আইচিচিৰ টুৰ্নামেন্টত ভাৰতৰ ১১ বছৰীয়া বিশ্বকাপৰ অপেক্ষাৰ অন্ত পৰিল শনিবাৰে নিশা। কেনচিংটন অ’ভেলত ৰুদ্ধশ্বাস থ্ৰিলাৰত ভাৰতে দক্ষিণ আফ্ৰিকাক পৰাস্ত কৰাৰ সময়তে সকলো যাদুৰ মুহূৰ্তৰ উন্মেষ ঘটিল। তাৰে এটা হ’ল ৰোহিত শৰ্মাৰ আন্তৰিকতাৰে হাৰ্দিক পাণ্ডিয়াক কৰা আলিংগন। তাৰ পিছত তাৰকা অল-ৰাউণ্ডাৰজনৰ গালত আঁকি দিয়া চুমা।
মেচৰ অন্তত আৱেগিক হৈ পৰি হাৰ্দিক পাণ্ডিয়াই কয়, ‘এই ট্ৰফী জয় মোৰ জীৱনত বহুত। বৰ আৱেগিক অনুভৱ কৰিছো। আমি সকলোৱে কঠোৰ পৰিশ্ৰম কৰিছিলো। কিন্তু ক’ৰবাত যেন আবদ্ধ হৈ পৰিব লগা হৈছিল৷ সমগ্ৰ দেশে যি বিচাৰিছিল আজিৰ দিনটোত আমি অৰ্জন কৰিছো। ছমাহৰ পাছত এই মুহূৰ্তটো মোৰ বাবে বিশেষ হৈ থাকিল। ইমানদিনে এটা কথাও কোৱা নাই। একোৱে ঠিকঠাক হৈ যোৱা নাছিল। মই জানিছিলোঁ যে এটা মুহূৰ্ত আহিব যেতিয়া মই আকৌ উজলি উঠিম। এনে এটা সুযোগে সকলো বিশেষ কৰি তোলে।”
লগতে পঢ়কঃ বিশ্বকাপ জয়ৰ মেচতে ‘বিদায় ঘোষণা’; টী-২০ৰ পৰা অৱসৰ বিৰাট-ৰোহিতৰ
তেওঁৰ লগত যি হৈ আছিল সেয়া আছিল অতি ‘অন্যায়’। নকবই বা কিয়। মুম্বাই ইণ্ডিয়ানছৰ অধিনায়ক হোৱাৰ পিছত তেওঁ আই পি এলত দুঃস্বপ্নৰ সময় পাৰ কৰিছিল। ফ্ৰেঞ্চাইজিয়ে ৰোহিতক বাদ দিয়াৰ বিতৰ্কিত সিদ্ধান্ত গ্ৰহণ কৰে। তাৰ পিছত খেলপথাৰত নামিলেই অনুৰাগীৰ ককৰ্থনা শুনিব লগা হয় ।
তেওঁৰ নেতৃত্বত আই পি এলত মুম্বাইয়ে শেষৰ স্থান দখল কৰে। ৰোহিতৰ সৈতে তেওঁৰ ব্যক্তিগত সম্পৰ্ক কঠিন হৈ পৰিছিল। সেইটোৱেই দাবী কৰা হয়। কিন্তু বিশ্বকাপত দেশ চেম্পিয়ন হোৱাৰ পাছতেই সেই সকলোবোৰ বঞ্চনা, মনোমালিন্য মচি গৈছে।
তাৰকা অলৰাউণ্ডাৰগৰাকীয়ে বিদায়ী প্ৰশিক্ষক ৰাহুল দ্ৰাবিড়কো প্ৰশংসা কৰে। বিশ্বকাপৰ ফাইনেলৰ লগে লগে প্ৰশিক্ষক দ্ৰাবিড়ৰ কাৰ্যকালো শেষ হয়। হাৰ্দিকে কয়, ‘তেওঁৰ কাৰণে মোৰ বৰ ভাল লাগিছে। তেওঁ এজন দুৰ্দান্ত ব্যক্তি। তেওঁৰ অধীনত খেলা প্ৰতিটো মুহূৰ্ত উপভোগ কৰিছো। তেওঁক এনেকৈ বিদায় দিব পাৰি ভাল লাগিছে। তেওঁৰ লগত মোৰ সম্পৰ্ক সদায় ভাল। আমিও ভাল বন্ধু হৈও পৰিছিলোঁ। সকলো ছাপোৰ্ট ষ্টাফৰ বাবেও বহুত ভাল লাগিছে।”
Hardik Pandya 🥺🥺❤ Rohit Sharma #T20WorldCup2024 #T20IWorldCup #T20IWorldCup #India pic.twitter.com/7WX1pmmguz
— Sandhya Reddy YSCRP 🇺🇿 (@SandhyaSamayam) June 29, 2024
হাৰ্দিকক প্ৰশংসাৰে উপচাই অধিনায়ক ৰোহিত শৰ্মাই কয় যে অলৰাউণ্ডাৰগৰাকীয়ে “শেষ অভাৰত দুৰ্দান্ত বলিং কৰিছিল”। শনিবাৰে নিশা বাৰ্বাডোছৰ কেনচিংটন অ’ভেলত পৰাজয়ৰ গৰাহৰ পৰা উভতি আহি ভাৰতে ৭ ৰানত জয়ী হৈছিল।
