২০২৬ চনৰ বিধানসভা নিৰ্বাচনৰ পূৰ্বে অসমৰ বিৰোধী ৰাজনীতিত এক ডাঙৰ অঘটন । ৰাইজৰ দলে আনুষ্ঠানিকভাৱে প্ৰদেশ কংগ্ৰেছৰ সৈতে মিত্ৰতাৰ সম্ভাৱনা সমাপ্ত কৰা বুলি ঘোষণা কৰিছে। এক প্ৰেছ বিজ্ঞপ্তিযোগে ৰাইজৰ দলৰ তৰফৰ পৰা এই কথা প্ৰকাশ কৰা হৈছে। দলটোৱে অভিযোগ কৰা অনুসৰি, বিগত ৬ মাৰ্চত অনুষ্ঠিত হোৱা বিৰোধী দলসমূহৰ বৈঠকত কংগ্ৰেছৰ আচৰণ অত্যন্ত অসন্মানজনক আছিল আৰু ইয়াৰ জৰিয়তে তেওঁলোকে ৰাইজৰ দলক মিত্ৰতাৰ পৰা আঁতৰাই পঠিয়ালে।
ৰাইজৰ দলৰ মতে, কংগ্ৰেছৰ সভাপতি গৌৰৱ গগৈৰ অহংকাৰী মনোভাৱ আৰু তেওঁলোকৰ সৈতে কৰা অসৌজন্যমূলক আচৰণেই মিত্ৰতা ভংগৰ প্ৰধান কাৰণ। দলটোৱে জনোৱা মতে, তেওঁলোকে বিজেপি-আৰএছএছৰ দৰে শক্তিৰ বিৰুদ্ধে একত্ৰিত হৈ যুঁজিবলৈ মিত্ৰতাৰ প্ৰস্তাৱ দিছিল যদিও কংগ্ৰেছে নিজৰ স্বাৰ্থক অগ্ৰাধিকাৰ দি আহিছে। আসন ভাগ-বটোৱাৰাৰ ক্ষেত্ৰত ৰাইজৰ দলে পূৰ্বতে ২৭ খন আসনৰ দাবী জনাইছিল যদিও মিত্ৰতাৰ খাতিৰত সেই সংখ্যা বহু হ্ৰাস কৰি শেষত মাত্ৰ ১৫ খনলৈ নমাই আনিছিল। কিন্তু কংগ্ৰেছে সেই প্ৰস্তাৱক গুৰুত্ব নিদি বিভিন্ন চৰ্ত জাপি দিয়াৰ লগতে প্ৰাৰ্থী তালিকাত একপক্ষীয় সিদ্ধান্ত লোৱা বুলি ৰাইজৰ দলে অভিযোগ কৰিছে।
বিশেষকৈ নগাঁও জিলাৰ ধিং বিধানসভা সমষ্টিটোক লৈ হোৱা মতানৈক্যই মিত্ৰতা ভংগৰ চৰম পৰ্যায়ত উপনীত হয়। ৰাইজৰ দলৰ অভিযোগ যে তেওঁলোকৰ সাংগঠনিক ভেটি থকা এই সমষ্টিটো এৰি দিবলৈ অস্বীকাৰ কৰি কংগ্ৰেছে ইচ্ছাকৃতভাৱে মিত্ৰতা ভংগ কৰিছে। ইয়াৰ উপৰি ২০২১ চনৰ নিৰ্বাচনতো কংগ্ৰেছে বিশ্বাসঘাটকতা কৰা বুলি দলটোৱে স্মৰণ কৰাই দিছে। তেওঁলোকৰ মতে, মিত্ৰতাৰ বাবে কেৱল ৰাইজৰ দলেই ত্যাগ কৰিব লগা হৈছে, যিটো কোনো ধৰণেই গ্ৰহণযোগ্য নহয়।
ৰাইজৰ দলৰ মতে, কংগ্ৰেছৰ প্ৰদেশ নেতৃত্ব মিত্ৰতাৰ প্ৰতি অলপো আন্তৰিক নাছিল আৰু সঘনে সলনি কৰা আলোচনাকাৰী সমিতিয়েই তাৰ প্ৰমাণ। দলটোৱে স্পষ্ট কৰি দিছে যে তেওঁলোকে ফেচিষ্ট শক্তিক পৰাস্ত কৰিবলৈ বিচাৰিছিল যদিও কংগ্ৰেছে তেওঁলোকক আত্মসমৰ্পণ কৰিবলৈ বাধ্য কৰিব বিচাৰিছিল, যিটো তেওঁলোকে কোনো কাৰণতে মানি নলয়। ফলস্বৰূপে, কংগ্ৰেছৰ পৰা কোনো ধৰণৰ সঁহাৰি নোপোৱাৰ পাছত ৰাইজৰ দলে এই মিত্ৰতাৰ আলোচনা আগবঢ়াই নিয়াটো অসম্ভৱ বুলি সিদ্ধান্ত লৈছে।
