ৰে’লৱেৰ বাবে ২০২৫-২৬ বৰ্ষৰ বাজেটত আৱণ্টন কৰা পুঁজিৰ সন্দৰ্ভত ০৩ ফেব্ৰুৱাৰী, ২০২৫ তাৰিখে ৰে’ল, তথ্য আৰু সম্প্ৰচাৰ, ইলেক্ট্ৰনিক্স আৰু তথ্য প্ৰযুক্তিৰ দপ্তৰৰ মন্ত্ৰী অশ্বিনী বৈষ্ণৱে উত্তৰ-পূৰ্ব্বাঞ্চলৰ সংবাদ কৰ্মীসকলৰ সৈতে এক বাৰ্তালাপত মিলিত হয়। এই বৈঠকত উত্তৰ পূব সীমান্ত ৰে’লৱেৰ মহাপ্ৰৱন্ধক চেতন কুমাৰ শ্ৰীবাস্তৱ, উত্তৰ পূব সীমান্ত ৰে’লৱে (নিৰ্মাণ)ৰ মহাপ্ৰৱন্ধক অৰুণ কুমাৰ চৌধুৰী আৰু মুখ্য কাৰ্যালয়ৰ জ্যেষ্ঠ ৰে’ল বিষয়াবৰ্গও উপস্থিত আছিল।
সংবাদ মাধ্যমৰ লোকসকলক সম্বোধন কৰি ৰে’ল মন্ত্ৰীগৰাকীয়ে জানিবলৈ দিয়ে যে একেৰাহে দ্বিতীয়বাৰৰ বাবে ভাৰতীয় ৰে’লৰ বাবে বাজেটত মুঠ ২.৬৫ লাখ কোটি টকাৰো অধিক ৰাশিৰ মূলধন ব্যয় প্ৰদান কৰা হৈছে।
ৰে’ল মন্ত্ৰীগৰাকীয়ে উল্লেখ কৰে যে ভাৰতীয় ৰে’লৱেই সমগ্ৰ দেশতে দ্ৰুত, সুৰক্ষিত আৰু আৰামদায়ক ৰে’ল যাত্ৰা সম্প্ৰসাৰিত কৰিবলৈ সাজু হৈছে। অনাগত বছৰসমূহত ২০০ খন নতুন বন্দে ভাৰত ৰে’ল, ১০০ খন অমৃত ভাৰত ৰে’ল আৰু ৫০ খন দ্ৰুত নমো ভাৰত ৰে’ল আৰম্ভ কৰা হ’ব।
এই নতুন ৰে’ল আৰু আধুনিক ডবাসমূহে নিম্ন আৰু মধ্যবিত্ত শ্ৰেণীৰ লোকসকলক সেৱা আগবঢ়োৱাত যথেষ্ট সহায় কৰিব। সুৰক্ষা বৃদ্ধিৰ বাবে ১০০০ খন নতুন ফ্লাইঅভাৰ আৰু আণ্ডাৰপাছও নিৰ্মাণ কৰা হ’ব বুলি তেওঁ লগতে কয়।
এই বাৰ্তালাপৰ সময়ত মন্ত্ৰীগৰাকীয়ে কয় যে উত্তৰ-পূৰ্ব্বাঞ্চলত চলি থকা সকলো প্ৰকল্পৰ বাস্তৱিক প্ৰগতি উন্নত গতিত আগবাঢ়িছে। ভৌগোলিকভাৱে কঠিন এলেকাত অৱস্থিত হোৱা স্বত্বেও, আগতীয়াকৈ সম্পূৰ্ণ হোৱাৰ বাবে ২৪x৭আধাৰত প্ৰকল্পৰ কাম চলাই থকা হৈছে।
অসম আৰু উত্তৰ-পূৰ্ব্বাঞ্চলত, ২০১৪বৰ্ষৰ পৰা ১৮২৪ কিলোমিটাৰ নতুন ট্ৰেক নিৰ্মাণ কৰা হৈছে, যি শ্ৰীলংকাৰ সমগ্ৰ ৰে’ল নেটৱৰ্কতকৈ অধিক। ২০১৪ বৰ্ষৰ পৰা উত্তৰ-পূৰ্ব্বাঞ্চলৰ ৰাজ্যসমূহত ৪৭৮ খন নতুন ফ্লাইঅভাৰ আৰু আণ্ডাৰপাছ নিৰ্মাণ কৰা হয়। উত্তৰ পূব সীমান্ত ৰে’লৱেত কৱচ ৰূপায়ণৰ বাবে মুঠ ১১৮৯ ৰুট কিলোমিটাৰ চিনাক্ত কৰা হৈছে, মন্ত্ৰীগৰাকীয়ে লগতে কয়।
দুয়োজন মহাপ্ৰৱন্ধকে সংবাদ মাধ্যমক সম্বোধন কৰি জনায় যে অমৃত ভাৰত ষ্টেচন আঁচনিৰ অধীনত উত্তৰ পূব সীমান্ত ৰে’লৱেৰ ৯২ টা ষ্টেচন আধুনিকীকৰণ কৰা হ’ব। উত্তৰ পূব সীমান্ত ৰে’লৱে অধিক্ষেত্ৰৰ অধীনৰ সকলো ট্ৰেকৰ বৈদ্যুতিকৰণ ২০২৫ চনৰ ডিচেম্বৰৰ ভিতৰত সম্পূৰ্ণ কৰা হ’ব। মিজোৰামৰ ভৈৰবী–ছাইৰাং প্ৰকল্পটোও এই বছৰৰ জুলাই মাহৰ ভিতৰত সম্পূৰ্ণ হোৱাৰ সম্ভাৱনা আছে।
তদুপৰি, ২০২৫-২৬ বিত্তীয় বৰ্ষৰ বাবে উত্তৰ-পূৰ্ব্বাঞ্চলৰ ৰে’লৱে আন্তঃগাঁথনি প্ৰকল্পৰ বাবে মুঠ বাজেট আৱণ্টন হৈছে ১০,৪৪০ কোটি টকা। ২০০৯-১৪ বৰ্ষত গড় বাজেট আৱণ্টন ২,১২২ কোটি টকাৰ তুলনাত ই ৫ গুণতকৈয়ো অধিক।
এই বছৰ বাজেটৰ আৱণ্টন নতুন ৰে’ল পথ আৰু দ্বৈত ৰে’লপথ প্ৰকল্প, ট্ৰেক নৱীকৰণৰ কাম, পৰিবহনৰ সুবিধা, পথ সুৰক্ষাৰ কাম, সেতুৰ কাম, চিগনেলিং, ৱৰ্কশ্বপ আধুনিকীকৰণৰ আৰু গ্ৰাহকৰ সুবিধা আদিৰ দৰে কেইবাটাও খণ্ডত অভূতপূৰ্ব বৃদ্ধি কৰিছে।
