কোভিড মহামাৰী নিয়ন্ত্ৰণত তথা ভেকচিন প্ৰদানৰ ক্ষেত্ৰত চুড়ান্ত ব্যৰ্থ বিজেপি চৰকাৰ। এই গুৰুতৰ অভিযোগ ৰাইজৰ দলৰ।
দেওবাৰে ৰাইজৰ দলৰ গুৱাহাটীস্থিত কাৰ্যালয়ত এক সংবাদমেলত কোভিড পৰিস্থিতি নিয়ন্ত্ৰণত চুড়ান্ত ব্যৰ্থ হোৱা বুলি গুৰুতৰ অভিযোগ তোলে ৰাইজৰ দলে। ৰাইজৰ দলৰ কাৰ্য্যকৰী সভাপতি ভাস্ক’ডি শইকীয়াই সম্বোধন কৰা এই সংবাদমেলত তথ্য দাঙি ধৰি হিমন্ত বিশ্ব শৰ্মা নেতৃত্বাধীন বিজেপি চৰকাৰৰ বিৰুদ্ধে গুৰুতৰ অভিযোগ উত্থাপন কৰে।
চৰকাৰৰ স্বাস্থ্য আৰু পৰিয়াল কল্যাণ মন্ত্ৰণালয়ৰ বিস্ফোৰক তথ্য ‘কোভিডৰ ভেকচিন প্ৰদানত অসমৰ স্থান নিম্নগামী অৰ্থাৎ ভেকচিন প্ৰদানৰ ক্ষেত্ৰত শেষৰ ফালৰ পৰা পঞ্চম স্থানত অসম থকা বুলি উল্লেখ কৰে শইকীয়াই।
তেওঁ দাঙি ধৰা তথ্য অনুসৰি অসমত মুঠ ১১.৩১ শতাংশ লোকেহে লাভ কৰিছে ভেকচিনৰ দুয়োটা পালি।
অসমৰ তুলনাত ভাৰতৰ অন্য ৰাজ্যত বেছি শতাংশ লোকে ভেকচিন লাভ কৰা বুলি দাবী ৰাইজৰ দলৰ।
উক্ত সংবাদমেলৰ জৰিয়তে ৰাইজৰ দলৰ দাবী ‘কেন্দ্ৰীয় চৰকাৰে অসমক পৰ্যাপ্ত পৰিমাণৰ ভেকচিন প্ৰদান কৰক। কেৱল ভেকচিন প্ৰদান চেন্টাৰত নহয় ঘৰে ঘৰে গৈ ভেকচিন প্ৰদানৰ ব্যৱস্থা কৰক।‘
ইপিনে, উক্ত সংবাদমেলৰ জৰিয়তে ৰাইজৰ দলে কোভিড মহামাৰীত ক্ষতিগ্ৰস্থ প্ৰতিজনকে ক্ষতিপূৰণ দিয়াৰ দাবী তোলে। ৰাজ্যৰ জিডিপিৰ এক শতাংশ ক্ষতিগ্ৰস্তক ক্ষতিপূৰণৰ বাবে দাবী জনোৱাৰ লগতে কৰ্ম সংস্থাপন হেৰুওৱাসকলক ‘তিনি মাহৰ বাবে ৫০০০ টকাকৈ আৰু দৰিদ্ৰ সীমাৰেখাৰ তলৰ লোকক ৩০০০ টকাকৈ সাহায্য প্ৰদানৰো দাবী ৰাইজৰ দলৰ।
ইয়াৰোপৰি গাড়ীৰ মালিকসকলৰ মাহেকীয়া কিস্তি ৰেহাই দিবলৈও আহ্বান ৰাইজৰ দলৰ।
এনেদৰেই আজিৰ সংবাদমেলৰ জৰিয়তে ৰাজ্য চৰকাৰৰ ওচৰত সকলোকে ভেকচিন প্ৰদানকে ধৰি বহুকেইটা গুৰুত্বপূৰ্ণ দাবী তোলে ৰাইজৰ দলে। তাৰোপৰি, ক্ষতিগ্ৰস্ত অৰ্থনীতিৰ পুনৰুদ্ধাৰৰ বাবে এখন বিশেষজ্ঞ সমিতি গঠনৰো দাবী তোলে ৰাইজৰ দলে।
