মুম্বাই ইণ্ডিয়ানছৰ বিৰুদ্ধে দৰ্শনীয় ইনিংছ খেলি ৰাষ্ট্ৰীয় তথা আন্তঃৰাষ্ট্ৰীয় ক্ৰিকেট প্ৰেক্ষাপটত ব্যাপক চৰ্চিত হোৱা অসমৰ ১৭ বছৰীয়া ৰিয়ান পৰাগে দেখুৱালে আন এক চমক। বৃহস্পতিবাৰে কলকাতা নাইট ৰাইডাৰ্ছৰ বিৰুদ্ধে বিস্ফোৰক ইনিংছ খেলি ৰাজস্থান ৰয়েলছৰ বিজয়ত মুখ্য ভূমিকা গ্ৰহণ কৰে ৰিয়ান পৰাগে।
কালিৰ মেচখনত কলকাতা নাইট ৰাইডাৰ্ছে ৰাজস্থান ৰয়েলছক বান্ধি দিয়া ১৭৬ ৰানৰ লক্ষ্য পিছা কৰিবলৈ আহি বিপদত পৰা ৰাজস্থানৰ সংকটমোচক হয় ৰিয়ান। ৰিয়ানৰ ৩১ বলত ৪৭ ৰানৰ বিস্ফোৰক ইনিংছৰ বাবেই চাৰিটা বল বাকী থকা অৱস্থাত মেচখনত ৰোমাঞ্চকৰ বিজয় সাব্যস্ত কৰে ৰাজস্থানে।
৫টা চাৰি ২টা ছয়ৰ সহায়ত নিজৰ ইনিংছটো সজোৱা ৰিয়ানে সপ্তম উইকেইটৰ যুটীত আৰ্চাৰৰ সৈতে গুৰুত্বপূৰ্ণ ৪৪ ৰানৰ বৰঙনি আগবঢ়ায়। অত্যন্ত শিহৰণকাৰী মেচখনত এই দুয়োজন বেটছমেনে ৰাজস্থান ৰয়েলছৰ বিজয়ৰ মূল নায়ক।
সাহসিকতাৰে ক্ৰিজত থাকি এক নিশ্চিত পৰাজয়ৰ গৰাহৰ পৰা ৰাজস্থানক উদ্ধাৰ কৰা ৰিয়ানক বিস্ফোৰক ইনিংছটোৰ বাবে ‘গেইমচেঞ্জাৰ অব দা মেচ’ সন্মানেৰে সন্মানিত কৰা হয়। আনহাতে কালিৰ মেচখনত ৪ অ’ভাৰত ২০ ৰান খৰছ কৰি ২টা উইকেট দখল কৰা ৰাজস্থানৰ স্পীডষ্টাৰ বৰুন এৰ’নে লাভ কৰে মেন অব দা মেটচ।
মন কৰিব লগীয়া যে কালিৰ মেচখনতো ৰিয়ানে অৰ্ধ শতকৰ পৰা তিনি ৰান দূৰত ৰৈ যায়। যাৰ বাবে আই পি এলৰ ইতিহাসত কনিষ্ঠতম অৰ্ধশতক অৰ্জনকাৰী বেটছমেন ৰূপে পৰিগণিত হোৱাৰ পৰা দ্বিতীয়টো সুযোগ হেৰুৱাই ৰিয়ান পৰাগে।
উল্লেখ্য যে কলকাতাৰ ইডেন গাৰ্ডেন ষ্টেডিয়ামত অনুষ্ঠিত মেচখনত কলকাতা নাইট ৰাইডাৰ্ছে প্ৰথমে বেট ধৰি অধিনায়ক দীনেশ কাৰ্তিকৰ বিস্ফোৰক ৯৭ ৰানৰ সহায়ত নিৰ্ধাৰিত ২০ অ’ভাৰত ৰাজস্থানক ১৭৫ ৰানৰ লক্ষ্য বান্ধি দিয়ে।
ইয়াৰ প্ৰত্যুত্তৰত ৰাজস্থানে ৭টা উইকেট হেৰুৱাই চাৰিটা বল বাকী থকা অৱস্থাত মেচখনত বিজয়ী হয়।
ৰিয়ানৰ সাফল্যৰ বিষয়ে কি ক’লে পিতৃ তথা প্ৰাক্তন ৰঞ্জি ক্ৰিকেটাৰ পৰাগ দাসে। চাওক নৰ্থ-ইষ্ট নাওৰ আছুতীয়া সাক্ষাৎকাৰ
