বৰপেটাৰ হাউলীত ভয়ংকৰ পথ দুৰ্ঘটনা : কৰুণ মৃত্যুক সাৱটিলে দুজন যুৱকে

বুধবাৰে নিশা বৰপেটা জিলাৰ হাউলীত সংঘটিত হয় এক ভয়ংকৰ পথ দুৰ্ঘটনা। ৩১ নং ৰাষ্ট্ৰীয় ঘাইপথৰ ইটাৰভিঠা চ’কত সংঘটিত দুৰ্ঘটনাটোত দুজন যুৱকে মৃত্যুবৰণ কৰাত অঞ্চলটোত এতিয়া এক শোকাকুল পৰিৱেশে বিৰাজ কৰিছে।

জানিব পৰা মতে, দুৰ্ঘটনাটোত পতিত হয় এখন ছুইফ্ট ডিজায়াৰ বাহন। যাৰ ফলত বাহনখনত থকা দুজন আৰোহী ক্ৰমে হাউলী খাটালপাৰাৰ উমেশ দাসৰ পুত্ৰ ৰাকেশ জ্যোতি দাস (২৩) আৰু জলজলী গাঁৱৰ ভবেন দাসৰ পুত্ৰ নিকুমণি দাস (২২)ৰ ঘটনাস্থলতে মৃত্যু ঘটে।

ইফালে এই দুৰ্ঘটনাটোত আছিফ আলী নামৰ আন এজন যুৱক গুৰুতৰভাৱে আহত হয়। আহত আলীক সংকটজনক অৱস্থাত বৰপেটা চিকিৎসা মহাবিদ্যালয় হাস্পতালত ভৰ্তি কৰোৱা হয়। বৰ্তমানো যুৱকজন সংকটমুক্ত হোৱা নাই বুলি চিকিৎসালয় কৰ্তৃপক্ষই জানিবলৈ দিয়ে।

উল্লেখ্য যে AS 15 P 0958 নম্বৰৰ ছুইফ্ট ডিজায়াৰ খনেৰে যুৱক তিনিজনে গুৱাহাটী দিশৰ পৰা হাউলী অভিমুখে আহি আছিল। আৰু তেনে অৱস্থাতে গাড়ীখনে নিয়ন্ত্রন হেৰুৱাই হাউলীৰ ইটাৰভিটাৰ ৩১ নং ৰাষ্ট্ৰীয় ঘাইপথৰ দাতিত থকা এখন খৰিৰ দোকানত খুন্দিয়াৰ ফলত উক্ত দুৰ্ঘটনা সংঘটিত হোৱা বুলি জানিব পৰা গৈছে ।