ভাৰতীয় ৰিজাৰ্ভ বেংকে (আৰ বি আই) গ’ল্ড লোণৰ ক্ষেত্ৰত অনিয়ম ৰোধৰ বাবে কঠোৰ সিদ্ধান্ত লৈছে। নিয়মাৱলী কঠোৰ কৰি গ’ল্ড লোণ প্ৰক্ৰিয়াক অধিক স্বচ্ছ আৰু নিৰাপদ কৰাৰ পদক্ষেপ গ্ৰহণ কৰিছে। আৰ বি আইৰ গৱৰ্ণৰ সঞ্জয় মালহোত্ৰাই কয় যে বিগত বৰ্ষত গ’ল্ড লোণৰ অভূতপূৰ্ব বৃদ্ধিৰ পৰিপ্ৰেক্ষিতত শীঘ্ৰেই এই বিষয়ে বিশদ নিৰ্দেশনা জাৰি কৰা হ’ব।
২০২৫ চনৰ জানুৱাৰীলৈকে বেংক আৰু নন-বেংকিং বিত্তীয় কোম্পানীসমূহে (এনবিএফচি) প্ৰদান কৰা গ’ল্ড লোণৰ মুঠ পৰিমাণ ১.৭৮ লাখ কোটি টকা, যিটো পূৰ্বৰ বছৰৰ তুলনাত ৭৬.৯ শতাংশ বৃদ্ধি। এই বৃদ্ধিৰ বাবে বেংক আৰু এনবিএফচিৰ বাবে গ’ল্ড লোণ লাভজনক হৈ পৰিছে, কাৰণ ঋণ পৰিশোধ কৰিব নোৱাৰিলে সোণ নিলাম কৰাৰ সুবিধা আছে। বৰ্তমান ঋণৰ সময়সীমা বৃদ্ধি বা পুনৰ ঋণ ল’বলৈ সম্পূৰ্ণ মূলধন আৰু সুত পৰিশোধ কৰিব লাগিব।
আৰ বি আইয়ে গ’ল্ড লোণৰ প্ৰক্ৰিয়াত কেতবোৰ অনিয়ম চিনাক্ত কৰিছে- এইবোৰৰ ভিতৰত আছে তৃতীয় পক্ষৰ অত্যধিক হস্তক্ষেপ, গ্ৰাহকৰ অনুপস্থিতিত সোণৰ মূল্য নিৰ্ধাৰণ, ঋণ লওতাৰ পূৰ্ণাংগ পৰীক্ষাৰ অভাৱ, ঋণৰ ব্যৱহাৰৰ নিৰীক্ষণত দুৰ্বলতা, নিলামত স্বচ্ছতাৰ অভাৱ, ঋণ-মূল্য (এলটিভি) অনুপাতৰ ক্ষীণ নিৰীক্ষণ, আৰু বিপদৰ মূল্যায়নত ভুল।
এই সমস্যা সমাধানৰ বাবে আৰ বি আইয়ে সকলো বেংক আৰু এনবিএফচিক গ’ল্ড লোণৰ নীতি আৰু পদ্ধতি পুনৰীক্ষণ কৰি অসুবিধা চিনাক্ত কৰি তৎক্ষণাৎ ব্যৱস্থা ল’বলৈ নিৰ্দেশ দিছে। গ’ল্ড লোণৰ দ্ৰুত বৃদ্ধিৰ বাবে কঠোৰ নিৰীক্ষণৰ প্ৰয়োজনীয়তাৰ ওপৰত গুৰুত্ব দিয়া হৈছে। লগতে তৃতীয় পক্ষৰ সেৱাৰ ওপৰত নিয়ন্ত্ৰণ শক্তিশালী কৰাৰ নিৰ্দেশ দিয়া হৈছে।
গ’ল্ড লোণৰ সংকট ৰোধ কৰাৰ লক্ষ্য ৰাখি আৰ বি আইৰ এই কঠোৰ নিয়ম প্ৰৱৰ্তন কৰিছে। নতুন নিয়মে গ্ৰাহকৰ বাবে অতিৰিক্ত পৰীক্ষণৰ প্ৰয়োজন হ’ব পাৰে যদিও বিশেষজ্ঞসকলে আশা কৰিছে যে ঋণ প্ৰক্ৰিয়া অধিক স্বচ্ছ আৰু সুৰক্ষিত হ’ব।
