ইউনিফাইড কাৰাটে এছ’চিয়েছন অৱ অসমে (ইউকেএএ) ১৮তম সংস্কৰণ ষ্টেট কাৰাটে চেম্পিয়নশ্বিপ, ২০২৫ আৰু KIO ৰেফাৰীৰ পাঠ্যক্ৰমৰ সম্ভাৱ্য আয়োজনক লৈ প্ৰশ্নৰ অৱতাৰণা হৈছে।
এই কাৰ্যসূচী অহা ২-৪ মে’ তাৰিখে মৰিয়নি কলেজ ইনড’ৰ ষ্টেডিয়াম, যোৰহাটত অনুষ্ঠিত হ’ব বুলি নিৰ্ধাৰণ কৰা হৈছে।
জানিব পৰা মতে, ইউনিফাইড কাৰাটে এছ’চিয়েছন অৱ অসমে যি সময়চোৱাত এই বৃহৎ ক্রীড়া অনুষ্ঠানটি আয়োজন কৰিব বুলি জাননী দিছে, সেই সময়ত পঞ্চায়ত নিৰ্বাচনৰ বাবে মডেল ক’ড অৱ কণ্ডাক্ট (MCC) বা নিৰ্বাচনী আচৰণ বিধি প্ৰযোজ্য হৈ থাকিব।
নিৰ্বাচনী আয়োগ বা অন্য সংশ্লিষ্ট সংস্থাৰ পূৰ্ব অনুমতি নোহোৱাকৈ এনে অনুষ্ঠানৰ আয়োজন নিৰ্বাচনী আচৰণ বিধি উলংঘা কৰিব বুলি বিবেচিত হ’ব।
এই চেম্পিয়নশ্বিপত খেলুৱৈ, জিলা বিষয়া আৰু জনসাধাৰণৰ সমাগম থাকে, যিয়ে নিৰ্বাচনী পৰিবেশত প্ৰভাৱ পেলাব পাৰে, প্ৰশাসনিক যন্ত্ৰৰ মনোযোগ আঁতৰাব পাৰে আৰু জনমতত প্ৰভাৱ পেলাব পাৰে। সেয়া নিৰ্বাচনৰ স্বচ্ছতা আৰু নিৰপেক্ষতাৰ ওপৰত প্ৰভাৱ পেলাব পৰা এনেধৰণৰ কাৰ্যসূচী আয়োজনৰ অনুমতি নিদিয়াটো নিশ্চিত কৰাটো গুৰুত্বপূৰ্ণ।
আনহাতে, আয়োজকসকলে এই অনুষ্ঠানৰ বাবে ব্যাপক প্ৰচাৰ চলোৱাৰ পিছতো জিলা প্ৰশাসন বা সংশ্লিষ্ট কৰ্তৃপক্ষৰ দৃষ্টিগোচৰ নোহোৱাত প্ৰশ্নৰ অৱতাৰণা হৈছে। দায়িত্ববাহী বিষয়াসকলে দিছপুৰৰ হস্তক্ষেপ অবিহনে নিজাববীয়াকৈ কোনো ব্যৱস্থা গ্ৰহণ কৰিব নোৱাৰাটো দুৰ্ভাগ্যক বুলিও মত পোষণ কৰিছে একাংশই।
একাংশ সচেতন লোকে নিৰ্বাচনী প্ৰক্ৰিয়া সম্পূৰ্ণ হোৱাৰ পাছত অনুষ্ঠানটো আয়োজন কৰিবলৈ নিৰ্দেশ দিয়াৰ বাবে সংশ্লিষ্ট কৰ্তৃপক্ষক প্ৰয়োজনীয় ব্যৱস্থা গ্ৰহণ কৰিবলৈও আহ্বান জনাইছে।
