অষ্ট্ৰেলিয়াৰ পৰা অহা এখন জাহাজ আমেৰিকা অভিমুখে গৈ আছিল। হঠাৎ জাহাজখন হংকঙৰ ফালে ঘূৰি আহিল। জাহাজখনত আমেৰিকাৰ এফ ৩৫ বিমানৰ সঁজুলি আছিল। সেইদৰেই জাহাজখন হংকঙৰ ফালে আগবাঢ়িল।
সন্দেহ কৰা হৈছে যে আমেৰিকাৰ যুদ্ধজাহাজ অৰ্থাৎ এই এফ ৩৫ বিমানৰ সঁজুলি চীন কৰ্তৃপক্ষৰ হাতত পৰিব পাৰে। ‘দ্য পলিটিকো’ৰ এক নতুন প্ৰতিবেদনত এনে তথ্য প্ৰকাশ পাইছে।
কিছুদিন পূৰ্বে এটা বাতৰি ওলাইছিল যে আমেৰিকাৰ চোৰাংচোৱা সংস্থাই সকীয়াই দিছে যে চীনে সম্ভৱতঃ আমেৰিকাৰ যুদ্ধ বিমান F35 ৰ প্ৰযুক্তি চুৰি কৰিবলৈ চেষ্টা কৰিছে। চৌদি আৰৱক এফ-৩৫ যুঁজাৰু বিমান বিক্ৰী কৰাৰ প্ৰক্ৰিয়াৰ সময়ত চোৰাংচোৱা বিশ্লেষকসকলে এই সম্ভাৱনাৰ বিষয়ে সকীয়াই দিছিল বুলি ‘দ্য নিউয়ৰ্ক টাইমছ’ৰ এক প্ৰতিবেদনত দাবী কৰা হৈছে।
এইবাৰ ‘দ্য পলিটিকো’ৰ প্ৰতিবেদনত কোৱা হৈছে যে আমেৰিকাৰ যুঁজাৰু বিমানখনৰ এটা গুৰুত্বপূৰ্ণ অংশ এফ ৩৫ কেন’পি কঢ়িয়াই অনা আমেৰিকা অভিমুখী জাহাজ এখন জলপথেৰে ৰাওনা হৈছিল। চালানো আছিল।
অভিযোগ অনুসৰি, এজন দালালৰ জৰিয়তে উক্ত যুদ্ধ বিমানৰ সামগ্ৰীসমূহ লৈ যোৱা হৈছিল। অৱশ্যে এই চালানখন সঠিকভাৱে ক’লৈ প্ৰেৰণ কৰা হৈছে বা বৰ্তমান এই অংশসমূহৰ মালিক কোন সেয়া এতিয়াও স্পষ্ট হোৱা নাই। এই ঘটনাৰ তদন্ত আৰম্ভ কৰিছে পেন্টাগনে। আমেৰিকান কংগ্ৰেছেও তদন্ত আৰম্ভ কৰা বুলি জানিব পৰা গৈছে।
ইপিনে, এফ-৩৫ জইণ্ট প্ৰগ্ৰেম অফিচে নিশ্চিত কৰিছে যে তেওঁলোকে এফ-৩৫ লাইটনিং II-ৰ যন্ত্ৰাংশৰ সৈতে জড়িত ‘শ্বিপমেণ্ট ইছ্যু’ৰ বিষয়ে অৱগত। খবৰ অনুসৰি আমেৰিকাৰ যুঁজাৰু বিমানখনৰ যি সঁজুলি এই বিতৰ্কৰ বিষয় হৈ পৰিছে, সেয়া কেৱল পাইলটৰ ককপিটৰ বাবে সুৰক্ষামূলক আৱৰণতকৈও অলপ বেছি।
এফ-৩৫ৰ কেন’পিটো ককপিটৰ ওপৰত লগোৱা এটা এক্ৰিলিক বাবল, যিটো স্বচ্ছ ৰাডাৰ শোষক সামগ্ৰীৰ পাতল তৰপেৰে আবৃত। এই কভাৰে বিমানখনৰ ৰাডাৰৰ ছিগনেচাৰ হ্ৰাস কৰাত সহায় কৰি বিমানখনৰ ষ্টীল্থ ডিজাইনৰ এটা অংশ গঠন কৰে। এফ-৩৫ৰ বহৰ বৃদ্ধি হোৱাৰ লগে লগে কেন’পিবোৰ মেৰামতি বা সলনি কৰিবলগীয়া হয়।
প্ৰতিবেদন অনুসৰি অষ্ট্ৰেলিয়াত এফ-৩৫ৰ ৰক্ষণাবেক্ষণ কেন্দ্ৰ আছে যদিও বৰ্তমান কোনো এটাৰে কেন’পি মেৰামতি কৰাৰ ক্ষমতা নাই। এফ-৩৫ বিমানৰ অংশসমূহ সংৰক্ষণ, পৰিবহণ আৰু মেৰামতিৰ বাবে এটা বিশ্বব্যাপী প্ৰতিষ্ঠিত নেটৱৰ্কৰ ওপৰত নিৰ্ভৰশীল। যিটো বিমান নিৰ্মাতা কোম্পানী লকহিড মাৰ্টিনে পৰিচালনা কৰে। অৱশ্যে লকহিড মাৰ্টিনে ‘দ্য পলিটিকো’ক জনোৱা মতে, নিৰাপত্তাজনিত কাৰণত তেওঁলোকে কোনো নিৰ্দিষ্ট চালানৰ বিষয়ে আলোচনা কৰিব নোৱাৰে।
ইপিনে, যোৱা নৱেম্বৰ মাহত ক্ৰাউন প্ৰিন্স মহম্মদ বিন ছলমানক হোৱাইট হাউছত আদৰণি জনোৱাৰ পূৰ্বে আমেৰিকাৰ ৰাষ্ট্ৰপতি ড’নাল্ড ট্ৰাম্পে ছৌদি আৰৱৰ সৈতে এফ-৩৫ যুঁজাৰু বিমান চুক্তিৰ কথা ঘোষণা কৰিছিল। প্ৰতিবেদন অনুসৰি, তেতিয়াৰ পৰাই প্ৰস্তাৱিত চুক্তিখন যথেষ্ট আগবাঢ়িছে। বহু কোটি ডলাৰৰ চুক্তিৰ মাজতে আহিছে এই নতুন প্ৰতিবেদন। যদিও আমেৰিকাই এই সন্দৰ্ভত আনুষ্ঠানিকভাৱে কোনো মন্তব্য কৰা নাই।
