ৰাজস্থানৰ উদয়পুৰত এটা ব্যক্তিগত খণ্ডৰ আই টি কোম্পানীত এক ধৰ্ষণ কাণ্ড সংঘটিত হৈছে। কোম্পানীটোৰ এগৰাকী মহিলা মেনেজাৰক জন্মদিনৰ পাৰ্টিৰ পৰা ঘৰলৈ লৈ যোৱাৰ অজুহাতত চলন্ত গাড়ীত দলবদ্ধ ধৰ্ষণ কৰাৰ অভিযোগ উত্থাপন হৈছে। এই ঘটনাত আৰক্ষীয়ে কোম্পানীটোৰ চিইঅ’ আৰু আন এজন উচ্চপদস্থ বিষয়াৰ লগতে এগৰাকী মহিলাকো গ্ৰেপ্তাৰ কৰিছে। ধৰ্ষণৰ দৰে জঘন্য কামত নিজৰেই সহকৰ্মী জড়িত থকাৰ বাতৰিয়ে সমগ্ৰ ৰাজ্যখনত তীব্ৰ চাঞ্চল্যৰ সৃষ্টি কৰিছে।
ভুক্তভোগী মহিলাগৰাকীয়ে আৰক্ষীৰ ওচৰত দাখিল কৰা এজাহাৰ অনুসৰি, যোৱা ২০ ডিচেম্বৰত তেওঁলোকৰ কোম্পানীৰ এটা জন্মদিনৰ পাৰ্টি আছিল। অনুষ্ঠান শেষ হোৱাৰ পিছত কোম্পানীটোৰ চিইঅ’, কাৰ্যবাহী মুৰব্বী আৰু তেওঁৰ পত্নীয়ে মহিলাগৰাকীক নিজৰ গাড়ীৰে ঘৰত নমাই থৈ অহাৰ কথা দিছিল। মহিলাগৰাকীৰ অভিযোগ যে মাজপথত তেওঁক চিগাৰেটৰ দৰে কিবা এটা খাবলৈ দিয়া হৈছিল, যাৰ ফলত তেওঁ অচেতন হৈ পৰে। ইয়াৰ পিছতে চলন্ত গাড়ীৰ ভিতৰতে তেওঁক দলবদ্ধ ধৰ্ষণ কৰা হয়। মাজনিশা এবাৰ জ্ঞান ঘূৰি অহাৰ সময়ত তেওঁ চিইঅ’গৰাকীয়ে নিৰ্যাতন চলাই থকাটো অনুভৱ কৰিছিল বুলিও উল্লেখ কৰিছে।
পিছদিনা পুৱা প্ৰায় ৫ বজাত অভিযুক্তসকলে মহিলাগৰাকীক তেওঁৰ ঘৰত নমাই দি থৈ যায়। ইয়াৰ পিছতে ভুক্তভোগীয়ে সমগ্ৰ ঘটনাৰ বিষয়ে আৰক্ষীক অৱগত কৰে। উদয়পুৰৰ আৰক্ষী অধীক্ষক যোগেশ গোৱেলে জনোৱা মতে, মহিলাগৰাকীৰ অভিযোগৰ ভিত্তিত আৰক্ষীয়ে তাৎক্ষণিকভাৱে তদন্ত আৰম্ভ কৰিছে। ইতিমধ্যে কোম্পানীৰ চিইঅ’ জয়শ, তেওঁৰ সহযোগী গৌৰৱ আৰু গৌৰৱৰ পত্নী শিল্পাক আৰক্ষীয়ে গ্ৰেপ্তাৰ কৰিছে। তেওঁলোকৰ বিৰুদ্ধে নিৰ্দিষ্ট ধাৰাত গোচৰ ৰুজু কৰা হৈছে আৰু বৰ্তমান আৰক্ষীৰ জিম্মাত জেৰা চলাই থকা হৈছে।
চিকিৎসা পৰীক্ষাত মহিলাগৰাকীৰ শৰীৰত আঘাতৰ চিন পোৱা গৈছে, যিয়ে প্ৰাথমিকভাৱে ধৰ্ষণৰ প্ৰমাণ দাঙি ধৰিছে। বৰ্তমান এই গোচৰটোৰ তদন্তৰ দায়িত্ব অতিৰিক্ত আৰক্ষী অধীক্ষক মাধুৰী ভাৰ্মাক অৰ্পণ কৰা হৈছে। আৰক্ষীয়ে ঘটনাটোৰ অধিক তথ্য সংগ্ৰহৰ বাবে সেইদিনা ব্যৱহাৰ কৰা গাড়ীখনৰ ডেচকেমত থকা অডিঅ’ আৰু ভিডিঅ’ ৰেকৰ্ডিংসমূহ গভীৰভাৱে পৰীক্ষা কৰি আছে। কৰ্মক্ষেত্ৰত মহিলাৰ সুৰক্ষাক লৈ পুনৰ এবাৰ এই ঘটনাই ডাঙৰ প্ৰশ্নচিহ্নৰ সৃষ্টি কৰিছে।
