নাগাৰা নামৰ একান্ত সাধক তথা প্ৰবীণ শিল্পী ৰামচৰণ ভৰালীৰ দেহাৱসান ঘটিছে। কালি নিশা ১২.২০ বজাত নলবাৰীৰ কুমাৰীকাটাৰ নিজ বাসগৃহত শিল্পীগৰাকীয়ে শেষ নিশ্বাস ত্যাগ কৰে।
ৰামচৰণ ভৰালীয়ে ১৯৬৭ চনত তেওঁৰ গাঁৱতে এটা নাগাৰা নামৰ দল খোলাৰ পিছত নাগাৰা নামৰ জগতত আলোড়ণৰ সৃষ্টি কৰে। তেওঁ নাগাৰা নামক তেওঁৰ জীৱিকা আৰু নিচা হিচাপে গ্ৰহণ কৰিছিল। তেওঁ নাগাৰা নাম সংঘৰ সভাপতিও আছিল।
ৰামচৰণ ভৰালী “নাগাৰা নামৰ পাঠক” আৰু “নাগাৰা নামৰ সূৰ্য” বুলি পৰিচিত হৈ পৰিছিল। তেওঁৰ জনপ্ৰিয়তা কেবল মনোৰঞ্জনৰ বাবেই নাছিল, তেওঁৰ এই শিল্পৰ প্ৰতি থকা অগাধ জ্ঞান আৰু দক্ষতাৰ বাবেও সকলোৰে মাজত আদৰণীয় হৈ পৰিছিল।
ৰামচৰণ ভৰালীয়ে নাগাৰা নামৰ জগতত প্ৰৱেশ কৰাৰ পূৰ্বে ১১ বছৰ কাল যাত্ৰা দলৰ সৈতে জড়িত আছিল। তাত তেওঁ প্ৰথমতে নৃত্য কৰাৰ লগতে পিছলৈ গান গোৱাৰ লগতে অভিনয়ো কৰিছিল।
১৯৮৫ চনতে ৰামচৰণ ভৰালীৰ নাগাৰা নামৰ কেছেট ওলাইছিল আৰু জনপ্ৰিয় হৈ পৰিছিল। ভৰালীৰ প্ৰায় ৯০ খন মান নাগাৰা নামৰ কেছেট আছে।
তেওঁৰ মৃত্যুত অসমৰ নাগাৰা নামৰ এটা যুগৰ অৱসান ঘটিল।
