অন্ধবিশ্বাসৰ বিৰুদ্ধে সংগ্ৰাম : ড০ বীৰুবালা ৰাভাক শুভেচ্ছামূলক পত্ৰ কংগ্ৰেছ সভাপতি ৰাহুল গান্ধীৰ
ডাইনী হত্যা ৰোধৰ জৰিয়তে সমাজৰ পৰা কু সংস্কাৰ তথা অন্ধবিশ্বাস আঁতৰোৱাৰ উদ্দেশ্যেৰে চলাই থকা সংগ্ৰামৰ বাবে বিশিষ্ট সমাজকৰ্মী ড০ বীৰুবালা ৰাভাক ভাৰতীয় জাতীয় কংগ্ৰেছ দলৰ সভাপতি ৰাহুল গান্ধীয়ে শুভেচ্ছা প্ৰদান কৰিছে। ‘উইমেন ৱ’ৰ্ল্ড ছামিট ফাউণ্ডেশ্যনে’ মান্যতা প্ৰদান কৰা সমাজকৰ্মীগৰাকীৰ কাম-কাজত আপ্লুত হৈয়ে কংগ্ৰেছ সভাপতিগৰাকীয়ে শুভেচ্ছামূলক পত্ৰ প্ৰেৰণ কৰা বুলি জানিব পৰা যায়।
যোৱা ১৯ নৱেম্বৰতে কংগ্ৰেছৰ সভাপতি ৰাহুল গান্ধীয়ে প্ৰেৰণ কৰা শুভেচ্ছামূলক বাৰ্তাত সমাজকৰ্মী ৰাভাৰ বিষয়ে কয়, ‘সমাজত বিয়পি থকা অন্ধবিশ্বাস আৰু কু সংস্কাৰৰ বিৰুদ্ধে যুঁজ দিবলৈ সাহসৰ প্ৰয়োজন। ইয়াৰ বিৰুদ্ধে যুঁজিবলৈ যাওতে বিভিন্ন সময়ত সমাজত বিৰোধীতা হয়, ভয় দেখুওৱা হয় কিন্তু তাৰ মাজতো আপুনি দৃঢ়তাৰে যুঁজি গৈছিল’।
ইয়াৰ উপৰি গান্ধীয়ে আৰু কয়, ‘সমাজৰ পৰা কু সংস্কাৰ আঁতৰোৱাৰ বাবে চলাই থকা সংগ্ৰামৰ বাবে আপোনাক মই চালাম জনাইছো। আশা কৰো এখন সুস্থ মানৱ সমাজ গঢ়াৰ ক্ষেত্ৰত আপোনাৰ কৰ্মৰাজীয়ে অইন লোকক তথা যুৱ প্ৰজন্মৰ মহিলাসকলক উৎসাহ তথা অনুপ্ৰেৰণা যোগাব’।
ৰাহুল গান্ধীয়ে প্ৰেৰণ কৰা শুভেচ্ছামূলক বাৰ্তা প্ৰদান কৰাৰ উদ্দেশ্যেৰে সোমবাৰে ‘মিশ্যন বীৰুবালা ৰাভা’ৰ জৰিয়তে সমাজৰ কু-সংস্কাৰ, অন্ধবিশ্বাস আৰু ডাইনী হত্যাৰ বিৰুদ্ধে অবিৰত সংগ্ৰাম চলাই সমাজৰ প্ৰতি উল্লেখযোগ্য অৱদান আগবঢ়োৱা ড০ বীৰুবালা ৰাভাৰ গোৱালপাৰা জিলাৰ আগিয়াৰ নিজ ঘৰত অসম প্ৰদেশ কংগ্ৰেছৰ এটা প্ৰতিনিধি দল উপস্থিত হয়।
অসম প্ৰদেশ কংগ্ৰেছৰ সম্পাদিকা ববিতা শৰ্মাৰ নেতৃত্বত যোৱা প্ৰতিনিধি দলটোৱে ৰাহুল গান্ধীৰ হৈ সোমবাৰে দুপৰীয়া সমাজকৰ্মীগৰাকীক এখন ফুলাম দখনা আৰু মানপত্ৰৰে সম্বৰ্ধনা জনায়।
ইয়াৰ পূৰ্বে গোৱালপাৰা জিলা কংগ্ৰেছৰ হৈ পশ্চিম গোৱালপাৰাৰ বিধায়ক আব্দুৰ ৰছিদ মণ্ডলেও এখন ফুলাম গামোছা আৰু জাপিৰে তেওঁক সম্বৰ্ধনা জনায়। এই অনুষ্ঠানত মিশ্যন বীৰুবালা ৰাভাৰ কেইবাজনো কৰ্মকৰ্তা উপস্থিত থাকে।
আনহাতে ৬৯ বছৰীয়া ড০ বীৰুবালা ৰাভাই কংগ্ৰেছ সভাপতি ৰাহুল গান্ধীৰ লগতে অসম প্ৰদেশ কংগ্ৰেছৰ প্ৰতিনিধি দলটোক বিশেষভাৱে ধন্যবাদ জ্ঞাপন কৰে।