দুবছৰৰ অন্তত ৰাজ্যত অনুষ্ঠিত হ’ব বিধানসভা নিৰ্বাচন। তাৰ পূৰ্বে গুজৰাটৰ মন্ত্ৰীসভাৰ সালসলনি কৰা হৈছে। জানিব পৰা মতে শুকুৰবাৰে গুজৰাটৰ নতুন মন্ত্ৰীসকলে শপত গ্ৰহণ কৰিব। ইতিমধ্যে গুজৰাটৰ মুখ্যমন্ত্ৰী ভূপেন্দ্ৰ পেটেলে ৰাজ্যপালক সাক্ষাৎ কৰিছে।
নতুন মন্ত্ৰীসভাত চমক হৈছে বিশ্বকাপ বিজয়ী ক্ৰিকেটাৰ ৰবীন্দ্ৰ জাদেজাৰ পত্নী ৰিভাবা জাদেজা। মন কৰিবলগীয়া যে ভূপেন্দ্ৰ পেটেলৰ মুখ্যমন্ত্ৰীৰ কাৰ্যকালত এইবাৰ প্ৰথম গুজৰাটৰ মন্ত্ৰীসভাৰ সালসলনি কৰা হৈছে।
বৃহস্পতিবাৰে বিয়লি গুজৰাটৰ মুখ্যমন্ত্ৰীৰ বাহিৰে সকলো মন্ত্ৰীয়ে হঠাতে পদত্যাগ কৰে। তেতিয়াই ইংগিত দিয়া হৈছিল যে বিজেপিয়ে প্ৰতিষ্ঠানিক বিৰোধিতা চম্ভালিব পৰাকৈ সমগ্ৰ গুজৰাটৰ মন্ত্ৰীসভাৰ সংশোধন কৰিবলৈ ওলাইছে।
উল্লেখ্য যে বিগত সময়তো গুজৰাটৰ মুখ্যমন্ত্ৰীক হঠাৎ সলনি কৰাৰ নজিৰ গেৰুৱা শিবিৰৰ আছে। গতিকে এইবাৰ মুখ্যমন্ত্রী সলনি হোৱা নাই, কিন্তু গুজৰাটত সম্পূর্ণ কেবিনেট সলনি কৰা হৈছে৷
শুকুৰবাৰে পুৱা গুজৰাট বিজেপিয়ে প্ৰকাশ কৰে নতুন মন্ত্ৰীৰ তালিকা। এই তালিকাত স্বৰূপজী ঠাকুৰ, প্ৰভেংকুমাৰ মালি, ৰুশিকেশ পেটেল, দৰ্শনা বাঘেলা, কুঁৱৰজী বাৱলীয়া, ৰিভাবা জাদেজা, অৰ্জুন মধৱাদিয়া, পৰশোত্তম সোলংকী, জিতেন্দ্ৰ বাঘনী, প্ৰফুল্ল পানশ্বেৰিয়া, হৰ্ষ সাংঘী, কানুভাই দেশাই আদি নাম সন্নিবিষ্ট কৰা হৈছে।
অৱশ্যে এই মন্ত্ৰীসভাত এনে বহু লোক আছে যিয়ে পূৰ্বে গুজৰাটৰ মন্ত্ৰীসভাত দায়িত্ব লৈ আহিছে। সম্ভৱতঃ নতুন গুজৰাটৰ মন্ত্ৰীসভাত চাৰিখন নতুন মুখ দেখা যাব। সৰ্বভাৰতীয় সংবাদ মাধ্যমৰ এক প্ৰতিবেদন অনুসৰি গেৰুৱা শিবিৰৰ শীৰ্ষ নেতাসকলে মন্ত্ৰীসভা সম্প্ৰসাৰণৰ সিদ্ধান্ত লৈছে। বৰ্তমান ৰাজ্যত মন্ত্ৰীৰ সংখ্যা ১৬। সূত্ৰ অনুসৰি এই সংখ্যা ২৬ লৈ বৃদ্ধি কৰা হ’ব। অৰ্থাৎ মোডী-শ্বাহৰ ৰাজ্যত দহজন নতুন মন্ত্ৰী পাব। ইয়াৰে তিনিগৰাকী মহিলা হ’ব।
সূত্ৰ অনুসৰি শুকুৰবাৰে ২৪গৰাকী মন্ত্ৰীয়ে শপত গ্ৰহণ কৰিব। সেইবাবেই মুখ্যমন্ত্ৰী ভূপেন্দ্ৰ পেটেলে ৰাজ্যপাল আচাৰ্য দেৱব্ৰতক সাক্ষাৎ কৰে।
