‘জেন জি’ প্ৰজন্মক লৈ অভিনেত্ৰী তথা বিজেপি সাংসদ কংগনা ৰাণাৱত আৰু যোগগুৰু বাবা ৰামদেৱৰ মাজত চলি থকা বাকযুদ্ধত এইবাৰ যেন যতি পৰিল। কংগনাৰ তীব্ৰ আক্ৰমণৰ পাছত এই বিষয়টো আৰু আগুৱাই নিব নোখোজে বুলি স্পষ্ট কৰি দিলে বাবা ৰামদেৱে। দেশৰ মানুহে তেওঁক ভালদৰে চিনি পায় আৰু দেশৰ বাবে তেওঁৰ অৱদানৰ কথাও জানে বুলি উল্লেখ কৰি এই বিতৰ্কত নতুনকৈ একো ক’ব নোখোজাৰ কথা প্ৰকাশ কৰে তেওঁ।
দেওবাৰে সাংবাদিকৰ আগত ৰামদেৱে কয় যে তেওঁ এই বিষয়টো আৰু ডাঙৰ কৰিব বিচৰা নাই। দেশৰ মানুহে স্বামী ৰামদেৱ কোন আৰু দেশৰ প্ৰতি তেওঁৰ অৱদান কি, সেই কথা ভালদৰে জানে। সেয়েহে এনে মন্তব্যৰ ওপৰত পুনৰ কোনো প্ৰতিক্ৰিয়া প্ৰকাশ কৰাৰ প্ৰয়োজন তেওঁ অনুভৱ কৰা নাই বুলিও কয়।
এই বিতৰ্কৰ আৰম্ভণি হৈছিল কংগনা ৰাণাৱতে আজিৰ যুৱ প্ৰজন্মক ‘জেনেৰেচন গাটাৰ’ অৰ্থাৎ ‘নর্দমাৰ প্ৰজন্ম’ বুলি কৰা এক মন্তব্যক লৈ। কংগনাৰ এই মন্তব্য প্ৰকাশ পোৱাৰ পাছতে দেশজুৰি তীব্ৰ প্ৰতিক্ৰিয়া সৃষ্টি হয়। বিষয়টোত প্ৰতিক্ৰিয়া প্ৰকাশ কৰি ৰামদেৱে কংগনাৰ শিক্ষা, অতীত আৰু ব্যক্তিগত জীৱনক লৈও প্ৰশ্ন তুলিছিল।
ৰামদেৱে কংগনাক কটাক্ষ কৰি তেওঁৰ অতীত আৰু জীৱনৰ সাফল্যৰ বিষয়ে প্ৰশ্ন কৰিছিল। লগতে আজিৰ যুৱ প্ৰজন্মক ‘নর্দমাৰ প্ৰজন্ম’ বুলি কোৱাটো বিকৃত মানসিকতাৰ পৰিচয় বুলিও মন্তব্য কৰিছিল যোগগুৰুজনে।
কিন্তু ৰামদেৱৰ এই মন্তব্যৰ পাছত নীৰৱ হৈ নাথাকিল কংগনা। ছ’চিয়েল মিডিয়াত তেওঁ পোনপটীয়াকৈ ৰামদেৱক লক্ষ্য কৰি তীব্ৰ আক্ৰমণ চলায়। নিজৰ ব্যক্তিগত জীৱনক লৈ মন্তব্য নকৰিবলৈ সকীয়াই দি কংগনাই ৰামদেৱৰ বিৰুদ্ধে পুৰণি বিতৰ্কৰ কথাও উত্থাপন কৰে।
কংগনাই দাবী কৰে যে ৰামদেৱে তেওঁৰ যৌৱন বা ব্যক্তিগত জীৱনক লৈ অনুমান-গুজৱৰ আশ্ৰয় লোৱা উচিত নহয়। লগতে পতঞ্জলিৰ বিভ্ৰান্তিকৰ বিজ্ঞাপনৰ গোচৰত উচ্চতম ন্যায়ালয়ৰ ভৰ্ৎসনাৰ সন্মুখীন হোৱা বিষয়টোও তেওঁ উত্থাপন কৰে। কংগনাৰ মতে, সেয়ে তেওঁক চৰিত্ৰৰ পাঠ পঢ়োৱাৰ নৈতিক অধিকাৰ ৰামদেৱৰ নাই।
উল্লেখ্য যে পতঞ্জলিৰ বিভ্ৰান্তিকৰ বিজ্ঞাপনক লৈ ৰামদেৱ আৰু পতঞ্জলিৰ বিৰুদ্ধে উচ্চতম ন্যায়ালয়ত তীব্ৰ ভৰ্ৎসনা হৈছিল। সেই পুৰণি ঘটনাকে কংগনাই এইবাৰ নিজৰ প্ৰত্যুত্তৰত অস্ত্ৰ হিচাপে ব্যৱহাৰ কৰে। কংগনাৰ এই আক্ৰমণৰ পাছতেই ৰামদেৱে সুৰ নৰম কৰি এই বিতৰ্কত আৰু অংশ ল’ব নোখোজাৰ কথা প্ৰকাশ কৰাত সমগ্ৰ ঘটনাই নতুন ৰূপ লৈছে। এই বাকযুদ্ধই ছ’চিয়েল মিডিয়াত যথেষ্ট চৰ্চা লাভ কৰি আছে।
