তিনিচুকীয়া জিলাৰ মাৰ্ঘেৰিটা মহকুমাৰ লিডু আৰক্ষী চকীৰ অন্তৰ্গত বাৰ্মা কেম্পৰ সমিপৱৰ্তী ৩১৫ নং ৰাষ্ট্ৰীয় ঘাইপথত আজি সন্ধিয়া এক ভয়ংকৰ পথ দুৰ্ঘটনাত সংঘটিত হয়৷
উক্ত পথ দুৰ্ঘটনাটোত এজন লোক থিতাতে নিহত হোৱাৰ লগতে আন এজন গুৰুতৰভাৱে আহত হৈ সংকটজনক অৱস্থাত চিকিৎসাধীন হৈ আছে বুলি জানিব পৰা গৈছে। ঘনকুঁৱলীৰ বাবে দুৰ্ঘটনাটো সংঘটিত হোৱা বুলি সন্দেহ কৰা হৈছে।
দুৰ্ঘটনাত আহত হোৱা ব্যক্তিজনক চিলাপথাৰৰ সমীৰণ হাজং বুলি চিনাক্ত কৰা হৈছে যদিও নিহত হোৱা ব্যক্তিজনক বাতৰি লিখা সময়লৈকে চিনাক্ত কৰিব পৰা হোৱা নাই৷
প্ৰাপ্ত খবৰ অনুসৰি এ এছ ২৩ জি ৬৯৪৫ নম্বৰৰ এখন জিপ গাড়ী আৰু এ এছ ২৩ ডাব্লিউ ৪৮৯২ নম্বৰৰ এখন মটৰ চাইকেলৰ মাজত মুখামুখি সংঘৰ্ষৰ ফলতে উক্ত দুৰ্ঘটনাটো হয়৷ দুৰ্ঘটনা সংঘটিত কৰা জিপখন লিডু আৰক্ষীয়ে জব্দ কৰিছে।
উল্লেখ যে আজি দুৰ্ঘটনা সংঘটিত হোৱা স্থানতে যোৱা ২৪ ডিচেম্বৰত এখন ডাম্পাৰে এখন মটৰ চাইকেল আৰু এখন স্কুটিক খুন্দা মৰাৰ ফলত থিতাতে ৩জন লোক নিহত হৈছিল।
