মন্ত্রী জয়ন্ত মল্ল বৰুৱাই তেওঁৰ এখন সংবাদ মেললৈ বাতৰি পৰিৱেশনৰ বাবে নিমন্ত্ৰণ কৰি এগৰাকী কৰ্তব্যৰত সাংবাদিকক ৰাজহুৱাকৈ ‘তলৰ শ্ৰেণী’ৰ সাংবাদিক বুলি মন্তব্য কৰাটো অতি দুখঃজনক, আৰু গণতান্ত্রিক প্ৰমূল্যবোধৰ ওপৰত কৰা এক চৰম আঘাত বুলি বিবেচনা কৰিছে ৰাইজৰ দলে।
সংবাদ মাধ্যমলৈ প্ৰেৰণ কৰা এক বিবৃতিত ৰাইজৰ দলৰ সভাপতি অখিল গগৈয়ে এজন চৰকাৰী দায়িত্বশীল মন্ত্ৰীৰ এনে অপমানজনক মন্তব্য কেতিয়াও গ্রহণযোগ্য নহয় বুলি মন্তব্য কৰে। বিজেপি চৰকাৰৰ দিনত সংঘটিত অনিয়মৰ কথা উদঙাই দিলেই সাংবাদিকক ৰঙা চকু দেখুৱাই দমন কৰাৰ যি স্থিতি একাংশ বিজেপিৰ নেতাই গ্রহণ কৰি আহিছে, সেয়া বাক্ স্বাধীনতাৰ বাবে অতি ভয়াবহ হৈ পৰিছে।
প্ৰেছ বিজ্ঞপ্তিযোগে ৰাইজৰ দলে কয় যে এনেকৈ তাচ্ছিল্যমুখৰ হোৱাৰ ক্ষেত্ৰত স্বয়ং মুখ্যমন্ত্ৰীৰ পৰাই অনুপ্রাণিত হৈছে অনুজ মন্ত্রী-বিধায়ক। সাহসী, সততা ভৰা সাংবাদিকতাক বাৰে বাৰে কৰা চৰম অপমান অক্ষমণীয়। পূর্বে মুখ্যমন্ত্রী, পৰৱৰ্তী সময়ত মন্ত্রী পীযূষ হাজৰিকা আৰু এইবাৰ মন্ত্রী জয়ন্ত মল্ল বৰুৱাই সমালোচনা সহ্য কৰিব নোৱাৰি সাংবাদিকৰ প্ৰতি যি আচৰণ দেখুৱালে, সেয়া তেওঁৰ দায়িত্বজ্ঞানহীন আৰু অহংকাৰী মনোভাৱক প্রতিফলিত কৰে। সংবাদ মাধ্যম গণতন্ত্ৰৰ চতুর্থ স্তম্ভ। সাংবাদিকসকলে জনস্বার্থত কিবা প্রশ্ন কৰিলে, তাৰ ওপৰত প্রতিশোধ লোৱাৰ মনোভাব বা যি অশোভনীয় আচৰণ, সেয়া জনপ্রতিনিধি সকলৰ পৰা কেতিয়াও আশা কৰা নাযায়। ইমান নিম্নস্তবৰ ৰাজনীতি অসমৰ ৰাইজে কেতিয়াও নিবিচাৰে। এখন গণতান্ত্রিক সমাজত মতামত আৰু সমালোচনাৰ স্থান থাকে, দম্ভ আৰু অপমানৰ নহয়।
ৰাইজৰ দলে এই অনাকাংক্ষিত আচৰণৰ বাবে মন্ত্ৰী জয়ন্ত মল্ল বৰুৱাক অতি শীঘ্ৰে সাংবাদিকজনৰ লগতে অসমৰ ৰাইজৰ ওচৰত ৰাজহুৱা ক্ষমা খুজিবলৈ দাবী জনাইছে। ৰাজনৈতিক ক্ষমতাৰ খকত বলীয়ান হৈ সাংবাদিকক বাৰে বাৰে অপমান আৰু তাৰপাছত ক্ষমা বিচাৰিলেও প্রকৃতাৰ্থত যদিহে এনেবোৰ ক্ষমতাত মত্ত নেতাই আত্মমন্থন বা অনুশোচনা নকৰে, তেন্তে ভবিষ্যতে সাংবাদিকসকলৰ সুৰক্ষাৰ প্রতি অধিক ভাবুকি নামি আহিব। এইক্ষেত্ৰত সকলো সাংবাদিক-সংবাদকর্মীক একত্রিত হৈ যুঁজ দিয়াৰো আহ্বান জনাইছে ৰাইজৰ দলে।
