গছৰ মাজত লুকাই ৰখা হৈছিল কোটি টকা। আয়কৰ বিভাগৰ অভিযানত উদ্ধাৰ হৈছে এই নগদ টকা। আয়কৰ বিভাগে নগদ ধনখিনি জব্দ কৰিছে। বাতৰি অনুসৰি, এগৰাকী কংগ্ৰেছ নেতাৰ ভাতৃৰ ঘৰৰ সন্মুখত থকা এজোপা গছৰ পৰা উদ্ধাৰ হৈছে এক কোটি টকা।
জানিব পৰা মতে, মহীশূৰত আয়কৰ বিভাগে কংগ্ৰেছ নেতা অশোক কুমাৰ ৰাইৰ ভাতৃ সুব্ৰমনিয়াম ৰাইৰ ঘৰত অভিযান চলাইছিল। আগন্তুক নিৰ্বাচনত পুত্তুৰ বিধানসভাৰ আসনৰ পৰা প্ৰতিদ্বন্দ্বিতা কৰিব অশোক কুমাৰ ৰাইয়ে।
উল্লেখ্য যে অহা ১০ মে’ত কৰ্ণাটকত অনুষ্ঠিত হ’ব বিধানসভা নিৰ্বাচন। ১৩ মে’ত ফলাফল ঘোষণা কৰা হ’ব। ইয়াৰ পূৰ্বে কৰ্ণাটক আৰক্ষী, আয়কৰ বিভাগে বিভিন্ন স্থানত তালাচী চলাই আছে। সুব্ৰমনিয়াম ৰাইৰ ঘৰতো অনুৰূপ তালাচী চলোৱা হয়। সেই তালাচীত প্ৰায় এক কোটি নগদ ধন উদ্ধাৰ হৈছে।
জানিব পৰা মতে, ঘৰৰ সন্মুখৰ তেতেলী গছত লুকুৱাই ৰাখিছিল বস্তাভৰ্তি টকা। ঘৰত নগদ ধন নোপোৱাত হতাশ হৈ আয়কৰ বিভাগৰ কৰ্মচাৰীসকলে গছজোপাৰ কাষত থিয় হৈ জিৰণি লৈছিল। হঠাৎ গছজোপাৰ ডালবোৰলৈ চকু যায়। এটা বান্ধি থোৱা বস্তা দেখা যায়। নামি অনাৰ পিছত প্ৰায় এক কোটি টকা উদ্ধাৰ হয়।
