সকাহ! ভাৰতীয় নৌসেনাৰ প্ৰাক্তন ৮ জোৱানৰ মৃত্যুদণ্ডৰ শাস্তি হ্ৰাস কাটাৰৰ
ইজৰায়েলৰ হৈ চোৰাংচোৱাগিৰি কৰাৰ অভিযোগত কাটাৰত মৃত্যুদণ্ডৰে দণ্ডিত ভাৰতীয় নৌসেনাৰ প্ৰাক্তন ৮ জন জোৱানৰ শাস্তি হ্ৰাস কৰা হৈছে।
আজি ভাৰত চৰকাৰে এক বিবৃতি যোগে এই কথা প্ৰকাশ কৰে। ইতিপূৰ্বে কাটাৰৰ প্ৰথম পৰ্যায়ৰ আদালতে নৌসেনাৰ প্ৰবীণ সৈনিকসকলক মৃত্যুদণ্ডৰ শাস্তি বিহাৰ খবৰে চাঞ্চল্যৰ সৃষ্টি কৰিছিল।
এই শাস্তিৰ বিৰুদ্ধে ভাৰত চৰকাৰে কাটাৰৰ ওচৰত আবেদন দাখিল কৰিছিল আৰু কাটাৰেও আবেদন বিবেচনা কৰা হ’ব বুলি উল্লেখ কৰিছিল
সেই অনুসৰি এতিয়া প্ৰাক্তন বিষয়াকেইজনৰ শাস্তি হ্ৰাস কৰা হৈছে। অৱশ্যে এই গোচৰৰ বিশদ ৰায়ৰ বাবে অপেক্ষা কৰি থকা বুলি জানিবলৈ দিয়ে বৈদেশিক পৰিক্ৰমা মন্ত্ৰালয়ে।
লগতে পৰৱৰ্তী পদক্ষেপ সন্দৰ্ভত সিদ্ধান্তৰ বাবে আইনী দলৰ লগতে পৰিয়ালৰ সদস্যৰ সৈতেও ভাৰতীয় কৰ্তৃপক্ষই যোগাযোগ ৰক্ষা কৰি আছে বুলি সদৰী কৰা হৈছে।
আজি গোচৰটোৰ বিবেচনাৰ সময়ত কাটাৰত থকা ভাৰতীয় ৰাষ্ট্ৰদূত আৰু অন্যান্য বিষয়াসকলৰ লগতে শাস্তিৰ সন্মুখীন হোৱা বিষয়াকেইজনৰ পৰিয়ালৰ সদস্যসকলো আপিল আদালতত উপস্থিত আছিল।