বোকাখাতত গঁড় চিকাৰীৰ বিৰুদ্ধে মঙলবাৰে নিশা আৰক্ষীয়ে চলোৱা এক বিশেষ অভিযানত চোৰাং গঁড় চিকাৰীৰ আক্ৰমণত আহত হৈছে এজন অভিযানকাৰী আৰক্ষী বিষয়া ।
আহত আৰক্ষী বিষয়াজন কমাৰগাওঁ আৰক্ষী থানাৰ ভাৰপ্ৰাপ্ত বিষয়া ময়ূৰ জ্যোতি গগৈ বুলি জানিব পৰা গৈছে ।
বিশেষ সূত্ৰৰ পম খেদি গোলাঘাটৰ অতিৰিক্ত আৰক্ষী অধীক্ষক সুৰজিৎ সিং পানেছাৰ আৰু কমাৰগাওঁ আৰক্ষী থানাৰ ভাৰপ্ৰাপ্ত আৰক্ষী বিষয়া ময়ূৰজ্যোতি গগৈৰ নেতৃত্বত আৰক্ষীৰ এটা অভিযানকাৰী এটা দলে বোকাখাতৰ লখৌজানত এজন গঁড় চিকাৰীক কৰায়ত্ব কৰিবলৈ আহিছিল।
অভিযান কালত আৰক্ষীয়ে চোৰাং চিকাৰীৰ এটা তিনিজনীয়া দলক কৰায়ত্ব কৰাৰ লগতে এটা ৩০৩ ৰাইফল উদ্ধাৰ কৰিবলৈ সক্ষম হয় যদিও চিকাৰী দলটোৰ মূল অভিযুক্ত জনে কমাৰগাওঁ থানাৰ আৰক্ষী বিষয়া ময়ূৰজ্যোতি গগৈক চোঁকা দাৰে ঘপিয়াই আহত কৰে।
চোৰাং চিকাৰীজনে আৰক্ষী বিষয়াগৰাকীক আক্ৰমণ কৰিয়ে ঘটনাস্থলীৰ পৰা পলায়ন কৰে ।
আনহাতে, আহত আৰক্ষী বিষয়াগৰাকীক তাৎক্ষনিকভাৱে প্ৰাথমিক চিকিৎসাৰ বাবে বোকাখাত অসামৰিক চিকিৎসালয়ত ভৰ্তি কৰোৱা হয়।
আৰক্ষীয়ে পলায়ন কৰা চোৰাং চিকাৰী জনক কৰায়ত্ত কৰাৰ বাবে অভিযান অব্যাহত ৰাখিছে বুলি জানিবলৈ দিয়ে গোলাঘাটৰ অতিৰিক্ত আৰক্ষী অধীক্ষক সুৰজিৎ সিং পানেছাৰে।
