দিল্লী প্ৰদূষণক লৈ এতিয়া প্ৰধানমন্ত্ৰী নৰেন্দ্ৰ মোদীক প্ৰশ্ন কৰিছে ৰাহুল গান্ধীয়ে। লোকসভাত বিৰোধী দলপতিগৰাকীয়ে কয় যে শিশুৱে আমাৰ চকুৰ সন্মুখত বিষাক্ত বতাহ উশাহত লৈছে।তেঁওলোক ক্ৰমান্বয়ে অসুস্থ হৈ পৰিছে। ইয়াৰ পিছতো কিয় মৌন হৈ আছে প্ৰধানমন্ত্ৰী? মন কৰিবলগীয়া যে শুকুৰবাৰে পুৱা প্ৰাক্তন আই পি এছ বিষয়া তথা বিজেপি নেতা কিৰণ বেদীয়ে কয় যে ৰাজধানীখনৰ বৰ্তমানৰ পৰিস্থিতি Covid ৰ সৈতে তুলনাযোগ্য।
দিল্লীৰ মুণ্ডকাত শুকুৰবাৰে পুৱা প্ৰদূষণৰ মাত্ৰা আছিল ৪৩৬। ৰোহিনীত ৪৩২।আনহাতে আনন্দ বিহাৰ (৪০৮) আৰু জাহাংগীৰপুৰী (৪২০)ৰ প্ৰদূষণৰ মাত্ৰাও চাৰিশৰ ওপৰত আছিল। এনে পৰিস্থিতিত ৰাহুলে দিল্লীত কেইবাগৰাকীও মহিলাক লগ পায়। সেই বৈঠকৰ ভিডিঅ’ পোষ্ট কৰি কংগ্ৰেছৰ সাংসদগৰাকীয়ে কয়, ‘মই কথা পতা সকলো মাতৃৰ বক্তব্য একেই, তেওঁলোকৰ সন্তান বিষাক্ত বতাহ লৈ ডাঙৰ হৈছে। মোদীজী, ভাৰতৰ সন্তান আমাৰ চকুৰ সন্মুখতে মৃত্যুমুখত পৰিছে।আপুনি এতিয়াও কিয় নিমাত হৈ আছে? আপোনাৰ চৰকাৰে কিয় দায়িত্ব লোৱা নাই? কিয় ই সমস্যাটো সোনকালে সমাধান কৰিবলৈ চেষ্টা নকৰে?’ ৰাহুলে স্পষ্টকৈ উল্লেখ কৰিছে যে ভাৰতৰ শিশুসকল বিশুদ্ধ বায়ুৰ যোগ্য।
মন কৰিবলগীয়া যে দিল্লীৰ প্ৰদূষণত প্ৰধানমন্ত্ৰীৰ হস্তক্ষেপৰো দাবী জনাইছে বিজেপি নেতা কিৰণ বেদীয়ে। বেদীয়ে নিজৰ এক্স হেণ্ডেলত লিখিছিল, ‘এইটো বেদনাদায়ক। আৰু হতাশাজনক। ছাৰ, হস্তক্ষেপ কৰক।’ লগতে কয়, “পৰিস্থিতি Covid ৰ দৰে। মই নিজেই দেখিছো যে প্ৰধানমন্ত্ৰী মোদীয়ে সেই সময়ত কেনেকৈ নেতৃত্ব দিছিল, দেশক একত্ৰিত কৰি ৰাখিছিল। এই পৰিস্থিতি চম্ভালিবলৈ তেওঁৰ দৰে যোগ্য কোনো নাই। যদি তেওঁ পোনপটীয়াকৈ হস্তক্ষেপ নকৰে, তেন্তে মই বিচাৰিম অন্ততঃ দুই এজন মন্ত্ৰীক আয়োগলৈ অনা হওক। কাৰণ এই সমস্যা বহু ৰাজ্যলৈ বিয়পি পৰিছে আৰু জনস্বাস্থ্য বিপন্ন কৰি তুলিছে।”
প্ৰসংগক্ৰমে দীপাৱলীৰ পৰা দিল্লীৰ বতাহ বিষাক্ত হৈ পৰিছে। সেইবাবেই দিল্লী চৰকাৰে ‘ক্লাউড ছিডিং’ৰ ব্যৱস্থা কৰিছে। শেহতীয়াকৈ ইয়াৰ পৰীক্ষাও কৰা হৈছিল। কিন্তু আগতে কেতিয়াও নোপোৱাকৈ বৰষুণ দিলে। অৱশ্যে তিনিটা বিফল পৰীক্ষাত ইতিমধ্যে প্ৰায় ১.০৭ কোটি টকা ব্যয় কৰা হৈছে। কিন্তু কোনো লাভ হোৱা নাই। ইয়াৰ বিপৰীতে প্ৰদূষণ দিনক দিনে বাঢ়িছেহে।
