পথৰ দুৰৱস্থাৰ বাবে নগাঁও জিলাৰ পুৰণিগুদামত শনিবাৰে সন্ধ্যা সংঘটিত হয় এক ভয়াবহ পথ দুৰ্ঘটনা। এখন মালবাহী ট্ৰাকে খুন্দিওৱাৰ ফলত দুজন স্কুটী আৰোহী গুৰুতৰভাৱে আহত হয়।
প্ৰাপ্ত তথ্য মতে আজি সন্ধিয়া পুৰণিগুদামৰ হয়বৰগাঁৱত নগাঁও অভিমূখী এ এচ-০২-২৪৪২ নম্বৰৰ এখন মালবাহী ট্ৰাকে বিপৰীত দিশৰ পৰা আহি থকা এ এচ-০২ টি-০১৯৪ নম্বৰৰ এখন স্কুটীক মহতিয়াই নিয়ে।
পিছত স্থানীয় ৰাইজ আৰু চামগুৰি আৰক্ষী ঘটনাস্থলীত উপস্থিত হৈ গুৰুতৰভাবে আহত আৰোহী দুজনক সংকটজনক অৱস্থাত নগাঁৱলৈ প্ৰেৰণ কৰে। বাতৰি লিখা পৰলৈকে তেওঁলোকৰ পৰিচয় জানিব পৰা হোৱা নাই।
ইফালে দুৰ্ঘটনাটোৰ পিছতেই ক্ষুব্ধ স্থানীয় ৰাইজে প্ৰায় এক ঘণ্টা ধৰি ৩৭নং ৰাষ্ট্ৰীয় ঘাই পথচোৱা অৱৰোধ কৰি ৰাখে। জৰাজীৰ্ণ অৱস্থাত থকা নিৰ্মীয়মান পথ চোৱাত কোনো সাংকেতিক ফলক নথকাৰ বাবে বিগত এমাহত ২০টাতকৈ অধিক দুৰ্ঘটনা সংঘটিত হোৱাৰ অভিযোগ আনি ৰাইজে গড়কাপ্তানি বিভাগ আৰু প্ৰশাসনৰ বিৰুদ্ধে তীব্ৰ ক্ষোভ উজাৰে।
অৱশ্যে কিছু সময় পিছত চামগুৰি চক্ৰ আৰক্ষী বিষয়া উপস্থিত হৈ শীঘ্ৰে ফলক লগোৱা হ’ব বুলি আশ্বাস প্ৰদান কৰাত ৰাইজে পথটো মুকলি কৰি দিয়ে।
