বিজ্ঞানৰ অগ্ৰগতিৰ সৈতে ‘বাৰ্ধক্য’ শব্দটো এতিয়া নতুন ব্যাখ্যাৰ সন্ধান পাইছে। বিজ্ঞানীসকলে দাবী কৰিছে যে কেঞ্চাৰ আৰু ডায়েবেটিছৰ চিকিৎসাত ব্যৱহাৰ হোৱা দুটা সাধাৰণ ঔষধ—ৰেপামাইচিন (Rapamycin) আৰু মেটফৰ্মিন (Metformin)—উপযুক্ত পৰিমাণত একেলগে ব্যৱহাৰ কৰিলে মানুহৰ আয়ুস বৃদ্ধি কৰিব পাৰে।
এই চমকপ্ৰদ গৱেষণাৰ সূচনা কৰিছিল ইষ্ট এংলিয়া বিশ্ববিদ্যালয়ৰ (University of East Anglia) বায়’লজিকেল ছায়েন্স স্কুলৰ গৱেষকসকলে। তেওঁলোকৰ মতে, ৰেপামাইচিন—যিটো সাধাৰণতে কেঞ্চাৰ ৰোগ আৰু অংগ প্ৰতিস্থাপন সময়ত ব্যৱহাৰ হয়— আৰু মেটফৰ্মিন—ডায়েবেটিছ, বিশেষকৈ টাইপ ২ ডায়েবেটিছ ৰোগীৰ বাবে ব্যৱহৃত ঔষধ—যদি একেলগে সঠিক মাত্রাত প্ৰয়োগ কৰা যায়, তেন্তে ই কোষৰ বিভাজন আৰু ক্ষয় প্ৰক্ৰিয়া ৰোধ কৰি আয়ু বৃদ্ধি কৰিবলৈ সক্ষম হ’ব পাৰে।
‘এণ্টি-এজিং’ গৱেষণাৰ নতুন দিশ:
গৱেষকসকলৰ মতে, এই ঔষধদুটাই দীৰ্ঘ উপবাস বা কঠোৰ খাদ্যাভ্যাস নকৰাকৈও শৰীৰত কেলৰি জমা হ’ব পৰা সম্ভাৱনাক হ্ৰাস কৰে। লগতে, কোষৰ মৌলিক উপাদান ক্ৰম’জম (chromosome) ৰ সংৰক্ষণ, বিশেষকৈ টেল’মিৰ (telomere) নামৰ অংশত ক্ষয় ৰোধ কৰি কোষৰ মৃত্যু হ্ৰাস কৰিব পাৰে।
ক্ৰম’জমৰ এই অংশটোৱে কোষ কিমানবাৰ বিভাজন হ’ব পাৰে, সেইটো নিৰ্ধাৰণ কৰে।বিজ্ঞানীসকলৰ মতে, সাধাৰণতে মানুহৰ শৰীৰত ৩০ বছৰ বয়সৰ পাছত কোষৰ কার্যক্ষমতা হ্ৰাস পোৱাটো আৰম্ভ হয়। ৫০ বছৰৰ সময়লৈ হৃদযন্ত্ৰ, যকৃত, বৃক্ক আদিৰ কার্যক্ষমতা ২০ শতাংশলৈ হ্ৰাস পায়। ৮০ বছৰৰ পাছত এই হ্ৰাস ৫০ শতাংশতকৈও অধিক হ’ব পাৰে। কিন্তু এই নতুন ঔষধ প্ৰয়োগে সেই ক্ষয়ৰ গতি মন্থৰ কৰি শৰীৰৰ অংগসমূহ অধিক দিন কাৰ্যক্ষম হৈ থাকিবলৈ সহায় কৰিব পাৰে।
মানুহৰ ওপৰত পৰীক্ষা:
এই মুহূর্তত এই দুটা ঔষধ প্ৰাণীৰ ওপৰত পৰীক্ষা কৰা হৈছে, আৰু বিজ্ঞানীসকলে এই পৰীক্ষাৰ ফলাফল মানুহৰ ওপৰত কাৰ্যকৰী ৰূপে প্ৰয়োগ কৰাৰ বাবে অধিক গৱেষণাৰ প্ৰয়োজন বুলিও উল্লেখ কৰিছে। তেওঁলোকৰ মতে, ফলাফল প্ৰকাশ কৰাৰ আগেয়ে আৰু কিছু সময় লাগিব।
বিজ্ঞানৰ এই সম্ভাৱ্য সফলতাৰ জৰিয়তে অদূৰ ভৱিষ্যতে বাৰ্ধক্যৰ ধাৰণাটো শীঘ্ৰে অতীতৰ হ’ব বুলি আশা প্ৰকাশ কৰিছে। যেতিয়া কোষৰ ক্ষয় ৰোধ কৰি নতুন কোষৰ সৃষ্টি অব্যাহত ৰাখিব পাৰি, তেতিয়া মানৱ জীৱন অধিক সুস্থ আৰু দীঘলীয়া হ’ব।
