১৯৬০ চনত উদ্যোগপতি ৰতন টাটা প্ৰেমত পৰিছিল কেৰ’লিন ইমনছ নামৰ এগৰাকী যুৱতীৰ লগত। কেৰ’লিন আছিল আমেৰিকাৰ নাগৰিক। কিন্তু ভাৰত-চীন যুদ্ধৰ বাবে তেওঁলোকৰ প্ৰেমে পূৰ্ণতা লাভ নকৰিলে। সেই কথা সৰ্বজনবিদিত।
যোৱা মাহত টাটা গ্ৰুপৰ অধ্যক্ষ ৰতন টাটাৰ মৃত্যু হয়। তেওঁৰ জীৱনৰ বহু অজ্ঞাত কাহিনী তেওঁৰ মৃত্যুৰ পিছত প্ৰকাশ পাইছে। তাৰ ভিতৰত তেওঁৰ প্ৰথম প্ৰেমৰ কাহিনী উল্লেখযোগ্য।
কেৰ’লিনে আমেৰিকাত পঢ়ি থকাৰ সময়তে ৰতন টাটাক লগ পাইছিল। কেৰ’লিনৰ পিতৃ ফ্ৰেডেৰিক আৰ্ল ইমন্স এজন স্থপতিবিদ আৰু ৰতন টাটাৰ পিতৃৰ ব্যৱসায়িক সহযোগী আছিল। তেওঁলোকে একেলগে সফল স্থাপত্য প্ৰতিষ্ঠান ‘জোন্স এণ্ড ইমন্স’ প্ৰতিষ্ঠা কৰিছিল।
কেৰ’লিনে প্ৰথমবাৰৰ বাবে ১৯ বছৰ বয়সত ৰতন টাটাক দেখা পাইছিল। এই কাণ্ডৰ কথা মনত পেলাই কেৰ’লিনে কয়, “মই ৰতনক প্ৰথম দেখাতেই ভাল পাই পেলাইছিলোঁ। মোৰ মা-দেউতায়ো ৰতনক ভাল পাইছিল। কিন্তু সম্পৰ্কটো বেছি দিন নাথাকিল।”
১৯৬২ চনৰ জুলাই মাহত ৰতনে অসুস্থ আইতাকক লগ কৰিবলৈ ভাৰতলৈ উভতি আহে ইয়াৰ ফলত তেওঁৰ জীৱনৰ গতিপথ সলনি হয়।
কেৰ’লিনৰ জীৱনী অনুযায়ী তেওঁ আশা কৰিছিল যে তেওঁ ভাৰতলৈ যাব পাৰিব। কিন্তু সেই বছৰৰ ২০ অক্টোবৰৰ পৰা ভাৰত-চীন যুদ্ধ আৰম্ভ হয়। অৱশ্যে এমাহৰ ভিতৰত যুদ্ধবিৰতি ঘোষণা কৰা হয়। কিন্তু আমেৰিকাৰ দৃষ্টিত এই অঞ্চলত উত্তেজনা আছিল। এই সময়ৰ ব্যৱধানত ৰতন আৰু কেৰ’লিন পৃথক হ’ল।
ৰতন টাটাক জীৱনত দ্বিতীয়টো সুযোগ নিদিয়াৰ বাবে কেৰ’লিনে বাৰে বাৰে দুখ প্ৰকাশ কৰিছে। পিছলৈ তেওঁ স্থপতিবিদ আৰু পাইলট ৱেইন জ’নছৰ সৈতে বিবাহপাশত আবদ্ধ হয়।
কেৰ’লিনে নিজৰ জীৱনীত লিখিছে, “মই এনেকুৱা এজনক বিয়া কৰাইছিলো যিজন ঠিক ৰতনৰ দৰেই আছিল। ২০০৬ চনত স্বামীৰ মৃত্যু হয়।”
স্বামীৰ মৃত্যুৰ পিছত কেৰ’লিনাই ভাৰতলৈ অহাৰ ইচ্ছা প্ৰকাশ কৰিছিল। ই-মেইলযোগে তেওঁ পুনৰ ৰতন টাটাৰ সৈতে যোগাযোগ কৰি ভাৰতলৈ অহাৰ পৰিকল্পনাৰ বিষয়ে অৱগত কৰে। পিছৰ বছৰত কেৰ’লিনে প্ৰায় পাঁচ সপ্তাহ ভাৰতত কটায়।
কেৰ’লিনৰ কিতাপখনৰ মতে ৰতন টাটা আৰু কেৰ’লিনৰ লগ হৈছিল দিল্লীত। তেওঁলোকৰ পুৰণি সম্পৰ্ক পুনৰ উথলি উঠিছিল।
২০১৭ চনৰ ২৮ ডিচেম্বৰত মুম্বাইত ৰতনৰ ৮০ সংখ্যক জন্মদিনতো উপস্থিত আছিল কেৰ’লিন। তাৰ পিছত আকৌ ২০২১ চনত পুনৰ লগ হৈছিল দুয়ো।
ৰতন টাটা যেতিয়াই কৰ্মসূত্ৰে আমেৰিকালৈ যায়, তেতিয়াই তেওঁ কেৰ’লিনক লগ পাইছিল আনকি দুয়ো ৰাতিৰ আহাৰ খাবলৈও গৈছিল। গতিকে বহুতে কয় যে ৰতন টাটাই শেষ জীৱনত হেৰাই যোৱা প্ৰেম পুনৰ লাভ কৰিছিল।
