তীৰ্থ নগৰী হাজোৰ খলিহামাৰী অঞ্চলত পাগলাদিয়া নৈৰ খহনীয়াই ভয়াৱহ ৰূপ ধাৰণ কৰিছে। অঞ্চলটোত অব্যাহত থকা প্ৰবাল গৰাখহনীয়া ৰোধ কৰিবলৈ প্ৰশাসন ব্যৰ্থ হোৱাত এতিয়া বিনিদ্ৰ ৰজনী কটাবলগীয়া হৈছে অঞ্চলটোৰ নৈ পৰীয়া ৰাইজ।
যোৱা কিছুদিন ধৰি অঞ্চলটোত অব্যাহত থকা পাগলাদিয়াৰ বিধ্বংসী খহনীয়াই এফালৰ পৰা নিশ্চিহ্ন কৰিছে কৃষিভূমি, মানুহৰ ঘৰ-দুৱাৰৰ লগতে বিভিন্ন চৰকাৰী-বেচৰকাৰী অনুষ্ঠান-প্ৰতিষ্ঠান। ইতিমধ্যে গৰাখহনীয়াৰ কবলৰ পৰা পৰিত্ৰাণ পাবলৈ খলিহামাৰী অঞ্চলৰ বহু পৰিয়ালে নিজৰ ঘৰ-দুৱাৰ ভাঙি নিৰাপদ স্থানলৈ গতি কৰিছে।
বিগত বছৰ বছৰ ধৰি অব্যাহত থকা গৰাখহনীয়াৰ ফলত গৃহহীন হোৱা অঞ্চলটোৰ পৰিয়ালসমুহে এতিয়া আশ্ৰয় ল’ব লগীয়া হৈছে পথ-মথাউৰিৰ ওপৰত। ইয়াকে লৈ স্থানীয় ৰাইজৰ মাজত প্ৰশাসনৰ বিৰুদ্ধে ক্ষোভৰ উদগীৰণ হোৱা পৰিলক্ষিত হৈছে।
উল্লেখ্য যে গৰাখহনীয়াই কাল ৰূপ ধাৰণ কৰাৰ পিছতো এই পৰ্যন্ত এবাৰো অঞ্চলবাসীৰ খবৰ ল’বলৈ যোৱা নাই স্থানীয় বিধায়িকা সুমন হৰিপ্ৰিয়া। তদুপৰি জল সম্পদ বিভাগেও নিৰ্বিকাৰ ভূমিকা অৱলম্বন কৰি আছে।
আনহাতে এই গৰাখহনীয়াৰ কবলৰ পৰা অঞ্চলবাসীক নিৰাপত্তা প্ৰদান কৰিবলৈ চৰকাৰক কাতৰ অনুৰোধ জনাইছে এইসকল দুৰ্ভগীয়া ৰাইজে।