শুকুৰবাৰৰ পৰা ইংলেণ্ডৰ বিৰুদ্ধে অনুষ্ঠিত হ’বলগীয়া টেষ্টৰ পূৰ্বে ভ্ৰমণকাৰী ভাৰতীয় দলৰ শিবিৰত লাগিছে এক ডাঙৰ আঘাত। এজবাষ্টন টেষ্টৰ বাবে ভাৰতীয় দলত উপলব্ধ নহ’ব অধিনায়ক ৰোহিত শৰ্মা। ক’ভিডত আক্ৰান্ত হোৱাৰ বাবে ভাৰতীয় দলৰ পৰা বাহিৰ হৈছে ভাৰতীয় দলৰ নিয়মীয়া অধিনায়ক গৰাকী।
ৰোহিত শৰ্মাৰ স্থানত ভাৰতীয় দলৰ নতুন অধিনায়ক হিচাপে নিযুক্তি দিয়া হৈছে যশপ্ৰীত বুমৰাহক। এইদৰে কপিল দেৱৰ পিছত বুমৰাহে টেষ্ট ক্ৰিকেটত ভাৰতক নেতৃত্ব দিয়া প্ৰথমজন পেচ বলাৰ হোৱাৰ কৃতিত্ব অৰ্জন কৰাটো প্ৰায় নিশ্চিত হৈ পৰিছে।
আজি বিচিচিআই- ৰ এগৰাকী জেষ্ঠ বিষয়াই সংবাদ মাধ্যমৰ আগত প্ৰকাশ কৰা অনুসৰি ক’ভিডৰ আৰটি-পিচিআৰ পৰীক্ষাত ৰোহিতৰ পুনৰ ক’ভিড পজিটিভ ধৰা পৰাৰ বাবে তেওঁ দলৰ পৰা বাদ পৰিছে। তাৰকা ক্ৰিকেটাৰ গৰাকী এতিয়াও আইচ’লেশ্যনত আছে বুলি তেওঁ লগতে উল্লেখ কৰে।
আনহাতে দলৰ নিয়মীয়া সহ-অধিনায়ক কে এল ৰাহুলো শৃংখলাত অনুপস্থিত বাবে যশপ্ৰীত বুমৰাহে দলটোক নেতৃত্ব দিব বুলি বিচিচিআইৰ জ্যেষ্ঠ বিষয়া বিষয়াগৰাকীয়ে সংবাদ সংস্থা পিটিআইক জানিবলৈ দিয়ে।
১৯৩২ চনত প্ৰথমবাৰৰ বাবে ভাৰতে টেষ্ট ক্ৰিকেট খেলাৰ পিছত টেষ্টত ভাৰতক নেতৃত্ব দিয়া ৩৬ সংখ্যক অধিনায়ক হিচাপে পৰিগণিত হ’ব বুমৰাহ। ভাৰতীয় ক্ৰিকেট দলৰ বলিং আক্ৰমণৰ মেৰুদণ্ড স্বৰূপ বুমৰাহে বৰ্তমানলৈকে ২৯ খন টেষ্টত ১২৩ টা উইকেট লাভ কৰিছে।
আনহাতে ৰোহিত শৰ্মা দলৰ পৰা বাহিৰ হোৱাৰ পিছত তেওঁৰ স্থানত মায়াংক আগৰৱালক দললৈ আমন্ত্ৰণ জনোৱা হৈছে। ইতিমধ্যে খেলুৱৈগৰাকী ইংলেণ্ডত উপস্থিত হৈছে। অৱশ্যে দললৈ আমন্ত্ৰিত হ’লেও আগৰৱালে মূল একাদশত স্থান লাভ কৰাৰ সম্ভাৱনা কম।
বিচিচিআইৰ বিষয়া গৰাকীয়ে জানিবলৈ দিয়া মতে মায়াংক আগৰৱালক বিকল্প হিচাপেহে দলত অন্তৰ্ভুক্ত কৰা হৈছে। সেয়েহে তেওঁ প্লেয়িং ইলেভেনত স্থান লাভ কৰাৰ আশা ক্ষীণ।
তেওঁ লগতে শুভমন গিলৰ সৈতে পূজাৰা অথবা হনুমা বিহাৰীয়ে ভাৰতীয় দলৰ ইনিংছ মুকলি কৰাৰ দায়িত্বত থাকিব পাৰে বুলি ঐক ইঙ্গিত প্ৰদান কৰিছে।
উল্লেখ্য যে ১ জুলাইৰ পৰা অনুষ্ঠিত হ’বলগীয়া এই টেষ্টখন যোৱা বছৰৰ ভাৰতৰ ইংলেণ্ড ভ্ৰমণৰ অৰ্ধসমাপ্ত টেষ্ট শৃংখলাৰ অংশ। ভাৰতীয় শিবিৰত ক’ভিডৰ সংক্ৰমণৰ পিছত শৃংখলাৰ অন্তিমখন টেষ্ট পিছুৱাই দিয়া হৈছিল। পাঁচখনীয়া মেচৰ শৃংখলাটোত ভাৰত ইতিমধ্যে ২-১ ব্যৱধানত আগবাঢ়ি আছে।