পুনেৰ এখন বিশেষ আদালতে এগৰাকী তিনি বছৰীয়া শিশুক ধৰ্ষণ আৰু হত্যা কৰাৰ অপৰাধত ৬৫ বছৰীয়া এজন ব্যক্তিক মৃত্যুদণ্ডৰ শাস্তি প্ৰদান কৰিছে। পুনে জিলাৰ নাছৰাপুৰ গাঁৱত সংঘটিত হোৱা এই জঘন্য অপৰাধৰ ৰায়দান মাত্ৰ ৬০ দিনৰ ভিতৰতে প্ৰদান কৰা হয়। পৰিস্থিতিগত প্ৰমাণ আৰু ঘটনাৰ পূৰ্বে দুয়োকে একেলগে দেখা পোৱাৰ ভিত্তিত আদালতে দোষীক এই চৰম শাস্তি শুনায়।
যোৱা ১ মে‘ তাৰিখে এই ভয়ংকৰ ঘটনাটো সংঘটিত হৈছিল। মামাকৰ ঘৰলৈ ফুৰিবলৈ যোৱা নিৰীহ শিশুটোক অভিযুক্তই ওচৰৰে এটা গোহালিলৈ ফুচুলাই নি ধৰ্ষণ কৰাৰ লগতে নিষ্ঠুৰভাৱে হত্যা কৰে। শিশুটো নিৰুদ্দেশ হোৱাৰ পিছত পৰিয়ালৰ লোকে বিচাৰ-খোঁচাৰ কৰাত শেষত গোহালিৰ ভিতৰতে তাইৰ মৃতদেহটো উদ্ধাৰ হয়।
এই হৃদয় বিদাৰক ঘটনাক লৈ সমগ্ৰ অঞ্চলটোতে তীব্ৰ প্ৰতিক্ৰিয়াৰ সৃষ্টি হয়। ক্ষুব্ধ স্থানীয় ৰাইজে পথ অৱৰোধ কৰি প্ৰতিবাদ সাৱ্যস্ত কৰাৰ লগতে পুনেৰ আন আন ঠাইতো প্ৰতিবাদ সাব্যস্ত কৰা হয়। সকলোৱে অপৰাধীক কঠোৰতকৈ কঠোৰ শাস্তি দিয়াৰ দাবী জনাইছিল।
এই গোচৰটোৰ শুনানি ফাষ্ট ট্ৰেক আদালতত অতি ক্ষীপ্ৰতাৰে সম্পন্ন কৰা হয়। আৰক্ষীয়ে ঘটনাৰ দিনাই অভিযুক্তক গ্ৰেপ্তাৰ কৰি মাত্ৰ ১৬ দিনৰ ভিতৰত ১২০০ পৃষ্ঠাৰ অভিযোগনামা দাখিল কৰে। ২৮ মে‘ত আদালতে অভিযোগ গঠন কৰে আৰু ২০ জুনত চূড়ান্ত যুক্তি-তৰ্ক শেষ হয়। তাৰ পিছত ২৫ জুন তাৰিখে আদালতে দোষীক শাস্তি শুনায়।
ৰায়দানৰ সময়ত আদালতে স্পষ্ট কৰি দিয়ে যে উপযুক্ত প্ৰমাণ আৰু পৰিস্থিতিগত সাক্ষ্যৰ জৰিয়তে অপৰাধীৰ দোষ প্ৰমাণিত হৈছে। আদালতে কয় যে এইটো এটা অতি গুৰুতৰ অপৰাধ। লগতে উল্লেখ কৰে যে অভিযুক্ত আগতে দুটাকৈ গোচৰৰ পৰা খালাস পাইছিল, তথাপিও তেওঁৰ কোনো অনুশোচনা বা শুধৰণিৰ লক্ষণ দেখা নগ’ল। তেওঁ সমাজৰ বাবে এক ডাঙৰ ভাবুকি আৰু তেওঁৰ শুধৰণিৰ কোনো অৱকাশ নাই বুলি আদালতে মন্তব্য কৰে।
অভিযুক্তৰ হৈ ওকালতি কৰা অধিবক্তা হিম্মতৰাও সূৰ্যৱংশীয়ে যুক্তি দৰ্শাইছিল যে দুয়োকে একেলগে দেখা পোৱাৰ কোনো সঠিক প্ৰমাণ নাই। তেওঁ অভিযুক্তৰ বয়স আৰু পৰিয়ালৰ পৰা আঁতৰি থকাৰ কথা উল্লেখ কৰি মৃত্যুদণ্ডৰ সলনি যাৱজ্জীৱন কাৰাদণ্ডৰ দাবী জনাইছিল। আনহাতে, চৰকাৰী অধিবক্তা অজয় মিছাৰে অপৰাধৰ ভয়াবহতা আৰু ভুক্তভোগীৰ বয়সৰ প্ৰতি লক্ষ্য ৰাখি সৰ্বোচ্চ শাস্তি বিচাৰিছিল।
এই ৰায়দানক আদৰণি জনাইছে সাংসদ সুপ্ৰিয়া চুলেই। তেওঁ ছচিয়েল মিডিয়াত কয় যে অৱশেষত সৰু ছোৱালীজনী আৰু তাইৰ পৰিয়ালে ন্যায় পালে। এইটো এটা অতি দুখজনক ঘটনা আছিল আৰু অপৰাধীয়ে মৃত্যুদণ্ড পোৱাটোৱেই উচিত আছিল। এনেধৰণৰ গোচৰ ফাষ্ট ট্ৰেক আদালতত চলা উচিত বুলি তেওঁ সদায় মত পোষণ কৰি আহিছে। লগতে সঠিকভাৱে তদন্ত কৰি আদালতত প্ৰমাণ দাখিল কৰাৰ বাবে তেওঁ আৰক্ষী প্ৰশাসনকো ধন্যবাদ জ্ঞাপন কৰে।
