ভাৰতীয় মটৰ চাইকেল নিৰ্মাতা কোম্পানী ৰয়েল এনফিল্ডে বৃহৎ সফলতা অৰ্জন কৰিছে। এই কোম্পানীটোৱে বিশ্বৰ তৃতীয় শক্তিশালী অটোমোবাইল ব্ৰেণ্ড হিচাপে পৰিগণিত হৈছে। আন্তঃৰাষ্ট্ৰীয় ব্ৰেণ্ড মূল্যায়ন কোম্পানী ব্ৰেণ্ড ফাইনেন্সৰ ‘অটোমোটিভ ইণ্ডাষ্ট্ৰী ২০২৬’ প্ৰতিবেদনত ৰয়েল এনফিল্ডে এই স্বীকৃতি লাভ কৰিছে। এই ভাৰতীয় বাইক ব্ৰেণ্ডৰ তালিকাত টয়োটা আৰু বিএমডব্লিউৰ পিছতে আছে। অ’ডি আৰু ফেৰাৰীৰ দৰে বিশ্ববিখ্যাত কোম্পানীসমূহকো অতিক্ৰম কৰিছে।
ব্ৰেণ্ড ফাইনেন্সৰ প্ৰতিবেদন অনুসৰি ৰয়েল এনফিল্ডৰ ব্ৰেণ্ড ষ্ট্ৰেংথ ইনডেক্সৰ স্ক’ৰ ১০০ৰ ভিতৰত ৮৮.৯।ইয়াৰ উপৰিও কোম্পানীটোক AAA ৰেটিংও দিয়া হৈছে। বিশেষজ্ঞসকলৰ মতে যোৱা কেইবছৰমানৰ পৰা আন্তঃৰাষ্ট্ৰীয় বজাৰত ৰয়েল এনফিল্ডৰ জনপ্ৰিয়তা দ্ৰুতগতিত বৃদ্ধি পাইছে। এই প্ৰতিবেদনত এই কথা প্ৰতিফলিত হৈছে।
প্ৰতিবেদনত লগতে কোৱা হৈছে যে ৰয়েল এনফিল্ডৰ ব্ৰেণ্ড মূল্যও যথেষ্ট বৃদ্ধি পাইছে। বৰ্তমান কোম্পানীটোৰ ব্ৰেণ্ড মূল্য প্ৰায় ১.২ বিলিয়ন ডলাৰ। এই মূল্য এবছৰত প্ৰায় ৩০ শতাংশ বৃদ্ধি পাইছে। এসময়ত কেৱল ৰেট্ৰ’ ডিজাইনৰ মটৰ চাইকেলৰ বাবেই পৰিচিত ৰয়েল এনফিল্ডে এতিয়া আন্তঃৰাষ্ট্ৰীয় বজাৰত নিজকে এক শক্তিশালী ব্ৰেণ্ড হিচাপে প্ৰতিষ্ঠা কৰিছে।
বিশেষজ্ঞসকলৰ মতে কোম্পানীটোৰ উত্থানৰ অন্যতম কাৰণ হৈছে আন্তঃৰাষ্ট্ৰীয় বজাৰত ইয়াৰ দ্ৰুত সম্প্ৰসাৰণ। বৰ্তমান ৰয়েল এনফিল্ডে বিশ্বৰ ৮০ খনতকৈও অধিক দেশত ব্যৱসায় কৰি আছে। ইয়াৰ উপৰিও বিশ্বজুৰি তেওঁলোকৰ ৩২০০ৰো অধিক খুচুৰা বিপণী আছে। কেৱল সেয়াই নহয়, কোম্পানীটোৱে বিভিন্ন দেশত ৭টা আন্তঃৰাষ্ট্ৰীয় চি কে ডি এছেম্বলি প্লাণ্টো মুকলি কৰিছে। ফলত ইউৰোপ, দক্ষিণ আমেৰিকা, দক্ষিণ-পূব এছিয়া আৰু অষ্ট্ৰেলিয়াৰ দৰে বজাৰত ৰয়েল এনফিল্ডে অধিক শক্তিশালী উপস্থিতি গঢ়ি তুলিবলৈ সক্ষম হৈছে।
তেওঁলোকৰ নিৰ্দিষ্ট প্ৰডাক্ট ষ্ট্ৰেটেজিকো কোম্পানীটোৰ সফলতাৰ আঁৰৰ এটা ডাঙৰ কাৰণ বুলি বিবেচিত হৈছে। ৰয়েল এনফিল্ডে সদায় নিজৰ ক্লাছিক ডিজাইন আৰু সহজ অভিযান্ত্ৰিকীকৰণ বজাই ৰাখিছে। হাণ্টাৰ ৩৫০ আৰু ছুপাৰ মিটিয়ৰ ৬৫০ৰ দৰে মডেল এতিয়াও গ্ৰাহকৰ মাজত যথেষ্ট জনপ্ৰিয়। বিশেষকৈ যিসকলে সহজ অথচ ষ্টাইলিছ ৰাইডিং অভিজ্ঞতা বিচাৰে, এই বাইকবোৰৰ চাহিদা বেছি।
আনহাতে, ৰয়েল এনফিল্ডে নতুন হিমালয়ান ৪৫০ মুকলি কৰি এডভেঞ্চাৰ বাইক ছেগমেণ্টত নিজৰ স্থান শক্তিশালী কৰিছে।এই মডেলৰ জৰিয়তে কোম্পানীটোৱে নতুন প্ৰজন্মৰ ৰাইডাৰকো আকৰ্ষণ কৰিবলৈ সক্ষম হৈছে। বিশেষজ্ঞসকলৰ মতে আধুনিক প্ৰযুক্তি আৰু ক্লাছিক শৈলীৰ মিশ্ৰণে ৰয়েল এনফিল্ডক আনতকৈ পৃথক কৰি তুলিছে।
কেৱল ৰয়েল এনফিল্ডেই নহয়, আন কেইবাটাও ভাৰতীয় অটোমোবাইল কোম্পানীও এই তালিকাত অন্তৰ্ভুক্ত। বিশ্বৰ শক্তিশালী অটোমোবাইল ব্ৰেণ্ডৰ তালিকাত পঞ্চম স্থানত আছে টাটা মটৰ্ছ। ২৫ নম্বৰত মহিন্দ্ৰা আৰু ৩৪ নম্বৰত আছে মাৰুতি চুজুকি।
