হাইলাকান্দি জিলাৰ অসম-মিজোৰাম সীমান্তৱৰ্তী মায়াপুৰত আজি সংঘটিত হয় এক ভয়ংকৰ পথ দুৰ্ঘটনা। দুৰ্ঘটনাটোত চাৰিজন লোকে প্ৰাণ হেৰুওৱাৰ লগতে কেইবাজনো লোক গুৰুতৰভাৱে আহত হৈছে।
দুৰ্ঘটনাটোত মৃত্যু হোৱা লোক কেইজনক ক্ৰমে ৰালডো ঠাংগো, ছাবুল হুছেইন লস্কৰ, হাবিব আলী আৰু আব্দুল মোন্নাফ লস্কৰ বুলি আৰক্ষীয়ে জানিবলৈ দিয়ে।
হাইলাকান্দিৰ আৰক্ষী অধীক্ষক পবিন্দ্ৰ কুমাৰ নাথে জনোৱা অনুসৰি আজি ৰাতিপুৱা প্ৰায় ১০.৩০ মান বজাত ৰামনাথপুৰ আৰক্ষী থানাৰ অন্তৰ্গত মায়াপুৰত এখন টাটা ছুম’ গাড়ীয়ে নিয়ন্ত্ৰণ হেৰুৱাই ৰাষ্ট্ৰীয় ঘাইপথৰ তলত বাগৰি পৰাৰ ফলতে এই ভয়ংকৰ দুৰ্ঘটনাটো সংঘটিত হয়।
AS-24 C 4564 নম্বৰৰ ছুম’ গাড়ীখন মিজোৰামৰ ভৈৰৱীৰ পৰা হাইলাকান্দি অভিমুখে আহি থকা সময়তে ভাইছেড়া অঞ্চলত নিয়ন্ত্ৰণ হেৰৱাই পথৰ পৰা বাগৰি পৰে।
ঘটনাৰ খবৰ লাভ কৰাৰ লগে লগে স্থানীয় আৰক্ষীৰ দল ঘটনাস্থলত উপস্থিত হৈ স্থানীয় ৰাইজৰ সহযোগত আহত সকলক উদ্ধাৰ কৰি ততাতৈয়াকৈ চিকিৎসালয়লৈ প্ৰেৰণ কৰে বুলি আৰক্ষী অধীক্ষক গৰাকীয়ে জনায়।
জানিব পৰা মতে দুৰ্ঘটনাটোত আহত হোৱা ১১ জন লোকৰ ভিতৰত গুৰুতৰভাৱে আহত হোৱা তিনিজন সম্প্ৰতি শিলচৰ মেডিকেল কলেজ হস্পিতালত ভৰ্তি হৈ আছে।
