অসমীয়া জাতিৰ আধাৰ নিৰ্মাণৰ বাবে যি বাজেট প্রস্তুত কৰিব লাগিছিল, অসম চৰকাৰৰ শেষৰখন পূৰ্ণাংগ বাজেটত ৰাজ্য চৰকাৰে সেয়া প্রতিফলিত কৰাত ব্যর্থ হল। হিমন্ত বিশ্ব শর্মা নেতৃত্বাধীন অসম চৰকাৰৰ শেষৰখন পূর্ণাংগ বাজেটখন এখন আনৰ পিঠাৰে বিহু পতা বাজেটৰ বাহিৰে অন্য একো নহয় বুলি প্রতিক্রিয়া ব্যক্ত কৰিছে ৰাইজৰ দলে। আনকি, পূর্বে দিয়া প্রতিশ্রুতিসমূহ পূৰণ কৰাৰ নিমিত্তে অসম বাজেট ২০২৪-২৫ত কোনো ধৰণৰ বিশেষ সিদ্ধান্ত দেখা পোৱা নগ’ল বুলি প্রতিক্রিয়া ব্যক্ত কৰিছে ৰাইজৰ দলে।
ৰাইজৰ দলে প্ৰেছ বিজ্ঞপ্তিযোগে কয় যে, যিসময়ত অসমৰ নিবনুৱা সমস্যা দূৰীকৰণৰ বাবে বিশেষ ব্যবস্থা গ্রহণ কৰিব লাগিছিল, সেইধৰণে কোনো পদক্ষেপ লোৱাৰ পৰিকল্পনা দেখা পোৱা নগ’ল। অসম চৰকাৰে পূৰ্বে প্ৰতিবছৰে ১ লাখকৈ নিযুক্তি দিয়াৰ কথা কৈছিল যদিও সোমবাৰে বিধানসভাত দিয়া তথ্য মতে জানুৱাৰী ২০২৫ লৈকে চৰকাৰী চাকৰি দিছে ১,১৯,৮৯৯ টা। এই কথাই দেখদেখকৈ প্ৰমাণ কৰে বিজেপি চৰকাৰৰ মিথ্যাচাৰিতা আৰু অসমৰ নিবনুৱাসকলক কৰা প্ৰৱঞ্চনা। কেৱল মাত্র ভোটবেংকৰ স্বাৰ্থত অৰুণোদয়ৰ লগতে অন্যান্য আঁচনিৰে কেইটামান টকা দি ৰাইজৰ মন ভুলাই আগন্তুক নির্বাচনত জয়ী হোৱাৰ কৌশলেই এই বাজেটত পৰিস্ফুত হৈছে। অর্থাৎ অসমীয়া মানুহক কর্মমুখী কৰি তোলাৰ বিপৰীতে এলেহুৱা কৰিবলৈ তথা অধিক অ-পেছাদাৰী কৰিবলৈ বাজেটত বিভিন্ন লোভনীয় আঁচনি ঘোষণা কৰা হৈছে বুলি উল্লেখ কৰিছে ৰাইজৰ দলে। কিন্তু তাতো বিফল হৈছে অসম চৰকাৰ।
বিজেপিয়ে দিয়া নির্বাচনী প্রতিশ্রুতি অনুযায়ী অৰুণোদয় আঁচনিৰ হিতাধিকাৰীক মাহে ৩০০০ টকাকৈ দিয়াতো চূড়ান্ত ভাবে ব্যর্থ হৈছে ৰাজ্য চৰকাৰ। চলিত চৰকাৰৰ কাৰ্যকাল আৰু মাত্ৰ এটা বছৰ আছে। তেনে প্রেক্ষাপটত চাহ শ্ৰমিকসকলৰ দৈনিক মজুৰি নূন্যতম ৩৫০ টকাৰ যি দাবী আছিল, সেই দাবী পূৰণত আজিও কৰিব নোৱাৰিলে। বিপৰীতে, অসম চৰকাৰে শেষৰখন বাজেটত চাহ শ্ৰমিকৰ নূন্যতম দৈনিক মজুৰি ৩৫০ টকালৈ বৃদ্ধি কৰা সম্পর্কে কোনো গুৰুত্বই আৰোপ নকৰিলে ৰাজ্য চৰকাৰে। ইফালে এখনৰ পাছত সিখনকৈ চিকিৎসা মহাবিদ্যালয়, অভিযান্ত্রিক মহাবিদ্যালয় নিৰ্মাণ কৰাৰ কথা ঘোষণা কৰি আহিছে অসম চৰকাৰে। কিন্তু সংখ্যা বাঢ়িলেও আন্তঃগার্থনিৰ অভাৱ। বহুকেইখন এনে শৈক্ষিক প্রতিষ্ঠানত অংশকালীন প্ৰৱক্তা, কৰ্মচাৰী আদিৰে কাম চলাই আছে।
সেই সন্দর্ভতো এই বাজেটত সঠিক আৰু স্পষ্ট পৰিকল্পনা দেখা পোৱা নগ’ল বুলি উল্লেখ কৰিছে ৰাইজৰ দলে। ৰাইজৰ দলৰ সভাপতি অখিল গগৈয়ে কয় যে, অসমৰ প্ৰকৃত উন্নয়ন কৰিবলৈ হ’লে জলসিঞ্চন ব্যবস্থাকে আদি কৰি বানপানী নিয়ন্ত্রণ, কৃষিখণ্ডৰ ব্যৱস্থাপনা, মাটি বিতৰণ সম্পৰ্কত চৰকাৰে গুৰুত্ব আৰোপ কৰিব লাগিব। তেওঁ কয় যে এই বাজেটমতে ৰাজ্য চৰকাৰে দিবলগীয়া পুঁজিতকৈ ধাৰ আৰু কেন্দ্ৰীয় চৰকাৰৰ পৰাহে অধিকাংশ ধন লাভ কৰিব অসমে। ২০২৪-২৫ বাজেটখনত অসম চৰকাৰে ব্যয় ধাৰ্য কৰিছে ১,৫৫,৯৮৫.১৪ কোটি টকা। তেওঁ বিশ্লেষণ দাঙি ধৰি কয় যে ব্যয়ৰ প্ৰতি ১০০ টকাৰ ভিতৰত কেন্দ্ৰীয় কৰৰ পৰা আহিব ২৮.৬৩ টকা, কেন্দ্রীয় চৰকাৰৰ পৃষ্ঠপোষকতাত থকা আঁচনিৰ পৰা আহিব ১৫.৯৩ টকা, বিত্তীয় কমিশ্যনৰ গ্ৰাণ্টৰ পৰা ২.৮৮ টকা, কেন্দ্ৰৰ অন্যান্য আঁচনিৰ পৰা ২০ পইচা আৰু ধাৰৰ পুঁজিৰ পৰা আহিব ২৩.২৮ টকা। অর্থাৎ ১০০ টকাৰ ভিতৰত ৭০.৯২ টকায়েই আহিব ধাৰ আৰু কেন্দ্ৰীয় চৰকাৰৰ পৰা।
বাকী ২৯.০৮ টকা আহিব ৰাজ্য চৰকাৰৰ পৰা আহিব। এয়াই অসম চৰকাৰৰ শেষৰখন পূর্ণাংগ বাজেটৰ প্ৰকৃত অৱস্থা বুলি উল্লেখ কৰে অখিল গগৈয়ে। লগতে তেওঁ কয় যে অসম চৰকাৰৰ শেষৰ খন পূৰ্ণাংগ বাজেটত সৰু-সুৰা কেইটামান ঘোষণা কৰিলেও প্রকৃততে কৃষকসকলৰ বাবে নিৰ্বাচনী টোপ দিয়াৰ বাদে একো নাই। ৰাইজৰ দলৰ সভাপতিগৰাকীয়ে কয় যে অসমীয়া হাতৰ পৰা ব্যৱসায় এতিয়া পুঁজিপতি বা ধৰ্ণাঢ্য ব্যক্তিৰ হাতলৈ গৈছে। কিন্তু নিবনুৱা মুক্ত সমাজ এখন গঢ়িবলৈ গাঁৱে প্রতি উদ্যোগ নিৰ্মাণত ৰাজ্য চৰকাৰে গুৰুত্ব আৰোপ নকৰিলে এই বাজেটত। ‘বজাৰ আমাৰ, ব্যৱসায় আমাৰ’ নহলে অসমৰ প্ৰকৃত উন্নয়ন কেতিয়াও সম্ভৱ নহয় বুলি মন্তব্য কৰে শিৱসাগৰৰ বিধায়কগৰাকীয়ে।
