ভাৰতীয় ৰিজাৰ্ভ বেংকে দেশৰ সৰ্ববৃহৎ ব্যক্তিগত বেংকটোৰ বিৰুদ্ধে বৃহৎ জৰিমনা বিহিছে। শুকুৰবাৰে আৰ বি আইয়ে এইচ ডি এফ চি বেংকক ৯১ লাখ টকাৰ জৰিমনা বিহিব বুলি জানিবলৈ দিয়ে।
KYC (Know Your Customer), সুতৰ হাৰ আৰু আউটচ’ৰ্চিঙৰ সৈতে জড়িত নীতি-নিয়ম উলংঘা কৰাৰ বাবে এই জৰিমনা বিহা হৈছে। ২০২৪ চনৰ ৩১ মাৰ্চলৈকে আৰ বি আইয়ে এইচ ডি এফ চি বেংকৰ বিত্তীয় অৱস্থাৰ নিৰীক্ষণমূলক মূল্যায়ন চলাইছিল। সেই ভিত্তিত জৰিমনা বিহা হৈছে।
এইচ ডি এফ চি বেংকৰ জৰিমনা সন্দৰ্ভত আৰ বি আইয়ে এক বিবৃতিত কয়, ‘নিৰীক্ষণ মূল্যায়নৰ তথ্যৰ ভিত্তিত বি আৰ আইনৰ অধীনত ব্যৱস্থা গ্ৰহণ কৰা হৈছে। এই সন্দৰ্ভত সংশ্লিষ্ট বেংকলৈ জাননী প্ৰেৰণ কৰা হৈছে। এই গাফিলতিৰ বাবে কিয় শাস্তি প্ৰদান কৰিব নালাগে তাৰ কাৰণ দেখুৱাবলৈও কোৱা হৈছে।’
এইচ ডি এফ চি বেংকে একে শ্ৰেণীৰ ঋণৰ বাবে একাধিক মাপকাঠী নিৰ্ধাৰণ কৰাৰ অভিযোগ আনিছে আৰ বি আইয়ে। যিটো ৰিজাৰ্ভ বেংকৰ নিয়মৰ পৰিপন্থী।
ইয়াৰ লগতে বহু গ্ৰাহকৰ কে ৱাই চি আউটচ’ৰ্চিং এজেণ্টক দিয়াৰ অভিযোগো উত্থাপন হৈছে। এই সকলোবোৰ কাৰণতে এইচ ডি এফ চি বেংকে জৰিমনাৰ সন্মুখীন হ’বলগীয়া হৈছে।
