১৮৯৫ চনৰ ১৫ ছেপ্টেম্বৰত বৰপেটাৰ শিলা গাঁৱত জন্মগ্ৰহণ কৰা শিল্পী সৈনিক ব্ৰজনাথ শৰ্মা অসমৰ জাতীয় জীৱনৰ এটা পাহৰিব নোৱৰা নাম। এগৰাকী সৈনিক ব্ৰজনাথে স্বাধীনতা আন্দোলনত স্বদেশৰ বাবে লোৱা ভূমিকাৰ কথা ইতিহাসৰ এটি স্বৰ্ণিল অধ্যায়।
বৰনগৰৰ বুকুত বিপ্লৱৰ নিচান উৰুৱাই ব্ৰিটিছৰ নিদ্ৰাহৰণ কৰা ‘বজ্ৰ ওস্তাদ’ৰ জীৱনটোও আছিল সংগ্ৰামৰেই নামান্তৰ। নানা ঘাত-প্ৰতিঘাতৰ মাজতো থমকি নোৰোৱা এটা অপৰাজেয় সত্ত্বা আছিল ব্ৰজ শৰ্মা।
একাধাৰে সুদক্ষ অভিনেতা, নাট্যকাৰ আৰু অসমৰ ভ্ৰাম্যমাণ নাটকৰ জনক তথা সহ অভিনয়ৰ বাটকটীয়া ব্ৰজনাথ শৰ্মাই তদানীন্তন ৰক্ষণশীল সমাজখনৰ প্ৰত্যাহ্বান নেওচি অসমীয়া শিল্প-সংস্কৃতিৰ বাবে অহোপুৰুষাৰ্থ কৰাই নহয়, ’৪২ৰ ভাৰত ত্যাগ আন্দোলনত সৰভোগৰ বেঁকী নৈৰ পাৰত থকা ব্ৰিটিছৰ সামৰিক ঘাটি নিশাৰ ভিতৰতে জ্বলাই দি ইংৰাজৰ প্ৰভুত্বকো প্ৰত্যাহ্বান জনাইছিল।
বৰনগৰৰ এদল দুৰন্ত সহযোদ্ধাক লগত লৈ ব্ৰজ শৰ্মাই অসীম সাহসেৰে, সুপৰিকল্পিতভাৱে বিমান ঘাটি জ্বলাই দি বৰনগৰত স্বাধীনতা সংগ্ৰামৰ ইতিহাসত এক বীৰগাঁথাৰ সংযোজন ঘটাইছিল।
ৰাজ্য চৰকাৰে ইতিমধ্যে শিল্পীগৰাকীৰ নামত সৈনিক শিল্পী ব্ৰজনাথ শৰ্মা বঁটা প্ৰৱৰ্তন কৰিছে। বৰনগৰত তেওঁৰ এটা প্ৰতিমূৰ্তি স্থাপনো কৰিলে। বহু অপেক্ষাৰ অন্তত সৈনিক শিল্পীগৰাকীয়ে চৰকাৰী স্বীকৃতিবোৰ যেন পাবলৈ আৰম্ভ কৰিছে।
অভিনয়াচাৰ্য হিচাপে স্বীকৃতি পোৱা ব্ৰজনাথ শৰ্মাই সেই সময়ৰ অসমত যি নাট্য আন্দোলনৰ সূচনা কৰিছিল, তাৰ বাবে তেওঁ যি ত্যাগ কৰিছিল, সেই সকলোবোৰ ইতিহাসৰ এটি অবিস্মৰণীয় অধ্যায়।
স্বাধীনতা আন্দোলনৰ ১৪১ গৰাকী বীৰ মুক্তিযোদ্ধাৰ বীৰভূমি বৰনগৰতে নাট্য আন্দোলনৰ সূচনা কৰি তথা সহ-অভিনয়ৰ পাতনি মেলি ব্ৰজনাথ শৰ্মাই যুগান্তকাৰী ইতিহাসৰ সৃষ্টি কৰি গৈছে।
১৯৬০ চনৰ ১২ ছেপ্টেম্বৰত অভিনয়াচাৰ্য ব্ৰজনাথ শৰ্মাই ইহলীলা সম্বৰণ কৰে। চৰম চৰকাৰী অৱহেলাৰ সন্মুখীন হৈ কৰুণ মৃত্যুক সাৱটি লোৱা শৰ্মাদেৱৰ আপোচহীন সংগ্ৰামী সত্ত্বাই শেষ মুহূৰ্তলৈকে কোনো প্ৰলোভনৰ ওচৰত হাৰ মনা নাছিল।
শিল্পী সৈনিক ব্ৰজনাথ শৰ্মাৰ বৰনগৰৰ দক্ষিণ গণকগাড়ী গাঁৱত থকা বাসগৃহটো এতিয়াও পৰিত্যক্ত হৈ পৰি ৰৈছে। জীৱনকালত তেওঁ চ’ৰাঘৰ হিচাপে ব্যৱহাৰ কৰা এই ঘৰটোৰ সৈতে ’৪২ৰ সংগ্ৰামৰ বহু স্মৃতি বিজড়িত হৈ আছে। বৰনগৰৰ বেঁকী নৈৰ পাৰত ঔপনিবেশিক ব্ৰিটিছে স্থাপন কৰা সামৰিক ঘাটি জ্বলাই দিয়াৰ পৰিকল্পনা ৰচনা কৰা হৈছিল এই ঘৰটোতে। ইতিহাসৰ সাক্ষী এই বাসগৃহটো চৰকাৰে সংৰক্ষণ কৰাটো বিচাৰিছে বৰনগৰৰ সুধী সমাজে।
আজি সৈনিক শিল্পী ব্ৰজনাথ শৰ্মাৰ মৃত্যু তিথি। এই দিনটোত বিপ্লৱী শিল্পীগৰাকীলৈ একাঁজলি শ্ৰদ্ধাঞ্জলি যাচিছোঁ।
