ৰে’ল খন তেতিয়া চলি গৈছিল। কিন্তু তেতিয়াও ৰে’লত উঠা নাছিল এজন যাত্ৰীয়ে।
ৰে’ল খনে গতি ল’বলৈ আৰম্ভ কৰাৰ সময়তে যাত্ৰী জনে ততাতৈয়াকৈ ৰে’লত উঠিবলৈ লৈছিল।
তেতিয়াই সংঘটিত হৈছিল ভয়ংকৰ ঘটনাটো। ৰে’লত উঠিবলৈ চেষ্টা কৰাৰ সময়তে ভৰি পিচলি লোক জন পৰি গৈছিল প্লেটফৰ্মত।
ক্ষন্তেক পিছতে তেওঁ ৰে’লৰ চৰকাৰ তলত সোমাই পৰাটো নিশ্চিত আছিল যদিও সেয়া ঘটিবলৈ নাপালে।
ঘটনাস্থলীত নিমিষৰ ভিতৰতে উপস্থিত হ’ল ৰে’ল আৰক্ষীৰ এটা দল। দলটোৰ এগৰাকী মহিলা কৰ্মীয়ে প্ৰথমে দৌৰি গৈ পৰি যোৱা লোকজনক দূৰলৈ চোঁচৰাই নিয়ে।
এই কামত তেওঁক সহায় কৰে আন সংগীসকলেও। ফলত নিশ্চিত বিপদৰ পৰা ৰক্ষা পৰিল লোক জন।
এই শিহৰণকাৰী ঘটনাটো ঘটিছে বিশাখাপট্টনম ৰে’ল ষ্টেছনত। এই ঘটনাৰ ভিডিঅ’ ৰেল বিভাগেই শেহতীয়াকৈ বিভাগটোৰ টুইটাৰত ৰাজহুৱা কৰিছে।
ৰে’ল বিভাগে প্ৰকাশ কৰা ভিডিঅ’টোত এইবুলি কেপচন দিয়া হৈছে—‘প্ৰথমে মানৱতা’।
Serving Humanity First:
An alert RPF woman constable of "Meri Saheli" team at Visakhapatnam Railway station rescued a passenger falling under a moving train.
The episode was caught on the body-worn camera of RPF personnel. pic.twitter.com/05FJvP8Xju— Ministry of Railways (@RailMinIndia) February 10, 2021
আৰপিএফৰ মহিলা কৰ্মীয়ে দেহত লগাই ৰখা কেমেৰাত বন্দী হৈছে এই ভিডিঅ’।
দৰাচলতে সেই দিনা ৰে’ল ষ্টেছনত উপস্থিত আছিল RPF-এ যাত্ৰীৰ সুৰক্ষাৰ বাবে গঠন কৰা মেৰি চহেলি নামৰ গোটটোৰ একাংশ সদস্যা। তেওঁলোকেই ৰে’লত উঠিবলৈ গৈ পৰি যোৱা লোক জনক ৰক্ষা কৰিছিল।
ভিডিঅ’টো ভাইৰেল হৈ পৰাৰ পিছতে সকলোৱে RPF ৰ মহিলা কৰ্মীসকলৰ সাহসিকতা আৰু কৰ্তব্য নিষ্ঠাৰ শলাগ লৈছে।
বহুতে RPF ৰ মেৰি চহেলি গোটৰ সদস্যা কেইগৰাকীক ঈশ্বৰৰ দূত হিচাবেও অভিহিত কৰা দেখা গৈছে।