যোৱা দেওবাৰে প্ৰদেশ কংগ্ৰেছৰ সভাপতি গৌৰৱ গগৈৰ উপস্থিতিত কংগ্ৰেছ দলত যোগদান কৰা আমছুৰ প্ৰাক্তন সভাপতি ৰেজাউল কৰিম সৰকাৰে অৱশেষত দলটোৰ পৰা পদত্যাগ কৰিছে। যোগদানৰ মাত্ৰ দুদিন পাছতেই তেওঁ এই সিদ্ধান্ত গ্ৰহণ কৰিবলগীয়া হয়। তেওঁৰ যোগদানক লৈ কংগ্ৰেছ দলৰ ভিতৰচ’ৰাত সৃষ্টি হোৱা তীব্ৰ বিৰোধ আৰু জ্যেষ্ঠ নেতাসকলৰ সমালোচনাৰ বাবেই তেওঁ এই চৰম পদক্ষেপ গ্ৰহণ কৰা বুলি জানিব পৰা গৈছে। বুধবাৰে তেওঁ নিজৰ পদত্যাগ পত্ৰ সভাপতি গৌৰৱ গগৈলৈ প্ৰেৰণ কৰে।
উল্লেখ্য যে যোগদানৰ দিনা দিয়া এক ভাষণত ৰেজাউল কৰিম সৰকাৰে বৰ অসমৰ প্ৰসংগ টানি আনি শিৱসাগৰ-তিনিচুকীয়াক ধুবুৰী আৰু ধুবুৰীক শিৱসাগৰ কৰাৰ কথা কৈছিল। এই বক্তব্যক লৈ সমগ্ৰ ৰাজ্যজুৰি তীব্ৰ প্ৰতিক্ৰিয়াৰ সৃষ্টি হৈছিল। পৰিস্থিতি বিষম হোৱা দেখি তেওঁ ক্ষমা খুজিছিল যদিও বিৰোধী দলপতি দেৱব্ৰত শইকীয়া আৰু সাংসদ প্ৰদ্যুৎ বৰদলৈৰ দৰে জ্যেষ্ঠ নেতাসকলে তেওঁক কঠোৰ ভাষাৰে সমালোচনা কৰিছিল। ইয়াৰ পাছতেই ক্ষুব্ধ হৈ সৰকাৰে দল ত্যাগ কৰাৰ সিদ্ধান্ত লয়।
পদত্যাগ পত্ৰত ৰেজাউল কৰিম সৰকাৰে দলৰ জ্যেষ্ঠ নেতা দেৱব্ৰত শইকীয়া আৰু প্ৰদ্যুৎ বৰদলৈৰ বিৰুদ্ধে তীব্ৰ ক্ষোভ উজাৰে। তেওঁ অভিযোগ কৰে যে দেৱব্ৰত শইকীয়াৰ দৰে নেতা আচলতে বিজেপিৰ এজেণ্ট আৰু তেওঁলোকে কংগ্ৰেছ দলটোক ভিতৰৰ পৰা ধ্বংস কৰি আছে। তেওঁৰ মতে এনে নেতাসকলে নতুন প্ৰজন্মক আগুৱাই আহিবলৈ নিদিয়ে আৰু এখন শক্তিশালী ধৰ্মনিৰপেক্ষ চৰকাৰ গঠনৰ পথত বাধা হৈ থিয় দিয়ে। জাতিতকৈ দল বা ব্যক্তি কেতিয়াও ডাঙৰ নহয় বুলিও তেওঁ মন্তব্য কৰে।
সামাজিক মাধ্যমযোগে দিয়া এক প্ৰতিক্ৰিয়াত সৰকাৰে কয় যে তেওঁ সংখ্যালঘু ৰাইজৰ স্বাৰ্থত আৰু মেৰুদণ্ড পোন কৰি ৰাজনীতি কৰিবলৈহে কংগ্ৰেছত যোগ দিছিল, বিধায়ক হোৱাৰ লক্ষ্যৰে নহয়। কিন্তু একাংশ নেতাই বিজেপিৰ জালত ভৰি দি তেওঁক আৰু তেওঁৰ জাতিক অপমান কৰা কাৰ্য তেওঁ সহ্য নকৰে। বিগত ২০ বছৰীয়া আপোচবিহীন সংগ্ৰামৰ মৰ্যাদা ৰক্ষা কৰিবলৈকে তেওঁ বিবেকৰ দংশনত এই পদত্যাগৰ সিদ্ধান্ত লৈছে বুলি জানিবলৈ দিয়ে।
ভৱিষ্যত পৰিকল্পনাৰ বিষয়ে উল্লেখ কৰি তেওঁ কয় যে বৰ্তমান তেওঁ কোনো ৰাজনৈতিক চিন্তা নকৰে আৰু অনাগত দিনত সংখ্যালঘু ৰাইজেই তেওঁৰ দায়িত্ব ল’ব। সাংসদ প্ৰদ্যুৎ বৰদলৈক লক্ষ্য কৰি তেওঁ কয় যে সংখ্যালঘু ৰাইজে আগন্তুক সময়ত তেওঁক উচিত প্ৰত্যুত্তৰ দিব। এই সমগ্ৰ ঘটনাই এতিয়া ৰাজ্যিক ৰাজনীতিত আৰু বিশেষকৈ কংগ্ৰেছ দলৰ ভিতৰত ব্যাপক চাঞ্চল্যৰ সৃষ্টি কৰিছে।
