সম্প্ৰতি চামগুৰিৰ ভিতৰুৱা বিভিন্ন অঞ্চলত সঘনাই সংঘটিত হ’বলৈ ধৰিছে বিভিন্ন অপৰাধমূলক ঘটনা। আজি পুৱতি নিশা ৰূপহীহাট আৰক্ষী থানাৰ অন্তৰ্গত চামগুৰিৰ ১নং ভূৰবন্ধাত নিশা পুনৰ আন এক চাঞ্চ্যলকৰ ঘটনা সংঘটিত হয়।
ঘটনাৰ বিৱৰণি মতে তিনিজনীয়া এটা দুৰ্বৃত্তৰ দলে হাতত চোকা অস্ত্ৰ লৈ চামগুৰিৰ ১নং ভূৰবন্ধাৰ এটা পৰিয়ালৰ ঘৰত অৰ্তকিতে প্ৰৱেশ কৰে। কিন্তু দুৰ্বৃত্তৰ দলটো ঘৰখনত প্ৰৱেশ কৰাৰ উমান পাই সাৰ পোৱা গৃহস্থৰ সৈতে হতাহতিত লিপ্ত হয় দুৰ্বৃত্তৰ দলটো।
ফলত দুৰ্বৃত্তৰ দলটোৰ আক্ৰমণত গুৰুতৰভাৱে আঘাতপ্ৰাপ্ত হয় পৰিয়ালটোৰ নাণ্টু ৰঞ্জন মণ্ডল, কল্পনা মণ্ডলৰ লগতে আন এগৰাকী মহিলা। গুৰুতৰভাৱে আহত দুয়োকে নিশাই স্থানীয় ৰাইজে চিকিৎসালয়লৈ প্ৰেৰণ কৰে।
ইফালে নিশা ঘৰৰ বেৰ ভাঙি প্ৰৱেশ কৰা দুৰ্বৃত্তৰ দলটোৱে ডকাইতি কাণ্ড সংঘটিত কৰিবৰ বাবেই ঘৰখনত প্ৰবেশ কৰিছিল বুলি সন্দেহ প্ৰকাশ কৰিছে স্থানীয় ৰাইজে। অৱশ্যে একাংশ স্থানীয় ৰাইজৰ তৎপৰতাত কথমপি ৰক্ষা পৰে পৰিয়ালটো।
পৰৱৰ্তী সময়ত ঘটনাস্থলীত আমবাগান আৰক্ষী উপস্থিত হৈ ঘটনাৰ তদন্ত আৰম্ভ কৰাৰ লগতে দুৰ্বৃত্তৰ দলটোৱে ব্যৱহাৰ কৰা এখন চোকা অস্ত্ৰ উদ্ধাৰ কৰিবলৈ সক্ষম হয়।
উল্লেখযোগ্য যে বিগত প্ৰায় এমাহত চামগুৰিৰ বিভিন্ন অঞ্চলত সংঘটিত হোৱা কেইবাটাও লোমহৰ্ষক ডকাইতি কাণ্ডৰ ঘটনা সংঘটিত হৈছিল।
