নিযুক্তিৰ নামত বিজেপিৰ নেতা পালিনেতাই যে ব্যাপক ধনৰ লেন দেনত লিপ্ত হৈছিল, সেইয়া এতিয়া দিনৰ পোহৰৰ দৰেই স্বচ্ছ হৈ পৰিছে বুলি অভিহিত কৰিছে ৰাইজৰ দলৰ সভাপতি অখিল গগৈয়ে। তেখেতে কয় এটা বিতৰ্কিত আত্মহত্যাৰ ঘটনাৰ পিছতেই সমগ্ৰ কেলেংকাৰী পোহৰলৈ অহাত গ্ৰেপ্তাৰ হৈছে বিজেপি কিষাণ মৰ্চাৰ ৰাজ্যিক কাৰ্যানিবাহক অনুৰাগ চলিহা, বিজেপি নেতা দ্বিবন ডেকা, তৃষ্ণা শৰ্মা, নলবাৰী জিলাৰ বিজেপি নেতা অসীম চক্ৰৱৰ্তী, ৰেখান্ত দাস আৰু পলাতক হৈ আছে অভিমন্যু দাস, নিপন ভৰালী।
অনুৰাগ চলিহাৰ স্বীকাৰোক্তি অনুসৰি প্রতিটো চাকৰিৰ বাবদ আঢ়ৈ লাখকৈ টকা দিয়া হৈছে ওপৰ মহলক আৰু তেওঁৰ মতে AIIDC ৰ অধ্যক্ষ শান্তনু পূজাৰী জড়িত এই ‘কেচ ফৰ জব স্কেম’ ত। শান্তনু পূজাৰী হ’ল AIIDC ৰ অধ্যক্ষ আৰু ৰাজ্যিক বিজেপিৰ অফিচ ইনচাৰ্জ। লগতে তেওঁ অসম ফুটবল সংস্থাৰো উপ-সভাপতি।
ইন্দ্ৰাণীৰ মৃত্যুৰ ঘটনাৰ ২ দিন পূৰ্বেও শান্তনু পূজাৰীৰ সৈতে যোৰহাটত বাহৰ পাতি আছিল দ্বিবন ডেকাই। যি কথা ইতিমধ্যে মৃত্যুৰ পূৰ্বে ইন্দ্ৰাণী আৰু দ্বিবন ডেকাৰে হোৱা টেলিফোনিক বাৰ্তালাপত স্পষ্ট হৈ পৰিছে। শান্তনু পূজাৰীৰ জৰিয়তে দ্বিবন ডেকাই একাংশ চাকৰি প্রত্যাশীৰ পৰা ধন সংগ্ৰহ কৰাৰ ইতিমধ্যেই অভিযোগ উঠিছে।
পূৰ্বেও ধনৰ বিনিময়ত ৰাজ্যৰ পিএনআৰডি বিভাগত চাকৰি দিয়াৰ অভিযোগ উঠিছিল শান্তনু পূজাৰী আৰু দ্বিবন ডেকাৰ বিৰুদ্ধে ৷ সেই সময়ত যোৰহাটৰ এখন বহু বিতৰ্কিত ধাৱাত বহি চাকৰিৰ ক’লা বজাৰ মেলাৰ কথা উল্লেখ কৰে ৰাইজৰ দলৰ সভাপতি গৰাকীয়ে ৷
ধাৱাখনৰ স্বত্বাধিকাৰীৰ পত্নীকো বৃহৎ ধনৰ বিনিময়ত চাকৰি দিয়া বুলি ইতিমধ্যেই অভিযোগ উঠিছে। আনহাতে যোৰহাটৰ এগৰাকী যুৱ ব্যৱসায়ীৰ পত্নীকো ধনৰ বিনিময়ত চাকৰি প্রদানৰ উঠিছে চাঞ্চল্যকৰ অভিযোগ।
যোৰহাটৰ আন এগৰাকী প্ৰতিষ্ঠিত ব্যৱসায়ীৰ কন্যাক অসম আৰক্ষীত চাকৰি দিয়াৰ নামতো শান্তনু-দ্বিবন চক্ৰই লৈছিল বৃহৎ ৮ লাখ টকাৰ অগ্ৰিম ধন বুলি অভিযোগ উঠিছে। APSC ত চাকৰি দিয়াৰ নামতো দ্বিবন ডেকাই ৰাজ্যৰ একাংশ চৰকাৰী চাকৰি প্রত্যাশীৰ পৰা ধন সংগ্ৰহ কৰাৰ তথ্য পোহৰলৈ আহিছে। ৩ গৰাকী প্রাৰ্থীৰ পৰা ৩০ লাখ টকা লোৱাৰ অভিযোগ উঠিছে গেঙটোৰ বিৰুদ্ধে।
অন্যহাতে বাতৰিত প্রকাশ পোৱা মতে অভিমন্যু দাস আৰু অনুৰাগ চলিহাৰ বাসগৃহৰ পৰা আৰক্ষীয়ে উদ্ধাৰ কৰিছিল শতাধিক এডমিট কাৰ্ড আৰু নথি পত্ৰ । নলবাৰীৰ অসীম চক্ৰৱৰ্তীৰ বাসগৃহত মহানগৰ আৰক্ষীয়ে জব্দ কৰিছে কিষাণ মৰ্চাৰ সম্পাদক হেমন্ত দাসৰ কন্যাৰ চাকৰিৰ এপ্রিমেণ্টৰ কপি।
বিজেপিৰ যুৱ মৰ্চাৰ এগৰাকী সদস্যা সান্তনা ডেকাই চানমাৰি থানাত এজাহাৰ দাখিল কৰিছে। কেৱল শান্তনাৰ পৰাই বিজেপিৰ দালাল চক্ৰই সংগ্ৰহ কৰিছে ১৩ লাখ টকা। শান্তনাৰ লগতে একেই নিশা তিনিখন এজাহাৰ দাখিল কৰা হয় চানমাৰি থানাত । হৰেশ্বৰ কলিতা নামৰ এজন ব্যক্তিয়েও দিয়ে এজাহাৰ।
প্রকাশিত খবৰ অনুসৰি -বৰপেটাৰ ১৩গৰাকী, গুৱাহাটীৰ ১৯ গৰাকী, নগাওঁৰ ৮ গৰাকী, বাইহাটা চাৰিআলিৰ ৩ গৰাকী,লখিমপুৰ-নলবাৰীৰ ১গৰাকীকৈ মুঠ ৫৫ গৰাকী প্ৰাৰ্থীৰ পৰা ধন লোৱাৰ তথ্য লাভ কৰিছে আৰক্ষীয়ে।
ৰাজ্যিক সভাপতি ভৱেশ কলিতাৰ নাম উচ্চাৰণ হৈছে ধন বিচৰা কেইবাটাও ভাইৰেল অডিঅ’ত। প্রাক্তন সভাপতি সিদ্ধাৰ্থ ভট্টাচাৰ্যৰ বিজেপিৰ সভাপতি ভৱেশ কলিতালৈ প্ৰেৰণ কৰা বিস্ফোৰক পত্ৰত অভিযোগ – দলৰ কৰ্মীয়ে চাকৰিৰ নামত অবাধে সংগ্ৰহ কৰিছে ধন। তাৰোপৰি বদলি কৰা হ’ল তদন্তৰ দায়িত্বত থকা মধ্য মণ্ডলৰ ডিচিপি অক্ষৎ গাৰ্গ কো সেয়েহে ভৱেশ কলিতা, শান্তনু পূজাৰীকো তদন্তৰ আওতালৈ অনাৰ দাবী জনাইছে ৰাইজৰ দলে। লগতে এই নিযুক্তি কেলেংকাৰী সন্দৰ্ভত চি.বি.আই তদন্ত দাবী কৰিছে ৰাইজৰ দলে।
