এছ আই আৰ (SIR) সন্দৰ্ভত দুয়োগৰাকী নিৰ্বাচনী আয়ুক্তৰ লিখিত আপত্তি আৰু ক্ষোভক আওকাণ কৰাৰ বিষয়টো পোহৰলৈ অহাৰ লগে লগে লোকসভাৰ বিৰোধী দলপতি ৰাহুল গান্ধীয়ে কেন্দ্ৰ আৰু মুখ্য নিৰ্বাচন আয়ুক্ত জ্ঞানেশ কুমাৰৰ বিৰুদ্ধে আক্ৰমণত সৰৱ হৈ পৰিছে।
বৃহস্পতিবাৰে ৰাজধানীত এক বিশেষ সংবাদমেল আহ্বান কৰি তেওঁ অভিযোগ কৰে যে দেশত অনৈতিকভাৱে ‘ভোট চুৰি হৈছে’, যাৰ বাবে সাংসদসকলে প্ৰস্তুত কৰা আইনসমূহৰ বৈধতাক লৈয়েই প্ৰশ্ন উত্থাপন হৈছে।
ৰাহুলে পোনপটীয়াকৈ মুখ্য নিৰ্বাচনী আয়ুক্ত জ্ঞানেশ কুমাৰক ‘দেশদ্ৰোহী’ বুলি অভিহিত কৰি তেওঁৰ পদত্যাগ দাবী কৰে। একে সময়তে তেওঁ কঠোৰ সকীয়নি দি কয় যে আমাৰ চকুৰ সন্মুখত ভাৰতীয় গণতন্ত্ৰক ‘ধ্বংস’ হোৱাটো চাই কংগ্ৰেছে অলসভাৱে বহি নাথাকে।
সংবাদমেলত ৰাহুল গান্ধীয়ে প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় গৃহমন্ত্ৰী অমিত শ্বাহে বুকু চপৰিয়াই কৰা বিভিন্ন ৰাজনৈতিক বাৰ্তাৰ কথা মনত পেলাই দি নিৰ্বাচন আয়োগৰ ভূমিকা আৰু শাসকীয় দলৰ নিৰ্বাচনী সফলতাৰ ৰসায়নক লৈ প্ৰশ্ন উত্থাপন কৰে। মোডী-শ্বাহে বিভিন্ন সময়ত দাবী কৰিছিল যে আগন্তুক ৩০ বছৰলৈ বিজেপি ক্ষমতাত থাকিব বা ২০২৪ চনৰ লোকসভা নিৰ্বাচনত এন ডি এয়ে ৪০০ আসন অতিক্ৰম কৰিব।
কংগ্ৰেছ সাংসদগৰাকীয়ে কয় যে গণতন্ত্ৰত ‘প্ৰতিষ্ঠান বিৰোধী ঢৌ’ নামৰ এক স্বাভাৱিক ৰাজনৈতিক বাস্তৱতা আছে, যিটো কম বেছি পৰিমাণে প্ৰতিখন চৰকাৰৰ বিৰুদ্ধে সৃষ্টি হয়। এই ঢৌৰ মাজতো শাসকীয় দলৰ শীৰ্ষ নেতাসকলে কেনেকৈ নিশ্চিত হ’ব পাৰে যে তেওঁলোকেই জয়ী হ’ব?
ৰাহুল গান্ধীয়ে তেওঁৰ যুক্তিৰ সমৰ্থনত প্ৰাক্তন প্ৰধানমন্ত্ৰী ইন্দিৰা গান্ধীৰ ইতিহাসৰ উল্লেখ কৰে। তেওঁ কয়, ‘’১৯৭১ চনৰ বাংলাদেশ যুদ্ধত ঐতিহাসিক বিজয়ৰ পিছত যেতিয়া ইন্দিৰা গান্ধীয়ে জনপ্ৰিয়তাৰ শীৰ্ষত আছিল, তেতিয়া তেওঁৱো দুবছৰমানৰ ভিতৰতে তীব্ৰ প্রতিষ্ঠাবিৰোধী আৱেগ আৰু জনৰোষৰ সন্মুখীন হ’বলগীয়া হৈছিল৷ কিন্তু কোনো এক ৰহস্যজনক কাৰণত প্ৰধানমন্ত্ৰী মোডী, অমিত শ্বাহ বা বিজেপিৰ ক্ষেত্ৰত সেই নিয়ম এতিয়া প্ৰযোজ্য নহয়!’’
হাৰিয়ানা, মহাৰাষ্ট্ৰ আৰু উত্তৰ প্ৰদেশৰ দৰে ৰাজ্যত শেহতীয়া ৰাজনৈতিক সমীকৰণৰ উদাহৰণ দি ৰাহুলে আৰু কয়, যোৱা ৫০ বছৰ ধৰি হাৰিয়ানাত নিয়মীয়াকৈ ক্ষমতাৰ পৰিৱৰ্তন ঘটিছে, কিন্তু হঠাৎ তাতেই প্ৰতিষ্ঠান বিৰোধী ঢৌ নাইকিয়া হৈ গ’ল!
মহাৰাষ্ট্ৰ আৰু উত্তৰ প্ৰদেশৰ দৰে ৰাজ্যতো একেই পৰিৱৰ্তন দেখা গৈছে (য’ত আগতে সমাজবাদী পাৰ্টি আৰু বহুজন সমাজ পাৰ্টিৰ মাজত ক্ষমতাৰ পৰিৱৰ্তন হৈছিল)। বিৰোধী নেতাগৰাকীৰ ভাষাত, “কাৰোবাৰ ব্যক্তিগত জনপ্ৰিয়তা বা চৰকাৰৰ কাম-কাজ আমি বুজিব পাৰো। কিন্তু ভোটগণনাৰ সময়ৰ পৰা এই প্ৰতিষ্ঠান বিৰোধী ঢৌ কেনেকৈ নাইকিয়া হৈ গৈছে – ভোট চুৰিৰ বাহিৰে ইয়াৰ আন কোনো উত্তৰ থাকিব নোৱাৰে।”
