ইণ্ডিয়ান প্ৰীমিয়াৰ লীগ চমুকৈ আই পি এলৰ ১৪ সংখ্যক সংস্কৰণ অহা এপ্ৰিল-মে’ মাহত অনুষ্ঠিত হোৱাৰ পূৰ্ণ সম্ভাৱনা আছে।
কিন্তু ইয়াৰ পূৰ্বে ২০ জানুৱাৰিৰ দিনটো অৰ্থাৎ আজি আই পি এল খেলা প্ৰতিগৰাকী ক্ৰিকেটাৰৰ বাবে অতিকৈ গুৰুত্বপূৰ্ণ দিন।
১৪ সংখ্যক সংস্কৰণৰ বাবে কোন গৰাকী ক্ৰিকেটাৰক দলে ৰাখিব (ৰিটেইন) বা এৰি (ৰিলিজ) দিব সেয়া আজি নিৰ্ধাৰণ কৰা হ’ব।
ইয়াৰ বাবে বিচিচিআইয়ে ২০ জানুৱাৰিৰ দিনটো অন্তিম তাৰিখ হিচাপে ধাৰ্য কৰি দিছিল।
সেয়ে আজিৰ দিনটোতে দল সমূহে এই বিষয়ত সিদ্ধান্ত ল’ব।
আজি সন্ধিয়া ৬ বজাত ষ্টাৰ স্প’ৰ্টছ নেটৱৰ্কত এটা শ্ব’ সম্প্ৰচাৰণ হ’ব আৰু সেই অনুষ্ঠানৰ জৰিয়তে কোন দলে কোন কোন ক্ৰিকেটাৰক ৰাখিলে বা দলৰ পৰা এৰি দিলে সেয়া জনোৱা হ’ব।
খেলুৱৈৰ ৰিটেইন আৰু ৰিলিজ তালিকা প্ৰকাশ পোৱাৰ পূৰ্বে বিভিন্ন চৰ্চা চলা পৰিলক্ষিত হৈছে।
চৰ্চিত খবৰ অনুসৰি ৰাজস্থান ৰয়েলছৰ অধিনায়ক ষ্টিভ স্মিথক এৰি দিয়া হ’ব। দলত ৰাখিবলৈ স্মিথক দিব লগীয়া হয় ১২.৫ কোটি টকা। তেওঁৰ নেতৃত্বত দলে যোৱা ছিজনত অত্যন্ত নিৰাশাজনক প্ৰদৰ্শন কৰিছিল।
যোৱা ছিজনত চেন্নাই ছুপাৰ কিংছৰ প্ৰদৰ্শনো আছিল অত্যন্ত শোচনীয়। ধোনীৰ নেতৃত্বত পোন প্ৰথমবাৰলৈ চেন্নাইয়ে প্লে অফত স্থান নাপালে।
দলে পীয়ুষ চাওলা আৰু মুৰালী বিজয়ক এৰি দিয়াটো ইতিমধ্যে খাটাং হৈ পৰিছে। ইয়াৰ উপৰি কেদাৰ যাদৱ আৰু সুৰেশ ৰাইনাৰ ভাগ্যও আজিয়ে নিৰ্ণয় হ’ব।
ইফালে আগন্তুক ছিজনত কিংছ ইলেভেন পঞ্জাৱতো কিছু সাল-সলনি দেখাৰ সম্ভাৱনা আছে। পঞ্জাৱে কৰুণ নায়াৰক এৰি দিব। মেক্সৱেল সন্দৰ্ভত মেনেজমেণ্ট এতিয়াও স্থিতি স্পষ্ট কৰিব পৰা নাই।
আনহাতে যোৱা ছিজনত কলকাতা নাইট ৰাইডাৰ্ছৰ নেতৃত্ব লোৱা দীনেশ কাৰ্তিকক দলে এৰিব বুলি বিভিন্ন মাধ্যমত প্ৰকাশ পাইছে যদিও নাইট ৰাইডাৰ্ছে তেওঁক দলত ৰাখিব বুলি ইতিমধ্যে স্পষ্ট কৰি দিছে।
উল্লেখ্য যে বিচিচিআইয়ে ফেব্ৰুৱাৰিৰ দ্বিতীয় সপ্তাহত সাধাৰণভাৱে এটা নিলামৰ কাৰ্যসূচীৰ আয়োজন কৰিব পাৰে। অৱশ্যে, বোৰ্ডে এতিয়ালৈকে ইয়াৰ বাবে কোনো তাৰিখ ঘোষণা কৰা নাই।