মেঘালয়ত ক’ৰ’না ভাইৰাছৰ পৰিস্থিতি যদিহে উন্নত হয় তেন্তে অক্টোবৰৰ প্ৰথম সপ্তাহৰ পৰা মেঘালয়ত ধৰ্মীয় স্থান সমূহ খোলাৰ সিদ্ধান্ত গ্ৰহণ কৰিছে মেঘালয় চৰকাৰে।
সোমবাৰে মুখ্য মন্ত্ৰী কনৰাড চাংমাৰ নেতৃত্বত অনুষ্ঠিত হোৱা কেবিনেট বৈঠকত মেঘালয় চৰকাৰে এই সিদ্ধান্ত গ্ৰহণ কৰে।
বৈঠকৰ অন্তত মেঘালয়ৰ উপ-মুখ্য মন্ত্ৰী প্ৰেষ্ট’ন টাইচংঙে কয় যে মেঘালয়ৰ মুখ্য সচিৱৰ নেতৃত্বত বিভিন্ন ধৰ্মীয় গোটক উপস্থিতিত এখন সমিতি গঠন কৰি দিয়া হৈছে আৰু এই কমিটিয়ে ৰাজ্যখনৰ শেহতীয়া পৰিস্থিতি অধ্যয়ন কৰি অক্টোবৰৰ প্ৰথম সপ্তাহৰ পৰা মেঘালয়ত ধৰ্মীয় স্থান সমূহ খোলাৰ ক্ষেত্ৰত সিদ্ধান্ত গ্ৰহণ কৰিব।
মেঘালয় চৰকাৰে ৰাজ্যখনত ধর্মীয় স্থানৰ লগতে পৰ্যটন স্থান সমূহো পৰ্যায়ক্ৰমে খোলাৰ সিদ্ধান্ত গ্ৰহণ কৰিছে।
মেঘালয়তো ক’ৰ’না ভাইৰাছৰ সংক্ৰমণ অব্যাহত আছে যদিও অসমৰ তুলনাত মেঘালয় চৰকাৰে যথেষ্ঠ পৰিমাণে ক’ৰ’না ভাইৰাছক নিয়ন্ত্ৰণ কৰিবলৈ সক্ষম হৈছে।
