ছ’চিয়েল মিডিয়াৰ মাৰফতত হঠাতে চেলিব্ৰেটি হোৱা ৰাণু মণ্ডলৰ জীয়েক এলিজাবেথ সাথী ৰয়ে কিছুমান চাঞ্চল্যকৰ কথা ৰাজহুৱা কৰিছে।
সুৱদী কণ্ঠৰ অধিকাৰী মহিলাগৰাকীৰ জীৱনৰ বিভিন্ন অকথিত দিশ সম্পৰ্কত ছ’চিয়েল মিডিয়া আৰু সংবাদ মাধ্যমত এতিয়াও অন্ত নোহোৱা উৎসুকতাত ই নতুন মাত্ৰা যোগ দিছে।
এলিজাবেথৰ অভিযোগ, মাকৰ মেনেজাৰে তেওঁক মাকক লগ কৰিবলৈ দিয়া নাই আৰু সেই চেষ্টা কৰিলে ভৰি ভাঙি দিয়াৰ হুমকি দিছে; এলিজাবেথৰ উদ্ধৃতিৰে প্ৰকাশ কৰা এটা বাতৰিত হিন্দুস্তান টাইমছে কয়।
ৰাণু মণ্ডলক ৰেইল ষ্টেইশ্যনত লতা মংগেশকাৰৰ “এক প্যাৰ কা নাগমা” গানটো গাই থকা মুহূৰ্তত ভিডিঅ’ ৰেকৰ্ডিং কৰি ছ’চিয়েল মিডিয়াত আপল’ড কৰা অতীন্দ্ৰ চক্ৰবৰ্তীয়ে বৰ্তমান তেওঁৰ মেনেজাৰৰ ভূমিকাত আছে। তেওঁ আৰু তপন দাস “আমৰা সবাই শয়তান ক্লাব”ৰ সদস্য আৰু ক্লাবটোৱে ৰাণুৰ বৰ্তমানৰ চোৱাচিতাৰ দায়িত্ব লৈ আছে।
মাকক ইমান দিনে পৰিত্যক্ত কৰি এতিয়া স্বাৰ্থৰ বাবে কাষ চপা বুলি ছ’চিয়েল মিডিয়া য়ুজাৰৰ পৰাও তীব্ৰ ভৰ্ৎসনাৰ সন্মুখীন হোৱা বাবেও ক্ষোভ প্ৰকাশ কৰে এলিজাবেথে।
তেওঁ নিজৰ জীৱনৰ কঠিন সংগ্ৰাম সত্ত্বেও মাকক মাজে মাজে সহায় কৰিছিল আৰু মাকৰ একাউণ্টত কেতিয়াবা কম কম পৰিমাণৰ টকা ভৰাই দিছিল বুলি দাবী কৰে। মাকৰ চাৰিটা সন্তানৰ ভিতৰত তেৱেঁ একমাত্ৰ যি মাকৰ খা-খবৰ লয়, বিবাহ-বিচ্ছেদিত এলিজাবেথে কয়।
এখন গেলামালৰ দোকান দি নিজৰ কনিষ্ঠ সন্তানৰ সৈতে বাস কৰা এলিজাবেথৰ ভাষ্যৰ পৰা জানিব পাৰি ৰাণু মণ্ডলৰ প্ৰথম স্বামীৰ মৃত্যুৰ পিছত দ্বিতীয় বিবাহ হৈছিল আৰু দ্বিতীয় বিবাহৰ সাক্ষী হিচাপে দুজন সন্তানো আছে। তাৰোপৰি এতিয়াও জীৱিত দ্বিতীয় স্বামী।
“মোৰ দেউতা কেইবছৰমানৰ পূৰ্বে ঢুকালে। মাৰ দ্বিতীয় স্বামীৰ সন্তানকেইজন খুব সম্ভৱ মুম্বাইতে থাকে। অৱশ্যে মই নিশ্চিত নহওঁ। তেওঁৰ দ্বিতীয় স্বামী এতিয়াও জীৱিত। মই তেওঁৰ প্ৰথম স্বামীৰ জীয়েক আৰু এজন ককাই আৰু এজন সতীয়া ভাই আৰু এগৰাকী সতীয়া ভনী আছে। আমাৰ পৰস্পৰৰ সৈতে যোগাযোগ নাই। আনকেইজন সন্তানে কিয় মাৰ যত্ন লোৱা নাই? তেওঁলোকক কোনেও কিয় অপবাদ দিয়া নাই? মই তেওঁলোকক মা আৰু মোক প্ৰতিপালনৰ দায়িত্ব ল’বলৈ আগ বাঢ়ি আহিবলৈ আহ্বান জনাইছো”, কাকতখনত ৰাণুৰ উদ্ধৃতি।
মেনেজাৰ অতীন্দ্ৰ চক্ৰৱৰ্তী আৰু তপন দাসে মাকক ঠগি খোৱা বুলিও অভিযোগ উত্থাপন কৰে এলিজাবেথে।
তেওঁ কয়, “অতীন্দ্ৰ আৰু তপনহে যেন মোৰ মাৰ পুত্ৰ। তেওঁলোক আৰু ক্লাবটোৰ আন আন সদস্যই মাৰ ওচৰলৈ গ’লে মোৰ ভৰি ভাঙি দিম বুলি ভাবুকি দিছে। তেওঁলোকে আনকি মোক ফোনতো কথা পাতিবলৈ নিদিয়ে। তেওঁলোকে মোৰ মাৰ ব্ৰেইনৱাশ্ব কৰি দিছে। মই মাৰ কথা ভাবি একো কৰা নাই। গণ্ডগোল কৰিলে তেওঁ সংগীতত মনোযোগ দিব নোৱাৰিব।”
এলিজাবেথে অতীন্দ্ৰ আৰু তপন কিয় মুম্বাইলৈ মাকৰ সৈতে বাৰে বাৰে যায় বুলিও প্ৰশ্ন কৰে।
