নতুন ইতিহাসৰ পথত ভাৰত ! লোকসভাৰ পাছত ৰাজ্যসভাতো মহিলা সংৰক্ষণ বিধেয়ক গৃহীত হয়। বৃহস্পতিবাৰে নিশা ১০ বজাত ধ্বনি ভোটৰ জৰিয়তে গৃহীত হয় মহিলা সংৰক্ষণ বিধেয়ক। ৰাজ্যসভাৰ ২৪৫ জন সাংসদৰ ভিতৰত ২১৫ জন সাংসদে বিধেয়কখনৰ সপক্ষে ভোটদান কৰে। বিধেয়কখনৰ বিৰুদ্ধে এটাও ভোট নপৰিল। ক’ব পাৰি যে মহিলা সুৰক্ষা বিধেয়কখন সৰ্বসন্মতিক্ৰমে গৃহীত হৈছে। এতিয়া কেৱল ৰাষ্ট্ৰপতিৰ অনুমোদনৰ বাবে অপেক্ষা।
প্ৰধানমন্ত্ৰী নৰেন্দ্ৰ মোদীয়ে কয় যে এই বিধেয়কখনে দেশবাসীৰ মাজত এক নতুন আস্থা জগাই তুলিব। মহিলাৰ বাবে আসন সংৰক্ষণৰ চৰকাৰে লোৱা সিদ্ধান্তক সকলো ৰাজনৈতিক দলে যিদৰে আদৰণি জনাইছে তাৰ বাবে প্ৰধানমন্ত্ৰীয়ে সকলোকে ধন্যবাদ জ্ঞাপন কৰে।
মহিলা সংৰক্ষণ বিধেয়কক আদৰণি জনোৱাৰ বাবে সকলো সাংসদ আৰু বিৰোধীক ধন্যবাদ জনাই প্ৰধানমন্ত্ৰী নৰেন্দ্ৰ মোদীয়ে ৰাজ্যসভাত কয় যে সকলো সাংসদে মহিলা সংৰক্ষণ বিধেয়কক সমৰ্থন কৰিব বুলি প্ৰথমেই জনাইছে। ইয়াৰ বাবে সকলোকে অভিনন্দন জনাইছো।
তেওঁ কয় যে এই বিধেয়কখনে দেশৰ প্ৰতিজন জনসাধাৰণৰ মাজত এক নতুন আস্থা জগাই তুলিব। আমি সকলো সাংসদ আৰু সকলো ৰাজনৈতিক দলে নাৰীক সন্মান দিবলৈ ডাঙৰ ভূমিকা লৈছো। এই বিধেয়কখন গৃহীত হোৱাৰ লগে লগে নাৰী শক্তিক বিশেষ সন্মান দিয়া হ’ল।
বৃহস্পতিবাৰে পুৱাৰে পৰা নিশা ১০:৩০ বজালৈ মহিলা সংৰক্ষণ বিধেয়ক সন্দৰ্ভত দীঘলীয়া আলোচনা চলিছিল। প্ৰধানমন্ত্ৰীয়ে কয় যে আলোচনা অতি ইতিবাচক আছিল। ভোটদানৰ প্ৰাকক্ষণত তেওঁ কয় যে এই উচ্চ সদনত অতি ভাল আলোচনা হৈছিল। এইবাৰ আমি এক সৰ্বসন্মত মতামতেৰে দেশক আগুৱাই নিয়াৰ বাবে আৰু এটা পদক্ষেপ গ্ৰহণ কৰিম।
প্ৰধানমন্ত্ৰীৰ এই মন্তব্য ভুল প্ৰমানিত নহ’ল। ২৪৫ জন লোকৰ ভিতৰত ২১৫ টা ভোট বিধেয়কখনৰ সপক্ষে দিয়া হয় আৰু বিধেয়কখনৰ বিৰুদ্ধে এটাও ভোট নপৰিল।
