“মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বৰ বিজেপি চৰকাৰখনে অসমীয়া জাতি সত্তাৰ ভেঁটি ধ্বংস কৰাত লাগি পৰিছে”-অজিত কুমাৰ ভূঞা

শুকুৰবাৰে গুৱাহাটী প্ৰেছ ক্লাৱত ৰাজ্যসভাৰ সাংসদ অজিত কুমাৰ ভূঞাই এক সংবাদমেল অনুষ্ঠিত কৰি মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বৰ বিজেপি চৰকাৰখনৰ বিৰুদ্ধে অসমীয়া জাতি সত্তাৰ ভেঁটি ধ্বংস কৰাৰ লগতে কেইবাটাও গুৰুতৰ অভিযোগ উত্থাপন কৰে।

তেওঁ কয়, “এই চৰকাৰে মাটি আৰু ভেঁটি নিলাম কৰি আক্ৰমণ আৰম্ভ কৰিছে। আচলতে বিজেপি নেতৃত্বাধীন চৰকাৰখনে কাৰ স্বাৰ্থ ৰক্ষা কৰিবলৈ ক্ষমতাত বহিল সেয়া লাখটকীয়া প্ৰশ্ন ৰূপে বিবেচিত হৈছে।”

ৰাজ্য চৰকাৰখনক সাৱধানবাণী শুনাই অজিত ভূঞাৰ মন্তব্য-“জুইৰ লগত খেলা নকৰিলেই চৰকাৰৰ মঙ্গল।”

লগতে পঢ়ক: ইউৰোপৰ সৰ্ববৃহৎ পাৰমাণৱিক শক্তি প্ৰকল্প জব্দ কৰিলে ৰাছিয়াই

ভূঞাই লগতে কয়, ‘’কাছাৰ আৰু জাগীৰোড কাগজ কল একপ্ৰকাৰ বিক্ৰী কৰিবলৈ লৈ শৰ্মা চৰকাৰে ৰাইজক বিশ্বাসঘাতকতা কৰিছে। এই দুটা কাগজ কল ভৱিষ্যৎ প্ৰজন্মৰ বাবে চূড়ান্ত বিশ্বাসঘাতকতাৰ প্ৰতীক হিচাপে স্মৰণীয় হ’ব।”

তদুপৰি, কাগজ কল দুটাৰ যন্ত্ৰ-পাতি পানীৰ দৰত বিক্ৰী কৰি “শ্বাহ”ৰ পুত্ৰৰ হাতত তুলি দিবলৈ চৰকাৰ উঠি পৰি লাগিছে বুলি উল্লেখ কৰি “এইখন মাফিয়াৰ চৰকাৰ” বুলিও ভূঞাই মন্তব্য কৰে।

আনহাতে, মাজুলী নিৰ্বাচন সন্দৰ্ভতো ভূঞাই মন্তব্য কৰি কয়,”মাজুলীৰ ভোটাৰ ৰাইজে বিজেপি দল আৰু চৰকাৰৰ আচল চৰিত্ৰ বুজি পাইছে। আমি আশাবাদী, এইবাৰ মাজুলীবাসীয়ে খিলঞ্জীয়া বিৰোধী, জাতি বিৰোধী চৰকাৰখনক উপযুক্ত প্ৰত্যুত্তৰ দিব। এটা নতুন পুৱাৰে এইবাৰ মাজুলীবাসীয়ে পৰিৱৰ্তনৰ নতুন দিগন্তৰ সূচনা কৰিব বুলি আমি আশাবাদী।‘’

লগতে পঢ়ক: ইউক্ৰেইনৰ ৰাজধানীত গুলীবিদ্ধ ভাৰতীয় ছাত্ৰ: চিকিৎসালয়ত ভৰ্তি

ইপিনে, মাজুলী উপ নিৰ্বাচনৰ বিজেপি প্ৰাৰ্থী ভুৱন গামৰ যোগ্যতাক লৈও তীৰ্যক মন্তব্য কৰি ভূঞাই কয়,”ভুৱন গামৰ অতীত ভাল নহয়। সোণাপুৰত এটা মিউজিয়াম জ্বলাই দিয়া বিষয়টোৰে একো তদন্ত নহ’ল।‘’