ভাৰতীয় ৰে’ল মন্ত্ৰালয়ে যাত্ৰীবাহী ৰে’লৰ ভাড়া বৃদ্ধিৰ সন্দৰ্ভত এক গুৰুত্বপূৰ্ণ ঘোষণা কৰিছে যাৰ ফলত আজি অৰ্থাৎ ২৬ ডিচেম্বৰৰ পৰা টিকটৰ মূল্য বৃদ্ধি পালে। বৃহস্পতিবাৰে ২৫ ডিচেম্বৰত মন্ত্ৰালয়ে জনোৱা মতে সাধাৰণ শ্ৰেণীৰ ৰে’লৰ বাবে ২১৫ কিলোমিটাৰৰ অধিক যাত্ৰাৰ ক্ষেত্ৰত প্ৰতি কিলোমিটাৰত ১ পইচাকৈ ভাড়া বৃদ্ধি কৰা হৈছে। একেদৰে মেইল বা এক্সপ্ৰেছ ৰে’লৰ অ-বাতানুকুলিত শ্ৰেণী আৰু সকলো ধৰণৰ বাতানুকুলিত শ্ৰেণী যাত্ৰীৰ বাবে প্ৰতি কিলোমিটাৰত ২ পইচাকৈ ভাড়া বৃদ্ধি কৰাৰ সিদ্ধান্ত লোৱা হৈছে। উল্লেখযোগ্য যে এবছৰৰ ভিতৰত এয়া দ্বিতীয়বাৰৰ বাবে ৰে’ল ভাড়া সংশোধন কৰা হ’ল। ইয়াৰ পূৰ্বে যোৱা জুলাই মাহতো এবাৰ ভাড়া বৃদ্ধি কৰা হৈছিল।
ৰে’ল মন্ত্ৰালয়ে এই সিদ্ধান্তৰ আঁৰত যুক্তি দি কয় যে যাত্ৰীসকলৰ বাবে ৰে’ল যাত্ৰা সহজলভ্য কৰি ৰখা আৰু ৰে’ল বিভাগৰ পৰিচালনাৰ খৰচৰ মাজত এক সমতা ৰক্ষা কৰিবলৈ এই খোজ লোৱা হৈছে। অৱশ্যে দৈনিক যাতায়ত কৰা যাত্ৰীসকলৰ বাবে এক সকাহৰ খবৰো দিছে মন্ত্ৰালয়ে। নতুন নিৰ্দেশনা অনুসৰি উপনগৰীয়া আৰু অ-উপনগৰীয়া উভয় সেৱাতে ছিজন টিকট বা মাহিলী টিকটৰ ভাড়াৰ কোনো সালসলনি কৰা হোৱা নাই। লগতে সাধাৰণ নন-এচি শ্ৰেণীত ২১৫ কিলোমিটাৰ পৰ্যন্ত যাত্ৰাৰ বাবে কোনো অতিৰিক্ত ভাড়া ভৰিব নালাগে। ইয়াৰ ফলত কম দূৰত্বৰ যাত্ৰীসকল সুৰক্ষিত থাকিব যদিও তাতকৈ অধিক দূৰত্বৰ যাত্ৰাৰ বাবে এতিয়াৰে পৰা ৫ টকাৰ পৰা ২০ টকালৈকে অধিক ভাড়া দিব লাগিব।
মেইল আৰু এক্সপ্ৰেছ ৰে’লৰ ক্ষেত্ৰত শ্লিপাৰ ক্লাছৰ পৰা আৰম্ভ কৰি এচি ফাৰ্ষ্ট ক্লাছলৈকে সকলোতে প্ৰতি কিলোমিটাৰত ২ পইচাকৈ অতিৰিক্ত ভাড়া দিব লাগিব। উদাহৰণস্বৰূপে কোনো যাত্ৰীয়ে যদি নন-এচি মেইল বা এক্সপ্ৰেছ ৰে’লত ৫০০ কিলোমিটাৰ যাত্ৰা কৰে তেন্তে তেওঁ পূৰ্বতকৈ ১০ টকা বেছি দিব লাগিব। চৰকাৰী জাননী অনুসৰি দেশৰ প্ৰায় সকলোবোৰ প্ৰধান ৰে’ল যেনে বন্দে ভাৰত, ৰাজধানী, শতাব্দী, দুৰন্ত, অমৃত ভাৰত আৰু তেজস আদিৰ ভাড়া এই নতুন নিৰ্দেশনা অনুসৰি সংশোধন কৰা হৈছে। ইয়াৰ লগতে মেমু (Mainline Electric Multiple Unit) আৰু ডেমু(Diesel-Electric Multiple Unit) ৰে’লৰ ভাড়াও বৃদ্ধি পাব।
এই নতুন নিৰ্দেশনা কেৱল ২৬ ডিচেম্বৰ বা তাৰ পিছত বুকিং কৰা টিকটৰ ক্ষেত্ৰতহে প্ৰযোজ্য হ’ব। যিসকল যাত্ৰীয়ে আগতীয়াকৈ টিকট বুকিং কৰি থৈছে তেওঁলোকে যাত্ৰাৰ সময়ত কোনো অতিৰিক্ত ধন দিব নালাগে যদিও তেওঁলোকৰ যাত্ৰা ২৬ ডিচেম্বৰৰ পিছত হয়। আজিৰে পৰা সকলো ৰে’ল ষ্টেচনৰ ভাড়া তালিকাসমূহো আপডেট কৰা হ’ব যাতে যাত্ৰীসকলে নতুন মূল্যৰ বিষয়ে জানিব পাৰে।
