ৰাষ্ট্ৰীয় নাগৰিকপঞ্জীৰ চূড়ান্ত তালিকাত নাম অন্তৰ্ভুক্ত নহ’ল বিজ্ঞানী ড০ জিতেন্দ্ৰ নাথ গোস্বামীৰ। গোস্বামীৰ লগতে এন আৰ চিত নাম নাই তেওঁৰ পৰিয়ালৰো।
এই সন্দৰ্ভত অসম সন্তান প্ৰসিদ্ধ বিজ্ঞানীগৰাকীৰ সৈতে যোগাযোগ কৰাত তেওঁ নৰ্থ-ইষ্ট নাওক কয়, ‘’আমি যোৱা ২০ বছৰ ধৰি আহমেদাবাদতে আছো। এন আৰ চি প্ৰক্ৰিয়াৰ বাবে যিখিনি কৰণীয় আছিল হয়তো আমাৰ সেইখিনি কৰা নহ’ল। তাৰ বাবেই হয়তো আমাৰ নাম অন্তৰ্ভুক্ত নহ’ল। কিন্তু অসমত আমাৰ পৰিয়ালৰ সকলো আছে, যোৰহাটত আমাৰ মাটি-বাৰীও আছে। গতিকে ভৱিষ্যতে যদি কিবা অসুবিধা হয় সেয়া দেখুৱাই কিবা এটা কৰিব লাগিব।‘’
উল্লেখ্য যে, বিজ্ঞানী ড০ জিতেন্দ্ৰ নাথ গোস্বামীৰ ভাতৃ অসম বিধান সভাৰ অধ্যক্ষ হিতেন্দ্ৰ নাথ গোস্বামী।
ভাতৃৰ কথা উল্লেখ কৰি ড০ গোস্বামীয়ে কয় য়ে তেওঁ এই বিষয়ত হিতেন্দ্ৰ নাথ গোস্বামীৰ লগত কথা পাতিব আৰু হ’ব পৰা অসুবিধাৰ ক্ষেত্ৰত কি কৰিব লাগিব তাৰ পৰামৰ্শ তেওঁৰ পৰা ল’ব।
আনহাতে, অধ্যক্ষ গোস্বামীয়ে নর্থ-ইষ্ট নাওক কয়,‘’তেওঁ তাত (আহমেদাবাদত) থাকে, তাতেই ভোট দি আহিছে। গতিকে তাত তেওঁ ভাৰতীয় নাগৰিক হিচাপেই আছে। তেওঁ যেতিয়া ইয়ালৈ নাহে, গতিকে অসমৰ এন আৰ চিত তেওঁৰ নাম অহা-নহাটো কোনো কথা নাই।‘’
তদুপৰি, তেওঁ জানিবলৈ দিয়ে যে তেওঁলোকে ককায়েকক এই বিষয়ে অৱগত কৰিছিল যদিও তেওঁ কৈছিল যে তেওঁ যিহেতু ভাৰতীয় নাগৰিক হিচাপে তাত আছেই, গতিকে অসমত এন আৰ চিত তেওঁৰ নাম অন্তৰ্ভুক্ত কৰাৰ কোনো কথা নাই।
অধ্যক্ষ গোস্বামীয়ে জানিবলৈ দিয়া মতে জিতেন্দ্ৰ নাথ গোস্বামীয়ে ইচ্ছা প্ৰকাশ নকৰা বাবেহে তেওঁলোকে তেওঁৰ তথা পৰিয়ালৰ নাম অসমৰ এন আৰ চিত অন্তৰ্ভুক্ত নকৰিলে।
উল্লেখযোগ্য যে ইছৰো’ৰ দ্বাৰা সফলভাৱে আৰম্ভ হোৱা চন্দ্ৰযান-২ মিছনত উপদেষ্টা সঞ্চালক হিচাপে জড়িত হৈ আছে অসমৰ মহাকাশ বিজ্ঞানী ড০ জিতেন্দ্ৰ নাথ গোস্বামী। তদুপৰি, গোস্বামী ভাৰতৰ মংগল অভিযানৰ লগতো জড়িত হৈ আছিল।
ইতিমধ্যে অসমৰ বহু বিশিষ্ট ব্যক্তি তথা মুক্তিযোদ্ধা আদিৰ পৰিয়ালৰ নামো এন আৰ চিৰ চূড়ান্ত তালিকাৰ পৰা বাদ পৰাৰ কথা পোহৰলৈ আহিছে।