শেহতীয়াকৈ দেশ-বিদেশৰ সংবাদ মাধ্যমত মুকেশ আম্বানী আৰু তেওঁৰ পৰিয়ালে ভাৰত ত্যাগ কৰি লণ্ডনলৈ যাব বুলি প্ৰচাৰিত খবৰে বেছ চৰ্চা লাভ কৰা পৰিলক্ষিত হৈছে।
সংবাদমাধ্যমত প্ৰকাশিত খবৰ অনুসৰি দেশৰ আটাইতকৈ ধনী ব্যক্তি মুকেশ আম্বানীয়ে শেহতীয়াকৈ লণ্ডনত এটা নতুন ঘৰ লৈছে।
মুম্বাইত আম্বানীৰ সুদৃশ্য বাসভৱন এণ্টিলা থকাৰ পিছতো আম্বানীৰ পৰিয়ালে তেওঁলোকৰ বাবে দ্বিতীয় এটা বাসস্থানৰ অভাৱ অনুভৱ কৰি আছিল।
সেইমৰ্মে আম্বানীয়ে লণ্ডনৰ বিলাসবহুল অঞ্চলত অৱস্থিত বাকিংহামশ্বায়াৰ মেনছন ক্ৰয় কৰিছে।
চলিত বৰ্ষৰ প্ৰথম ভাগতে আম্বানীয়ে লণ্ডনৰ ৩০০ একৰ মাটিৰে আগুৰা এই অঞ্চলটো ক্ৰয় কৰিছিল।
আম্বানীয়ে ৫৯২ কোটি টকাৰ বিনিময়ত এই ভৱনটো ক্ৰয় কৰিছে। সুন্দৰ প্ৰাকৃতিক পৰিবেশৰ মাজত অৱস্থিত বাকিংহামশ্বায়াৰ মেনছনত আছে ৪৯ টা শোৱনী কোঠা।
প্ৰতিটো কোঠাই সজাই তোলা হৈছে আটক ধুনীয়াকৈ।
কেৱল সেয়াই নহয় বাকিংহামশ্বায়াৰ মেনছনত আছে এখন সৰু চিকিৎসালয়ো।
এগৰাকী ব্ৰিটিছ টিকিৎসকৰ নেতৃত্বত পৰিচালিত হয় এই চিকিৎসালয় খন। আম্বানী পৰিয়ালৰ বেমাৰ-আজাৰ হ’লে প্ৰথমে এই চিকিৎসালয়তে জৰুৰীকালীন চিকিৎসা গ্ৰহণ কৰিব পাৰিব।
বাকিংহামশ্বায়াৰ মেনছন যি স্থানত অৱস্থিত সেই স্থানক ষ্টক পাৰ্ক বুলিও জনা যায়। ষ্টক পাৰ্ক বিতোপন প্ৰাকৃতিক দৃশ্যৰে পৰিপূৰ্ণ।
মুম্বাইৰ কোলাহলপূৰ্ণ পৰিবেশৰ পৰা ওলাই আহি প্ৰকৃতিৰ নিৰিবিলি পৰিবেশত বাস কৰাৰ বাবেই আম্বানীৰ পৰিয়ালে বাকিংহামশ্বায়াৰ মেনছন ক্ৰয় কৰিছে।
প্ৰকাশিত খবৰ অনুসৰি প্ৰতিবছৰে আম্বানীৰ পৰিয়ালে দীপাৱলী এণ্টিলাতেই উদযাপন কৰি আহিছিল যদিও এইবাৰ বাকিংহামশ্বায়াৰ মেনছনত দীপাৱলী উদযাপন কৰিছে।
আম্বানী পৰিয়ালে বাকিংহামশ্বায়াৰ মেনছন ক্ৰয় কৰা বুলি সংবাদমাধ্যমত খবৰ ওলোৱাৰ পিছতে মুকেশ আম্বানীৰ মালিকানাধীন ৰিলায়েন্সে এই বিষয়ত স্পষ্টীকৰণ দি কৈছে যে আম্বানীৰ পৰিয়ালে ভাৰত এৰি লণ্ডনত থাকিব বুলি প্ৰচাৰিত বাতৰিৰ কোনো সত্যতা নাই।
ভাৰতক বাদ দি আম্বানীৰ পৰিয়ালে লণ্ডনেই নহয়, বিশ্বৰ আন কোনো স্থানতে বাস কৰিবলৈ নাযায় বুলি ৰিলায়েন্সৰ ফালৰ পৰা স্পষ্ট কৰি দিয়া হৈছে।
লণ্ডনৰ বাকিংহামশ্বায়াৰ মেনছন ক্ৰয় কৰাৰ কথা স্বীকাৰ কৰি ৰিলায়েন্সে কৈছে যে ৰিলায়েন্সৰ সহযোগী প্ৰতিষ্ঠান RIIHL-এ ষ্টক পাৰ্ক ক্ৰয় কৰাটো সঁচা।
সেই স্থানত গলফৰ লগতে আন ক্ৰীড়াৰ পৰিবেশ গঢ়ি তোলাৰ বাবেহে সেয়া ক্ৰয় কৰা হৈছে বুলি ৰিলায়েন্সে মন্তব্য কৰিছে।
