১। পালেং পনীৰ (পালক পনীৰ)
উপকৰণ:
পালেং শাক- ২মুঠি
পনীৰ- ৩০০গ্ৰাম
তেজপাত- ২খিলা
গোটা জীৰা- কেইটামান (ফোঁৰণৰ বাবে)
পিঁয়াজ- ৩টা (পে’ষ্ট কৰা)
কাজু পে’ষ্ট- ২চামুচ
পনীৰ পে’ষ্ট- ২চামুচ
জীৰা গুড়ি- ১চামুচ
ধনিয়া গুড়ি- ১চামুচ
পনীৰ মচলা- ১চামুচ
জলকীয়া- ২টা
টমেট’ চচ- ১টেবুল চামুচ
নিমখ, হালধি, তেল জোখ অনুপাতে
ৰন্ধন প্ৰণালী:
পনীৰখিনি নিজৰ পছন্দ মতে কাটি ল’ব৷ পালেংখিনি নিমখ দি সিজাই মিক্সিত পে’ষ্ট বনাই ল’ব৷ কেৰাহীত তেল গৰমাই তেজপাত, গোটা জীৰা কেইটামান দি ফোঁৰণ দিব৷ তাতে পিয়াঁজৰ পে’ষ্টখিনি দি ৰঙচুৱাকৈ ভাজি ল’ব৷ কাজুৰ পে’ষ্ট, পনীৰ পে’ষ্ট, নিমখ, হালধি ,জীৰা গুড়ি, ধনীয়া গুড়ি, পনীৰ মচলা দি কেঁচা জলকীয়া দুটা ফালি দিব৷ টমেট’ চচ্ অলপ দিব৷ এতিয়া পালেঙৰ পে’ষ্টখিনি দি অলপ ভাজি জোখমতে পানী দি উতলিবলৈ দিব৷ উতল আহিলে পনীৰখিনি দি দিব৷ জোলখিনি ডাঠ হৈ আহিলে নমাই পৰিৱেশন কৰিব৷
২। দোৰোণ শাকৰ খাৰ
উপকৰণ:
দোৰোণ শাক- ২মুঠি
বুট- ১মুঠি
পিয়াঁজ- ১টা
নহৰু- ৮কোঁহ
আদা- এটুকুৰা
জলকীয়া- ২টা
কলাখাৰ- ২চামুচ
মিঠাতেল- ১টেবুল চামুচ
নিমখ- সোৱাদ অনুসৰি
১চাহ চামুচ মিঠাতেল- খাৰ নমোৱাৰ পিছত দিব
প্ৰণালী:
দোৰোণ শাকখিনি বাচি, ধুই লৈ মিহিকৈ কুটি ল’ব৷ বুট কেইটামান তিয়াই কোমলাই ল’ব৷ কেৰাহীত তেল গৰম কৰি আদা-নহৰু অলপ থেতালি দি পিয়াঁজখিনি দিব৷ কেঁচা জলকীয়া ২টা ফালি দিব৷ তাৰপিছত শাকখিনি দি অলপ লৰাই বুটকেইটাও দি দিব৷ সোৱাদ অনুসৰি নিমখো দিব৷ প্ৰয়োজন অনুসৰি পানী দিব৷ পানী উতলি আহিলে কলাখাৰ দি ঢাকোন লগাই সিজিবলৈ দিব৷ শাকখিনি সিজি থূপথূপীয়া হ’লে নমাই কেঁচা মিঠাতেল এচামুচ দি গৰমে গৰমে পৰিৱেশন কৰিব৷
৩| কেপচিকাম চিকেন ড্ৰাই ফ্ৰাই
উপকৰণ:
চিকেন- ৫০০গ্ৰাম
কেপচিকাম- ১টা (ডাঙৰ)
পিয়াঁজ- ৪টা (চকলবোৰ ডাঙৰকৈ কাটিব)
দৈ- আধা কাপ
নেমু ৰস- ১চামুচ
জীৰা গুড়ি- ১চামুচ
ধনীয়া গুড়ি- ১চামুচ
জলকীয়া গুড়ি- ১চামুচ
কেঁচা জলকীয়া- ৩টা
টমেট’ চচ- ১টেবুল চামুচ
চ’য়া চচ- ১টেবুল চামুচ
জালুক গুড়ি- ১চামুচ
নিমখ, হালধি, তেল আন্দাজমতে
প্ৰণালী:
মাংসখিনিত প্ৰথমে নিমখ, হালধি, মিঠাতেল, জীৰা গুড়ি, ধনীয়া গুড়ি, জলকীয়া গুড়ি, দৈ, নেমু ৰস সানি আধা ঘণ্টাৰ বাবে ঢাকি থ’ব৷ আধাঘণ্টাৰ পিছত কেৰাহীত তেল গৰম কৰি মাংসখিনি ফ্ৰাই কৰি উঠাই থ’ব৷
সেই তেলতে পিয়াঁজ, কেপ্চিকাম দি অলপ ভাজি ল’ব৷ নিমখ, হালধি দি লৰাই কেঁচা জলকীয়া ফালি দিব৷ তাৰপিছত টমেট’ চচ্ আৰু চ’য়া চচ্ দি লৰাই মাংসখিনি দি দিব৷ জালুক গুড়ি অলপ দিব৷ এইদৰে অলপ সময় ভাজি লৈ নমাই পৰিৱেশন কৰিব৷