চলিত ফিফা বিশ্বকাপৰ কালি অনুষ্ঠিত হোৱা এখন গুৰুত্বপূৰ্ণ গ্ৰুপ মেচত অপ্ৰত্যাশিত পৰাজয়ৰ সন্মুখীন হয় শক্তিশালী বেলজিয়াম। মৰক্কোৰ বিপক্ষে মেচখনত ২-০ গলৰ ব্যৱধানত পৰাজয়ৰ মুখ দেখে তাৰকাসমৃদ্ধ দলটোৱে।
এই পৰাজয়ৰ পিছতে কালি নিশা দেশখনৰ ৰাজধানী চহৰ ব্ৰাছেলছৰ ৰাজপথত হিংসাত্মক কাণ্ড সংঘটিত হয়। একাংশ ক্ষুদ্ধ অনুৰাগীয়ে ৰাজপথলৈ ওলাই আহি পথত ৰাখি থোৱা কেইবাখনো বাহনত জুই লগাই দিয়ে।
ইয়াৰ পিছতে পৰিস্থিতি ক্ৰমাৎ উত্তপ্ত হৈ পৰে। পৰিস্থিতি নিয়ন্ত্ৰণৰ বাবে স্থানীয় আৰক্ষী ঘটনাস্থলীত উপস্থিত হয় আৰু প্ৰায় ১২ গৰাকী লোকক আটক কৰে।
আৰক্ষীয়ে পৰিস্থিতি নিয়ন্ত্ৰণৰ বাবে হিংসাত্মক কাণ্ড সংঘটিত কৰা লোকসকলৰ ওপৰত পানী নিক্ষেপ কৰাৰ লগতে কন্দুৱা গেছ প্ৰয়োগ কৰে।
উল্লেখ্য যে যোৱাবাৰৰ বিশ্বকাপৰ তৃতীয় স্থান অধিকাৰী তাৰকাসমৃদ্ধ দলটোক এইবাৰৰ বিশ্বকাপৰ অন্যতম দাবীদাৰ হিচাপে গণ্য কৰা হৈছিল যদিও কালিৰ মেচখনত পৰাজয়ৰ পিছত বিপদৰ সন্মুখীন হ’ব পাৰে দলটো।
কালিৰ মেচখনৰ প্ৰথমাৰ্ধ গলশূন্যভাৱে সমাপ্ত হয় যদিও দ্বিতীয়াৰ্ধত দুটাকৈ গলেৰে চৰম আকাংক্ষিত জয় অৰ্জন কৰে মৰক্কোৱে। মেচখনৰ ৭৩ ৰ’মেইন চাইছে প্ৰথমটো গল দিয়াৰ পিছত অতিৰিক্ত সময়ত জাকাৰিয়াই আন এটা গলেৰে বিজয় নিশ্চিত কৰে।
মেচখনত জয়ৰ পিছত মৰক্কোৱে ৪ পইণ্টেৰে গ্ৰুপৰ দ্বিতীয় স্থানলৈ উন্নীত হোৱাৰ বিপৰীতে পৰাজয়ৰ সন্মুখীন হোৱা বেলজিয়াম ৩ পইণ্টেৰে তৃতীয় স্থানলৈ অৱনমিত হয়।
এতিয়া নক আউটত প্ৰৱেশৰ বাবে বেলজিয়াম নিজৰ অন্তিম গ্ৰুপ মেচত ক্ৰ’ৱেছিয়াৰ বিপক্ষে জয়ী হোৱাটো প্ৰায় অনিবাৰ্য হৈ পৰিছে। কালিৰ আন এখন মেচত ক্ৰ’ৱেছিয়াই কানাডাক ৪-১ গলত পৰাস্ত কৰি গ্ৰুপৰ শীৰ্ষ স্থানলৈ উন্নীত হয়।
