৰখনৰ পোনপটীয়া সংপৃক্ততাকে স্পষ্ট কৰে। তেওঁ জৱহাৰলাল নেহৰুৰ কাৰ্যকালত ৰে’ল মন্ত্ৰী হৈ থকা লালবাহাদুৰ শাস্ত্ৰীয়ে এটা ৰে’ল দুৰ্ঘটনাৰ বাবে নৈতিক দায়িত্ব লৈ পদত্যাগ কৰাৰ প্ৰসংগ উল্লেখ কৰি বৰ্তমানৰ চৰকাৰৰ কোনো জবাবদিহিতা নাই বুলি কটাক্ষ কৰে। ইয়াৰ উপৰি লাডাখৰ বিশিষ্ট পৰিৱেশবিদ ছোনম ৱাংচুকক অনশনস্থলীৰ পৰা বলপূৰ্বক উঠাই নি ছফদৰজং হাস্পতালত একপ্ৰকাৰ বন্দী কৰি ৰখা কাৰ্যক তেওঁ তীব্ৰ গৰিহণা দিয়ে।
ৰাজ্যৰ চৰকাৰী শিক্ষা খণ্ডৰ দুৰৱস্থাৰ ছবিখন দাঙি ধৰি প্ৰাক্তন বিধায়ক সত্যব্ৰত কলিতাই কয় যে যিখন ৰাজ্যত স্বয়ং মুখ্যমন্ত্ৰীৰ নেতৃত্বত ব্যক্তিগত খণ্ডৰ বিদ্যালয় স্থাপন কৰা হয়, তাত চৰকাৰী বিদ্যালয়ৰ অৱস্থা কেতিয়াও উন্নত হ’ব নোৱাৰে। বৰ্তমান ৰাজ্যৰ চৰকাৰী বিদ্যালয়সমূহত ছাত্ৰ-ছাত্ৰীৰ অনুপাতে শিক্ষকৰ তীব্ৰ অভাৱ ঘটিছে, যাৰ বাবে বাধ্য হৈ অভিভাৱকসকলে নিজৰ সন্তানক চৰকাৰী খণ্ডৰ পৰা ব্যক্তিগত খণ্ডৰ বিদ্যালয়লৈ স্থানান্তৰ কৰিছে। চৰকাৰে ছাত্ৰ-ছাত্ৰীক সময়মতে পাঠ্যপুথি যোগান ধৰিব পৰা নাই আৰু অতি নিম্নমানৰ সস্তীয়া ইউনিফৰ্ম প্ৰদান কৰিছে বুলি অভিযোগ কৰি চিকিৎসা মহাবিদ্যালয়ৰ নামত কেৱল ডাঙৰ অট্টালিকাহে নিৰ্মাণ কৰা হৈছে কিন্তু তাত প্ৰয়োজনীয় চিকিৎসক, নাৰ্ছ বা কৰ্মচাৰী নাই বুলি তেওঁ প্ৰকাশ কৰে। আনকি মেডিকেল ব’ৰ্ডৰ পৰিদৰ্শনৰ সময়ত এখন মহাবিদ্যালয়ৰ চিকিৎসক-নাৰ্ছক অন্য এখনলৈ নি মিলাই থৈ অহাৰ দৰে ভেকোভাওনাহে চলিছে বুলি তেওঁ কয়। গুৱাহাটীত ছোনম ৱাংচুকৰ ফটো অংকন কৰাৰ অপৰাধত দুজন শিল্পীকে আটক কৰা কাৰ্যক কটাক্ষ কৰি তেওঁ কয় যে শিল্পী দুজনে ৱাংচুকৰ সলনি শিক্ষামন্ত্ৰী ধৰ্মেন্দ্ৰ প্ৰধানৰ ছবি অংকন কৰা হ’লে চৰকাৰৰ পৰা পুৰস্কৃতহে হ’লহেঁতেন। ইয়াৰ উপৰি তেওঁ গুৱাহাটী মহানগৰীৰ কৃত্ৰিম বান আৰু উৰণীয়া সেতুৰ তলৰ ৰাস্তাবোৰৰ তথৈবচ অৱস্থাক লৈও ক্ষোভ প্ৰকাশ কৰে।
সংবাদমেলখনৰ আঁত ধৰি অসম প্ৰদেশ কংগ্ৰেছৰ মিডিয়া বিভাগৰ অধ্যক্ষ বেদব্ৰত বৰাই বৰ্তমানৰ শিক্ষা ব্যৱস্থাক লৈ গভীৰ উদ্বেগ প্ৰকাশ কৰে। তেওঁ কয় যে সমগ্ৰ শিক্ষা ব্যৱস্থাটো ক্ৰমান্বয়ে বাণিজ্যিকীকৰণ হোৱাৰ বাবে শিক্ষাৰ্থীসকলৰ ওপৰত কেৱল অধিক নম্বৰ লাভ কৰাৰ এক ভয়াৱহ মানসিক বোজা জাপি দিয়া হৈছে, যাৰ ফলস্বৰূপে সাধাৰণ আৰু দৰিদ্ৰ পৰিয়ালৰ মেধাৱী শিক্ষাৰ্থীসকল চৰম বৈষম্যৰ চিকাৰ হৈছে। শিক্ষা প্ৰতিষ্ঠানসমূহত নম্বৰৰ অন্ধ প্ৰতিযোগিতাৰ পৰিৱৰ্তে শিক্ষাৰ্থীসকলৰ বাবে এক সুস্থ, সহায়ক আৰু মানসিকভাৱে সম্পূৰ্ণ সুৰক্ষিত পৰিৱেশ গঢ়ি তোলাটো অত্যন্ত জৰুৰী বুলি বৰাই মন্তব্য কৰে। লোকসভাৰ বিৰোধী দলপতি ৰাহুল গান্ধীয়ে কোটা আৰু ডেৰাডুনৰ কাৰ্যসূচীৰ সফলতাৰ পিছত ছাত্ৰো কি গুঞ্জ কাৰ্যসূচীৰ পৰৱৰ্তী অনুষ্ঠানসমূহত স্থানীয় ছাত্ৰ-ছাত্ৰী আৰু নিবনুৱা যুৱক-যুৱতীসকলৰ সৈতে বাৰ্তালাপ কৰি এখন যুৱ ইস্তাহাৰ বা ভৱিষ্যতৰ এক বিকল্প শিক্ষা-নিযুক্তি নীতিৰ খচৰা প্ৰস্তুত কৰিব বুলিও বৰাই জানিবলৈ দিয়ে।
প্ৰদেশ কংগ্ৰেছৰ তৰফৰ পৰা বৰ্তমানৰ এই পৰিস্থিতিক লৈ উদ্বেগ প্ৰকাশ কৰাৰ লগতে বিধানসভাৰ চলিত অধিৱেশনত অন্তত এটা দিনৰ বাবে হ’লেও কেৱল শিক্ষা বিষয়ক গুৰুত্বপূৰ্ণ বিষয়টো লৈ বিশদ আলোচনা কৰিবলৈ চৰকাৰক আনুষ্ঠানিকভাৱে আহ্বান জনাইছে।
