ভাৰতীয় ৰিজাৰ্ভ বেংকৰ গৱৰ্ণৰ সঞ্জয় মালহোত্ৰাই আজি দেশৰ মৌদ্ৰিক নীতি ঘোষণা কৰি জনাইছে যে কেন্দ্ৰীয় বেংকটোৱে ৰেপো ৰেট ৫.২৫ শতাংশতে অপৰিৱৰ্তিত ৰখাৰ সিদ্ধান্ত লৈছে।
শুকুৰবাৰে অনুষ্ঠিত হোৱা মৌদ্ৰিক নীতি সমিতিৰ বৈঠকত এই সিদ্ধান্ত সৰ্বসন্মতভাৱে গ্ৰহণ কৰা হয়। বিত্ত মন্ত্ৰী নিৰ্মলা সীতাৰমণে ২০২৬-২৭ বিত্তীয় বৰ্ষৰ বাজেট ঘোষণা কৰাৰ পাছত এয়া আছিল ৰিজাৰ্ভ বেংকৰ প্ৰথমটো গুৰুত্বপূৰ্ণ পৰ্যালোচনা।
গৱৰ্ণৰ মালহোত্ৰাই উল্লেখ কৰিছে যে বৰ্তমানৰ অৰ্থনৈতিক পৰিস্থিতি আৰু ভৱিষ্যতৰ সম্ভাৱনাৰ প্ৰতি লক্ষ্য ৰাখিয়ে এই নিৰপেক্ষ স্থিতি গ্ৰহণ কৰা হৈছে।
বিশ্বৰ অৰ্থনৈতিক প্ৰেক্ষাপটত কিছু প্ৰত্যাহ্বান বৃদ্ধি পালেও ভাৰতীয় অৰ্থনীতি এতিয়াও শক্তিশালী হৈ আছে বুলি গৱৰ্ণৰগৰাকীয়ে মন্তব্য কৰিছে।
শেহতীয়া বাণিজ্যিক চুক্তিসমূহে দেশৰ অৰ্থনৈতিক দিশত ইতিবাচক প্ৰভাৱ পেলাব বুলি আশা কৰা হৈছে। ইয়াৰ লগতে অহা দুটা ত্ৰৈমাসিকৰ বাবে দেশৰ মুঠ ঘৰুৱা উৎপাদন বা জিডিপি বৃদ্ধিৰ হাৰৰ পূৰ্বানুমান সংশোধন কৰি বৃদ্ধি কৰা হৈছে।
ইয়াৰ উপৰিও ২০২৫-২৬ বৰ্ষৰ বাবে গ্ৰাহক মূল্য সূচকাংক ভিত্তিক মুদ্ৰাস্ফীতিৰ হাৰ ২.১ শতাংশ হ’ব বুলি অনুমান কৰা হৈছে।
উল্লেখ্য যে যোৱা ডিচেম্বৰ মাহৰ বৈঠকত ৰেপো ৰেট ০.২৫ শতাংশ হ্ৰাস কৰি ৫.২৫ শতাংশ কৰা হৈছিল।
বেংকিং খণ্ডৰ উন্নয়নৰ বাবেও ৰিজাৰ্ভ বেংকে কেতবোৰ নতুন প্ৰস্তাৱ আগবঢ়াইছে। লিড বেংক ডাটা পৰিচালনাৰ বাবে এটা ইউনিফাইড পৰ্টেল স্থাপন কৰা আৰু এনবিএফচিসমূহৰ বাবে শাখা খোলাৰ নিয়ম শিথিল কৰাৰ কথা ঘোষণা কৰা হৈছে।
ইয়াৰ উপৰিও বেংকসমূহক কিছুমান সুৰক্ষামূলক ব্যৱস্থাৰ সৈতে ৰিয়েল ইষ্টেট ইনভেষ্টমেণ্ট ট্ৰাষ্টত ঋণ দিবলৈ অনুমতি দিয়া হ’ব। দেশৰ বজাৰত টকাৰ লেনদেন বা লিকুইডিটি সঠিক কৰি ৰাখিবলৈ কেন্দ্ৰীয় বেংক সক্ৰিয় হৈ থাকিব বুলিও গৱৰ্ণৰগৰাকীয়ে আশ্বাস দিছে।
জানুৱাৰী মাহৰ শেষলৈ দেশৰ বৈদেশিক মুদ্ৰাৰ ভাণ্ডাৰ ৭২৩.৮ বিলিয়ন ডলাৰৰ সৈতে যথেষ্ট সন্তোষজনক অৱস্থাত আছে বুলি তেওঁ জানিবলৈ দিয়ে।
